﻿SAAMUNƆ.
119.
Aubarikadeenↄn gbɛ̃ kɛ̀ aↄ̃ kuu taari sai wà Dii doka kũnanↄ ũ. 
Aubarikadeenↄn gbɛ̃ kɛ̀ aↄ̃ↄ Dii yã kũna wà à kii wɛtɛ kↄ̃n nↄ̀sɛo doonↄ ũ. 
Aↄ̃è yã kpɛɛgãnda kɛro, aↄ̃ègↄ̃ tɛ́ à zɛ́ guu. 
N n ↄdↄkii ↄ̀dↄawe, lɛ wàgↄ̃ tɛ́zi kↄ̃n làakario. 
Má yezi màgↄ̃ kú ma dↄ̀rↄa màgↄ̃ n yãdannɛnanↄ kũna. 
Tó má n yãdiɛnanↄ kũna píngi, bee é tó wí ma kũro. 
Gurↄↄ kɛ̀ mɛ́ɛ n dokayã maaanↄ dadaa, mɛ́ n sáabu kpá kↄ̃n nↄ̀sɛpuraao. 
Mɛ́gↄ̃ n yãdannɛnanↄ kũna, ǹton ma tón mámmanlo. 
Dian gↄ̃kparɛ e àgↄ̃ kuu gbãsĩ sai nà? Séde à yãkɛna kↄ̃ sɛ́ kↄ̃n n yão. 
Mɛ́ɛ n kii wɛtɛɛ nↄ̀sɛo do, ǹton tó mà zã n yãdiɛnanↄaro. 
Ma n yã dà ma swɛ̃̀ guu lɛ màton durun kɛnnɛro yãnzi. 
Aubarikadeen mmↄn Dii ũ, ǹ n yãdiɛnanↄ damɛ. 
Dokayã kɛ̀ aↄ̃ bↄ̀ n lɛ́nnↄ píngi, mɛ́ tↄ̃kɛ̃ńnɛ kↄ̃n ma lɛ́o. 
Mɛɛ̀ pↄnnaa kɛ kↄ̃n n yãnↄ lán wè kɛ kↄ̃n auziki bítao nà. 
Mɛɛ̀ laasuu lɛ́ n ↄdↄkiia, ma wɛ́ɛ kú n zɛ́nↄa. 
Ma pↄↄ kɛ̀ nna n yãdiɛnanↄa, n yã é sãmaguro. 
Ǹ yã maaa kɛ mↄma n zↄ̀blerinɛ lɛ màgↄ̃ kuu wɛ̃̀ndio, mɛ́gↄ̃ n yã kũna. 
Ǹ ma wɛ́ɛ kɛ̃mɛ lɛ mà wɛ́ɛ si yãbↄnsaɛnↄlɛ n dokan. 
Nibↄn ma ũ anduna guu, ǹton n yãdiɛnanↄ utɛmɛro. 
N dokayãnↄ nidɛna baabↄrɛ ma swɛ̃̀ blè. 
Nɛɛ̀ kpãkɛ̃ wadadeenↄ kɛ̀ lɛ́ ń kũnↄzi, gbɛ̃ kɛ̀ aↄ̃ zã̀ n yãdiɛnanↄanↄ. 
Ǹ ma bↄ sↄ̃sↄ̃nan kↄ̃n dↄkɛnyoo, zaakɛ má n yãnↄ kũna. 
Baa kɛ̀ kínɛnↄ vɛ̃̀ɛ wà lɛ́ kpàkↄ̃sↄ̃mazi, ma laasuu égↄ̃ kú n yãdannɛnanↄa. 
N yãnↄ è ma pↄↄ kɛ nna, n yã pì è lɛ́ dama. 
Ma gↄ̃ daɛna tↄↄtɛ, ǹ ma wɛ̃̀ndi dãkpa lán ń ò nà. 
Ma a yãkɛnanↄ dↄ̀dↄnnɛ, ben n wemala, ǹ n yãdannɛnanↄ damɛ. 
Ǹ tó mà n ↄdↄkiinↄ dↄ̃, ma laasuu égↄ̃ kú n yãbↄnsaɛnↄa. 
Ma pↄↄ sia à kɛ̀ bíta, ǹ ma gba gbãa lán ń ò nà. 
Ǹ ma kɛ̃ mↄnafiki zɛ́a, ǹ ma gba zɛ́ mà zɛ kↄ̃n n dokao. 
Ma yãpura zɛ́ sɛ̀, ma swɛ̃̀ ègↄ̃ kú n dokaa. 
Má n yãnↄ kũna ↄplaplaa, ǹton tó wí ma kũro, Dii. 
