﻿YAASINƆ.
15.
Yãwenlana dↄ̃ↄ è pↄfɛ̃ kpáɛ, yã pãsĩ è ń pↄↄ fɛ̃. 
Ɔ̃ndↄ̃dee yã'ona è ń gba dↄ̃na, mↄde yↄ̃nkↄↄ yã ègↄ̃ faa sai. 
Dii wɛ́ɛ kú gu píngia, ègↄ̃ gbɛ̃ zaaanↄ kↄ̃n gbɛ̃ maaanↄ tàasi kɛɛ. 
Yãbusɛ'ona è ń gba wɛ̃̀ndi dufu, yãlɛkpɛɛ è ń kã dɛ. 
Faasaidee è kya ká a de totonan, lɛ́dammamari sↄ̃ↄ làakari vĩ. 
Gbɛ̃ maaa ua ègↄ̃ auziki vĩ bíta, gbɛ̃ zaa pↄ́nↄ ègↄ̃ yãkete vĩ. 
Ɔ̃ndↄ̃dee lɛ́ è dↄ̃na fã, yↄ̃nkↄↄnↄ sↄ̃, aↄ̃ↄ nↄ̀sɛ vĩro. 
Dii tɛ̃̀n gbɛ̃ zaaanↄ sa'ona ũ, mↄde gbɛ̃ maaanↄ wɛ́ɛkɛna è kánɛ. 
Dii zà gbɛ̃ zaaa yãkɛnan, à ye gbɛ̃ kɛ̀ aↄ̃ↄ tɛ́ yãzɛdeezinↄzi. 
Totona pãsĩn gbɛ̃ kɛ̀ pã̀ zɛ́nɛ pↄ́ ũ, gbɛ̃ kɛ̀ ye lɛ́dammaziroo sↄ̃ é gamɛ. 
Lán Dii gɛ̀wãa kↄ̃n kaatɛnao yã dↄ̃ nà, weé gbɛ̃ntee swɛ̃̀ pↄ́ o dↄↄ́? 
Fabori ègↄ̃ yezi wà a gba làakariro, è gá ↄ̃ndↄ̃rinↄ kiiaro. 
Nↄ̀sɛ nnaa è tó uu gↄ̃ werena, nↄ̀sɛ yakana è gbɛ̃ kã dɛ. 
Laasuudee è dↄ̃na wɛtɛ, yↄ̃nkↄↄ è yãfaasai mↄ́mↄ. 
Gurↄ píngi ègↄ̃ pãsĩ wɛ̃ndadeenɛmɛ, pↄnnadee ègↄ̃ kú zĩbaa guu. 
Pↄ́ vĩna féte vĩakɛna Diinɛ guu maa dɛ auziki bíta kũna wahaa guula. 
Dò pã blena yenzi guu maa dɛ nↄ̀bↄ nↄ́side sona kↄ̃n zanguola. 
Pↄfɛ̃ri è swèe da, nↄ̀sɛyĩidee è zↄka mì dɛ. 
Mɛadee zɛ́ ègↄ̃ dɛnɛ lɛ̀kara ũmɛ, gbɛ̃ maa zɛ́ nɛ́ zɛ́daamɛ. 
Nɛ́ ↄ̃ndↄ̃dee è tó a de pↄↄ kɛ nna, gbɛ̃ntee yↄ̃nkↄↄ è kya ká a dan. 
Yãfaasai è kɛ laasuusaideenɛ nna, laasuudee è zɛ́ sɛ́ súusu. 
Lɛ́kpakↄ̃sↄ̃nasai è yã gboro, lɛ́dammari pariinↄ è tó yã kɛ. 
Yãwenlana dↄ̃ↄ è a òri pↄↄ kɛ nna, yã'ona à gurↄↄa ègↄ̃ nna fá! 
Wɛ̃̀ndi zɛ́ è gá kↄ̃n làakarideenↄ musu lɛ aↄ̃ton sí gɛ̀wãanlo yãnzi. 
Dii è ĩadãri ua wí, è gyaanↄↄ gulɛzɛki dãkpa. 
Dii zà laasuu zaaan, yãnna'ona è kɛnɛ gbãsĩro. 
Ɔↄzaawɛtɛri è ĩa da a uaa, gbɛ̃ kɛ̀ zà ↄdↄnkpɛɛgbaan égↄ̃ kuu aafia. 
Gbɛ̃ maaa è laasuu lɛ́ yã kɛ̀ eé weńlaa, yã zaaa è bↄɛ gbɛ̃ zaaanↄ lɛ́n gↄ̃ↄ. 
Dii zã̀ kↄ̃n gbɛ̃ zaaanↄ, è swã kpá gbɛ̃ maaanↄ aduakɛnazi. 
Uu werena è ń pↄↄ kɛ nna, baaru nnaa è ń wá were. 
Gbɛ̃ kɛ̀ è swã dↄ aafia lɛ́dammazi égↄ̃ bɛdee ũ ↄ̃ndↄ̃rinↄ tɛ́. 
Gbɛ̃ kɛ̀ gì totonazi zà a zĩndan, lɛ́dammamari sↄ̃ è gↄ̃ làakaridee ũ. 
Vĩakɛna Diinɛ è ↄ̃ndↄ̃ↄ dańnɛ, zĩndabusana è bɛ̀ɛ líńnɛ. 
