﻿YAASINƆ.
2.
Ma nɛ́, tó n ma yã sì, tó ń ma yãdiɛnanↄ kũna n swɛ̃̀n, 
tó nɛ́ɛ swã kpaa ↄ̃ndↄ̃yãzi, tó n swɛ̃̀ kpà asãnsia, 
tó n lɛ́ zù wɛ́ɛzɛ̃ɛzi, tó n wii lɛ̀ yã dↄ̀rↄ dↄ̃nazi, 
tó n kpáɛ kɛ̀zi lán kondogi bà, tó ń wɛ̀tɛ lán auziki kɛ̀ utɛna bà, 
nɛ́gↄ̃ vĩakɛna Diinɛ dↄ̃ sa, nɛ́ bↄ Luda dↄ̃naa. 
Zaakɛ Dii bé è ń gba ↄ̃ndↄ̃ↄ, dↄ̃na kↄ̃n asãnsio è bↄ à kiiamɛ. 
À zĩ̀blena kũna gbɛ̃ maaanↄnɛ, à dɛ sɛngbango ũ taarisaideenↄnɛ. 
È ↄ liga gbɛ̃ maaanↄzi aↄ̃ zɛ́ guu, è a yãmarinↄ dãkpa ń táa'ona guu. 
Nɛ́gↄ̃ yãzɛdee dↄ̃ sa kↄ̃n yã súusuo kↄ̃n yã maaao kↄ̃n zɛ́ maaao píngi. 
Zaakɛ ↄ̃ndↄ̃ↄ é gɛ̃ n swɛ̃̀n, dↄ̃na é n pↄↄ kɛ nna. 
N làakari é n dãkpa, asãnsi é ↄ liganzi. 
Eé n bↄ gbɛ̃ zaaanↄ zɛ́n eé n sí yãbɛ̃ɛ'orinↄ ↄzĩ. 
Gbɛ̃ pìnↄ pã̀ zɛ́ súusunɛ, aↄ̃ gusia zɛ́ sɛ̀. 
Aↄ̃è pↄnnaa kɛ zaakɛna guu, aↄ̃è yã zaa faasai nnaa ma. 
Aↄ̃ yãkɛna súusuro, aↄ̃ègↄ̃ yã kɛɛ mↄnafiki guumɛ. 
Ɔ̃ndↄ̃ↄ pì é n bↄ zinakɛri ↄzĩ, eé n sí kaarua yãnnanna'onnɛnaa. 
Nↄgbɛ̃ pì pã kpà a nɛ́nↄkparɛkɛgurↄ gↄ̃ↄzi, à Luda bà kuunao yã gbòro. 
À bɛɛ è mì pɛ́ńyo gaaamɛ, à kpɛ́ zɛ́ è táńyo gɛ̀wãan. 
Gbɛ̃ kɛ̀ gɛ̃̀zi è nↄ̀sɛ liɛro, è wɛ̃̀ndi zɛ́ le dↄro. 
Ɔ̃ndↄ̃ↄ pì é n da gbɛ̃ maaanↄ zɛ́a, nɛ́gↄ̃ dↄ̀rↄdeenↄ zɛ́ kũna. 
Zaakɛ nↄ̀sɛpuradeenↄ bé wé gↄ̃ bùsu vĩ, taarisaideenↄ bé wégↄ̃ kú à guu. 
Zaakɛrinↄ sↄ̃, weé pɛ́ḿma wà ń bↄ bùsummɛ, weé náanɛsaideenↄ kpakɛ à guu. 