Mɛɛ̀ wã n yãdiɛnanↄ zɛ́zi, zaakɛ n ma làakari kpàɛmɛ. 
Dii, ǹ n yãdannɛnanↄ zɛ́ ↄdↄamɛ lɛ màgↄ̃ kũna ai ma wɛ̃̀ndi lɛ́n. 
Ǹ ma gba ↄ̃ndↄ̃ↄ màgↄ̃ n doka kũna, màgↄ̃ zĩi kɛa kↄ̃n nↄ̀sɛo do. 
Ǹ ma da n yãdiɛnanↄ zɛ́n, zaakɛ bee bé è kámagu. 
Ǹ tó ma swɛ̃̀ gↄ̃ kú n yãnↄa, àton tá bĩni zɛ́nlo. 
Ǹ ma wɛ́ɛ go pↄ́ pãanↄa, ǹ ma wɛ̃̀ndi dãkpa lán ń ò nà. 
Ǹ yã kɛ̀ ń ò papa mↄma n zↄ̀blerinɛ, lɛ́ kɛ̀ ń gbɛ̃̀ n vĩakɛrinↄnɛ. 
Ǹ tó sↄ̃sↄ̃na kɛ̀ mɛɛ̀ à vĩa kɛɛ gomala, zaakɛ n dokayãnↄↄ maa. 
Má ye n ↄdↄkiizi fá, ǹ ma wɛ̃̀ndi dãkpa n maakɛɛ guu. 
Dii, ǹ mↄ́ ǹ gbɛ̃kɛɛ kɛmɛ, ǹ ma mì sí lán ń ò nà, 
gbasa mà yã sí ma sↄ̃̀sↄ̃rila, zaakɛ mɛ́ɛ n yã náanɛ kɛɛ. 
Ǹton yãpura yã sí ma lɛ́nlo, zaakɛ n yãzɛdeen má wɛ́ɛ dↄzi. 
Mɛ́gↄ̃ n doka kũna ai gurↄ píngi, 
Mɛ́gↄ̃ tɛ́ aafia, zaakɛ ma n ↄdↄkii wɛ̀tɛ. 
Mɛ́ n yãnↄ o kínanↄ aɛ, wí é ma kũ sↄ̃ro. 
N yãdiɛnanↄ è kɛ ma pↄↄnɛ, zaakɛ má ye yã pìnↄzi. 
Ma gã̀ sɛ̀ n yãdiɛna kɛ̀ má yezinↄnɛ, mɛɛ̀ laasuu lɛ́ n yãdannɛnanↄa. 
Ǹ dↄ yã kɛ̀ ń ò n zↄ̀blerinɛn, zaakɛ ń tò ma wɛ́ɛ dↄzi. 
Yã kɛ̀ è ma làakari kpáɛ ma nawɛ̃akɛnan yɛ̀, n lɛ́gbɛ̃na bé è ma wɛ̃̀ndi dãkpa. 
Wadadeenↄↄ e ma faboo yãana sai, baa kↄ̃n beeeo mɛɛ̀ zã n dokaaro. 
Mɛɛ̀ dↄ n dokayã kɛ̀ kú zaa ziinↄn, ben aↄ̃è ma nↄ̀sɛ yĩi kũmɛ, Dii. 
Mɛɛ̀ pↄ fɛ̃ maamaa, kɛ̀ zaakɛrinↄ è pã kpá n dokazi yãnzi. 
Mɛɛ̀ lɛ̀ sí n yãdannɛnanↄ musu ma kuuna anduna kɛ̀kii guu. 
N yã ègↄ̃ dↄmagu gwãavĩ, Dii, mɛɛ̀gↄ̃ n dokayãnↄ kũna. 
Ma yã beeenↄ kↄ̃ dↄ̃̀, zaakɛ mɛɛ̀gↄ̃ n ↄdↄkii gwaa. 
Dii, ḿbe ma baka ũ, ma lɛ́ gbɛ̃̀ kɛ̀ mɛ́ n yã ma. 
Mɛɛ̀ kúɛ kɛnnɛ kↄ̃n nↄ̀sɛo do, ǹ sùu kɛmao lán ń ò nà. 
Ma a yãkɛnanↄ laasuu lɛ̀, ben ma sↄkpa n dokayãnↄa. 
Mɛ́ wã, mɛ́ gbá gáɛro, lɛ mà n yãdiɛnanↄ da. 
Baa kɛ̀ gbɛ̃ zaaanↄ bà fĩ̀kãmazi, n dokayãnↄ é sãmaguro. 
Mɛɛ̀ fɛɛ mà sáabu kɛnnɛ lezãndo n dokayã maaanↄ musu. 
