﻿YAASINƆ.
22.
Tↄ́ nnaa dɛ auzikila, nna kↄ̃n gbɛ̃nↄo dɛ vura kↄ̃n kondogiola. 
Auzikidee kↄ̃n takaasideeo kãsãa dↄ̃nkↄ̃mɛ, Dii bé à ń kɛ́ ń píngi. 
Làakaridee è gĩakɛ à à zaaa e à utɛnɛ, ↄ̃ndↄ̃saidee ègↄ̃ gaa ai à wɛ́ɛtãmma e. 
Zĩndabusana kↄ̃n vĩakɛna Diinɛo gbɛ̀n auziki kↄ̃n bɛ̀ɛo kↄ̃n wɛ̃̀ndio ũ. 
Lɛ̀ kↄ̃n takutɛɛo kú gbɛ̃ dↄ̀rↄsaide zɛ́n, gbɛ̃ kɛ̀ ye aafiazi è kɛ̃ḿma. 
Ǹ nɛ́ féte da zɛ́ kɛ̀ dɛ à sɛ́a, tó à ìsi kũ̀, eé kɛ̃aro. 
Auzikidee è gbãaa mↄ takaasideenɛ, pↄ́sɛ̃kãri è zↄ̀ ble pↄ́deenɛ. 
Gbɛ̃ kɛ̀ à à zaaa tↄ̃̀, adee é yã e à kɛ̃gurↄ, à pãsĩkɛgo é à gbɛ̃. 
Luda é aubarika da gbɛ̃ kɛ̀ gbɛ̃kɛɛ vĩin kɛ̀ è pↄ́blee kpaatɛ takaasideenↄnɛ yãnzi. 
Ǹ pɛ́ faboria, swèe é mì dɛ, yãkete kↄ̃n wío é yãa. 
Nↄ̀sɛpuradee kɛ̀ à lɛ́gbɛ nna bé eégↄ̃ dɛ kína gbɛ̃nna ũ. 
Dii wɛ́ɛ ègↄ̃ tɛ́ dↄ̃nazi, è mìkpɛɛ zu náanɛsaide yãnɛ. 
Mɛadee è be músu kú bàazi, tó ma bↄ, eé ma dɛ gãalɛ. 
Kaarua lɛ́ nɛ́ wɛ̀ɛ zòotomɛ, gbɛ̃ kɛ̀ Dii pↄↄ fɛ̃̀o è lɛ́ɛ à sin. 
Faasaiyã ègↄ̃ kú nɛ́nↄ swɛ̃̀n, totona kↄ̃n flã̀o é tó aↄ̃ kɛ̃a. 
Gbɛ̃ kɛ̀ è wɛ́ɛ tã takaasideea lɛ à a auziki kaara kↄ̃n gbɛ̃ kɛ̀ è gba da ↄↄdeenɛo, aↄ̃ píngi é kɛ̃sã. 
Ǹ swã kpá ǹ ↄ̃ndↄ̃rinↄ yã'onnɛna ma, ǹ n nↄ̀sɛ wɛ̃ ma yãdannɛnanɛ, 
zaakɛ à nna ǹgↄ̃ kũna n swɛ̃̀ guu, àgↄ̃ kú n lɛ́mmɛ. 
Baa mpi, mɛ́ɛ yã daannɛ gbã̀a, lɛ ǹgↄ̃ Dii náanɛ vĩ yãnzimɛ. 
Ma yã'onnɛna kɛ̃̀nnɛ mɛ̀n baaakuri, yã pìnↄ lɛ́damma kↄ̃n dↄ̃nao vĩ. 
Mɛ́ɛ yãpuraa kɛ̀ náanɛ vĩi daannɛ, lɛ ǹ e ǹ yã weńla a zɛ́amɛ. 
Ǹton gbãasaidee ble à gbãasaikɛ yãnziro, ǹton gbãaa mↄ wɛ̃ndadeenɛ yãkpaɛkɛkiiaro, 
zaakɛ Dii é yã síńyo, eé wɛ́ɛ tã gbɛ̃ kɛ̀ aↄ̃ↄe wɛ́ɛ tãaḿmanↄa. 
Ǹton gbɛ̃nna kpá kↄ̃n pↄfɛ̃rioro, ǹtongↄ̃ tɛ́ kↄ̃n pɛ̃tɛ̃deeoro, 
lɛ ǹton à dà sɛ́ɛ ǹ n zĩnda kpá yãziro yãnzi. 
Ǹton gbɛ̃ke fĩa di n musuro, ǹton kpɛ́gaau sɛ́nɛro. 
Tó ń pↄ́ke vĩ ǹ fĩa booro, weé n daɛbↄ sɛ́ n gĩzĩ. 
Ǹton tↄↄtɛ lɛ́ sèeda zii wurɛro, n dezinↄ bé aↄ̃ pɛ̀ɛ. 
N gbɛ̃ kɛ̀ à a zĩi dↄ̃ maamaaa èↄ́? Adee é zĩi kɛ kínanↄnɛ, èe kɛ talakanↄn eé kɛńnɛro. 
