﻿YAASINƆ.
4.
Ma nɛ́nↄ, à gbɛ̃nsi lɛ́damma ma, à làakari dↄa lɛ à asãnsi e. 
Dↄ̃na súusun mɛ́ɛ daaare, àton pã kpá ma yãdannɛziro. 
Kɛ̀ má kuu nɛ́ ũ ma de ↄzĩ, má busana ma da nɛ́ mɛ̀n do léle ũ. 
Ma de yã dàmɛ à bè: Ǹgↄ̃ ma yã kũna n swɛ̃̀ guu, ǹ ma yãdiɛnanↄ da nɛ́gↄ̃ kuu. 
Ǹ ↄ̃ndↄ̃ kũ ǹgↄ̃ dↄ̃na vĩ, ǹton sãn ǹ pã ma yãnɛro. 
Ǹton pã kpá ↄ̃ndↄ̃ↄziro, eé n dãkpa, ǹgↄ̃ yezi, eé ↄ kúnla. 
Ǹ ↄ̃ndↄ̃ kũ, àmbe yã píngi mì ũ, ǹ dↄ̃na wɛtɛ kↄ̃n auziki kɛ̀ ń vĩio píngi. 
Ǹ à kũ gbãngbãn, eé n kaara, ǹ à kũ ↄplaplaa, eé bɛ̀ɛ línnɛ. 
Eégↄ̃ dɛ fùra maaa ũ n mìa, eégↄ̃ dɛnnɛ kífura gakuidee ũ. 
Ma nɛ́, ǹ swã kpá ma yãzi, ǹ yã pì da, n wɛ̃̀ndi égↄ̃ gbã̀a. 
Ma ↄ̃ndↄ̃ zɛ́ ↄ̀dↄannɛ, ma n da à zɛ́ súusu guu. 
Tó nɛ́ɛ táa oon, pↄ́ke é kpánnɛro, tó nɛ́ɛ bàa lɛɛn, nɛ́ gɛ̃̀n síro. 
Ǹgↄ̃ ma lɛ́damma kũna, ǹton ↄ gbarɛziro, ǹ à kũ gbãa, zaakɛ àmbe n wɛ̃̀ndi ũ. 
Ǹton zaakɛrinↄ zɛ́ sɛ́ro, ǹton tɛ́ gbɛ̃ zaaanↄ zɛ́ziro. 
Ǹ pãńnɛ, ǹton naḿmaro, ǹ kɛ̃ḿma ǹ n gáao. 
Tó aↄ̃ↄe zaaa e wà kɛ̀ro, aↄ̃è ii oro, tó aↄ̃ↄe gbɛ̃ e wà kari kɛro, ii è gɛ̃ ń wɛ́ɛnlo. 
Zaakɛ zaakɛnan ń pↄ́blee ũ, wɛ́ɛtãna gbɛ̃nↄan ń ímina ũ. 
Gbɛ̃ maaanↄ zɛ́ dɛ lán gudↄna bàmɛ, à gupuraa ègↄ̃ bↄↄ lán ↄfãntɛ̃ bↄna bà. 
Zaakɛrinↄ zɛ́ dɛ lán gusia níginigi bàmɛ, aↄ̃è pↄ́ kɛ̀ tò wè gɛ̃̀n sí dↄ̃ro. 
Ma nɛ́, ǹ làakari dↄ yã pìnↄa, ǹ swã kpá ma yã'onnɛnazi. 
Ǹton kpá swãkotoro, ǹgↄ̃ kũna n swɛ̃̀ guu. 
Zaakɛ à dɛ wɛ̃̀ndi ũ gbɛ̃ kɛ̀ lè à kũ̀nɛ, à dɛ mɛ̀ píngi aafia ũ. 
Kɛ̀ dɛnlaa ǹ làakari dↄ n swɛ̃̀ yãa, zaakɛ wɛ̃̀ndi kãsãa bↄ̀ swɛ̃̀ kiiamɛ. 
Ǹ bↄ yãzaa'onan, ǹ mì kɛ̃ yãlɛkpɛɛ'onaa. 
Ǹ wɛ́ɛ dↄ n aɛ, ǹ guu gwa n kuu súusu. 
Ǹ zɛ́ sɛ́ súusu, n yãkɛnanↄ píngi é bↄ maa. 
Ǹton na ↄplazi ke ↄzɛziro, ǹton gbá pɛ́ɛ à zaa zɛ́nlo. 