N vĩakɛri píngi gbɛ̃nnan ma ũ, gbɛ̃ kɛ̀ aↄ̃è n ↄdↄkii gwaanↄ. 
Dii, n gbɛ̃kɛɛ anduna pà, ǹ n yãdiɛnanↄ damɛ. 
N à maaa kɛ̀ mↄma n zↄ̀blerinɛ, lán ń ò nà, Dii. 
Ǹ wɛ́ɛzɛ̃ɛ kↄ̃n dↄ̃nao damɛ, zaakɛ ma n yãdiɛnanↄ sì. 
Lɛ ń kpɛ́ ǹ ↄ tↄ̃ma, má sãsãnamɛ, mↄde tia sa má n yã kũna. 
Ń maa bensↄ̃ n yãkɛnanↄↄ maa, ǹ n yãdiɛnanↄ damɛ. 
Baa kɛ̀ wadadeenↄ yãsiaa nàma, mɛɛ̀gↄ̃ n ↄdↄkii gwaa kↄ̃n nↄ̀sɛo do. 
Aↄ̃ swã gbã̀gbã, èe yã maro, mↄma sↄ̃ ma pↄↄ nna n dokaa. 
N ↄtↄ̃mana kɛ̀mɛ maa, lɛ mà e mà n yãdannɛnanↄ dada. 
Doka kɛ̀ bↄ̀ n lɛ́n maamɛ dɛ vura kↄ̃n kondogi bↄrↄ ũgbangbanↄla. 
N ↄↄ ma í kàsa à ma kɛ, ǹ ma gba ↄ̃ndↄ̃ↄ mà n yãdiɛnanↄ dada. 
N vĩakɛrinↄ é ma e wà pↄnnaa kɛ, zaakɛ n yãn ma tãmaa dↄa. 
Dii, má dↄ̃ kɛ̀ n dokayãnↄↄ maa, kɛ̀ ń náanɛ vĩ yãnzin n ↄ tↄ̃̀mazi. 
Ǹ gbɛ̃kɛɛ kɛmɛ lɛ ma nↄ̀sɛ kpáɛ, lán ń ò mↄma n zↄ̀blerinɛ nà. 
Ǹ mↄ́ ǹ wɛ̃nda dↄ̃mɛ lɛ màgↄ̃ kuu, zaakɛ n dokayãnↄn ma pↄnnaa ũ. 
Ǹ tó wí wadadee kɛ̀ aↄ̃ taari kɛ̀mɛ pãnↄ kũ, mapi sↄ̃ mɛ́ laasuu lɛ́ n ↄdↄkiia. 
N vĩakɛrinↄ su ma kiia, gbɛ̃ kɛ̀ aↄ̃ↄ n yãnↄ dↄ̃ↄnↄ. 
Ǹ tò ma nↄ̀sɛ gↄ̃ pura n yãnↄ musu lɛ wí tón ma kũro yãnzi. 
N mìsina yã e ma swɛ̃̀ blee, n yãn ma wɛ́ɛ dↄzi. 
Ma wɛ́ɛ dↄ̀ n lɛ́gbɛ̃nazi ai ma kpasa, bↄrɛn nɛ́ ma nↄ̀sɛ yĩi kũmɛɛ? 
Má dɛ lán báa bↄ̀kↄ kɛ̀ tɛ́sukpɛ mà bà, baa kↄ̃n beeeo n yãdiɛnanↄ è sãmaguro. 
Mↄma n zↄ̀bleri mɛ́gↄ̃ n dãa ai bↄrɛmɛ? Bↄrɛn nɛ́ ĩa da ma wɛ́ɛtãmmarinↄa? 
Wadadeenↄ è wɛ̀ɛ yↄ̃mɛ mà zun, aↄ̃ yã è kↄ̃ sɛ́ kↄ̃n n dokaoro. 
N yãdiɛnanↄ píngi náanɛ vĩ, ǹ dↄmalɛ, zaakɛ wèe wɛ́ɛ tãama pãmɛ. 
À gↄ̃̀ féte kɛ̀ aↄ̃é yãamao anduna guu, mↄma sↄ̃ mɛ́ɛ pã kpá n ↄdↄkiiziro. 
Ǹ ma wɛ̃̀ndi dãkpa n gbɛ̃kɛ yãnzi, mɛ́ n yãnↄ da. 
Dii, n yã ègↄ̃ kuu gurↄ píngi, à kãsãa pɛɛna zaa musu. 
Ń náanɛ vĩ wɛ̃̀ kↄ̃n wɛ̃̀o, n anduna kàɛ, ben à kpɛ́ kuu. 
Pↄ́ píngi kpɛ́ kuu gbã̀a n doka musu, zaakɛ pↄ́ píngi è dↄnzi. 
Tó n dokan ma pↄnnaa ũ yãro, lɛ ma kaatɛ ma nawɛ̃akɛna guu. 
N ↄdↄkii é sãmagu zikiro, zaakɛ à gãzĩn n ma wɛ̃̀ndi dã̀kpa. 
N pↄ́n ma ũ, ǹ ma mì sí, zaakɛ ma n ↄdↄkii wɛ̀tɛ. 
Gbɛ̃ zaaanↄↄ e ma kpákpaa wà ma dɛ, mↄde ma làakari kú n yãnↄa. 
Má è kɛ̀ pↄ́ maa píngi zaka lɛ́ kuumɛ, mↄde n yãdiɛnanↄ bíta lɛ́ vĩro. 
Má ye n dokazi à kɛ̀ bíta fá, mɛɛ̀gↄ̃ laasuu lɛɛa zaa kↄngↄ ai uusiɛ. 
N yãdiɛnanↄ è tó ma ↄ̃ndↄ̃ↄ gↄ̃ dɛ ma ibɛɛnↄ pↄ́la, zaakɛ à kú ma swɛ̃̀n gurↄ píngi. 
Ma wɛ́ɛzɛ̃ɛ dɛ ma yãdannɛrinↄ pↄ́la ń píngi, zaakɛ ma laasuu ègↄ̃ kú n yãnↄamɛ. 
Ma ↄ̃ndↄ̃ↄ dɛ mareenↄ pↄ́la, zaakɛ mɛɛ̀gↄ̃ n ↄdↄkiinↄ gwaa. 
Mɛɛ̀ mì kɛ̃ zɛ́ zaa píngia lɛ mà e màgↄ̃ n yã kũna yãnzi. 
Mɛ́ɛ kɛ̃ n dokayãnↄaro, zaakɛ ḿbe ń dàmɛ. 
N yãnↄ nnamɛ à kɛ̀ bíta, à nna dɛ zↄ́la ma lɛ́n. 
N ↄdↄkii è ma gba làakari, Beee yãnzin ma za sãsãna zɛ́ pínginzi. 
N yãn fitia ũ ma gbánɛ, è guu pumɛ zɛ́n. 
Ma la dà ma sↄ̃ zɛo, kɛ̀ mɛ́gↄ̃ tɛ́ n dokayã maaanↄzi. 
Ma wɛ́ɛtãmmana kɛ̀ bíta, Dii. ǹ ma wɛ̃̀ndi dãkpa lán ń ò nà. 
Ǹ ma sáabukpana sí, gbasa ǹ n dokayãnↄ damɛ, Dii. 
Mɛɛ̀gↄ̃ ma zĩnda da kari guu, baa kↄ̃n beeeo n dokayãnↄ è sãmaguro. 
Zaakɛrinↄ takutɛɛ kpàkpamɛ, mↄde mɛ́ɛ zã n ↄdↄkiiaro. 
N yãnↄn ma túbi ũ ai gurↄ píngi, aↄ̃mbe ma pↄnnaa ũ. 
Ma swɛ̃̀ kú n yãdannɛnanↄ kɛnaa ai ma wɛ̃̀ndi lɛ́n. 
Ma za nↄ̀sɛplaadeenↄn, n dokan má yezi. 
Ḿbe ma utɛki kↄ̃n ma sɛngbangoo ũ, n yãn ma wɛ́ɛ dↄzi. 
À gumala a zaakɛrinↄ lɛ màgↄ̃ ma Luda yãdiɛnanↄ kũna. 
Ǹgↄ̃ ma kũna lán ń ò nà, mɛ́gↄ̃ kuu, ǹton tó tãmaa ma nɛro. 
Ǹ ma sɛ́ musu lɛ mà bↄ aafia, ma wɛ́ɛ égↄ̃ pɛ́ n yãdannɛnanↄa. 
Nɛɛ̀ gí gbɛ̃ kɛ̀ aↄ̃ zã̀ n yãdannɛnaanↄzi, aↄ̃ mↄnafikikɛna nɛ́ pãmɛ. 
Nɛɛ̀ anduna zaakɛrinↄ kwɛ́ɛ lán mↄ̀gbↄ̃ bà, beee yãnzin má ye n yãnↄzizi. 
Ma mɛ̀ è fɛɛ n vĩa yãnzi, n dokayãnↄↄ naasi vĩmɛ. 
Ma yã kɛ̀ a zɛ́a súusu, ǹton ma tó ma wɛ́ɛtãmmarinↄnɛro. 
Ǹ kpɛ́gaau sɛ́ mamↄma n zↄ̀blerinɛ lɛ mà bↄ maa, ǹton tó wadadeenↄ wɛ́ɛ tãmaro. 
Ma wɛ́ɛ dↄ n mìsinazi ai ma kpasa, má sↄ̃kpa n lɛ́gbɛ̃na maaazi. 
Ǹ yã kɛmɛ n gbɛ̃kɛɛ guu, ǹ n yãdannɛnanↄ da mamↄma n zↄ̀blerinɛ. 
N zↄ̀blerin ma ũ, ǹ ma gba làakari lɛ mà n yãnↄ dↄ̀rↄ dↄ̃. 
Yãkɛna gurↄↄ kà, Dii, zaakɛ wèe bↄↄ n doka kpɛɛ. 
Má ye n yãdiɛnanↄzi dɛ vurala, baa vura baasana. 
Má è n ↄdↄkii maa, beee yãnzin sãsãna zɛ́ píngi è kɛmɛrozi. 
N yãnↄↄ dɛmɛ yãbↄnsaɛ ũ, beee yãnzin má kũna ma swɛ̃̀nzi. 
N yã bↄkↄ̃tɛna è guu puńnɛ, è nↄ̀sɛdodeenↄ gba làakari. 
Ma lɛ́ aɛna, mɛ́ɛ wesaa boo fɛ̀kuufɛkuu, zaakɛ n dokayãnↄ nii e ma dɛɛ. 
Ǹ aɛ dↄma ǹ sùu kɛmao, lán nɛɛ̀ kɛ gbɛ̃ kɛ̀ aↄ̃ↄ ye n tↄ́zinↄnɛ nà. 
Ǹ ma da zɛ́a lán ń ò nà, ǹton tó yã zaa ke kí blemaro. 
Ǹ ma bↄ gbɛ̃ takiikɛrinↄ ↄzĩ lɛ mà n ↄdↄkii gwa. 
Ǹ uu were mamↄma n zↄ̀bleria, ǹ tó mà n yãdannɛnanↄ dↄ̃. 
Wɛ́ɛ'i e plaa ma wɛ́ɛn kɛ̀ wà n doka kũnaro yãnzi. 
Dii, ń maa, n dokayãnↄↄ zɛ́ vĩ. 
N n yãnↄ dìɛ a zɛ́a, aↄ̃ náanɛ vĩ maamaa. 
Ma ibɛɛnↄ sã̀ n yãn, ben aↄ̃ yã ma kũ gbãa maamaa. 
Wà n yã yↄ̃̀ wà gwà à see ke vĩro, mamↄma n zↄ̀bleri, má yezi maamaa. 
Pↄ́ken ma ũro, wè kya kámagu, baa kↄ̃n beeeo n ↄdↄkii è sãmaguro. 
N yãmaakɛna yãana vĩro, n doka yãpuraa vĩ. 
Nawɛ̃a kↄ̃n yã'ↄ̃ammao ma le, mↄde n yãdiɛnanↄn ma pↄnnaa ũ. 
N yãnↄↄ maa gurↄ píngi, ǹ ma gba làakari lɛ màgↄ̃ kuu. 
Mɛɛ̀ n sísi kↄ̃n nↄ̀sɛo do Dii, ǹ wemala, mɛ́gↄ̃ n yãdiɛnanↄ kũna. 
Mɛɛ̀ wiipɛnzi ǹ ma mì sí, mɛ́gↄ̃ n yãnↄ kũna. 
Mɛɛ̀ fɛɛ idɛ'idɛ mà wii pɛ́nzi, n yãn ma wɛ́ɛ dↄzi. 
Ii è na ma wɛ́ɛn gwãavĩro lɛ mà e mà laasuu lɛ́ n yãa yãnzi. 
Ǹ ma yã ma n gbɛ̃kɛ yãnzi, Dii, ǹ ma wɛ̃̀ndi dãkpa lán n yãzɛdekɛɛ dɛ nà. 
Gbɛ̃ kɛ̀ aↄ̃è lɛ́ kpaakↄ̃sↄ̃maziinↄↄ kĩimao, mↄde aↄ̃ↄ zã̀ kↄ̃n n dokao. 
Ń kĩimao Dii, n yãdiɛnanↄ píngi yãpuraa vĩ. 
Zaa gìkɛna má dↄ̃̀ n yãnↄa kɛ̀ ń dìɛ àgↄ̃ kuu gurↄ píngi. 
Ǹ ma nawɛ̃akɛna gwa ǹ ma mì sí, zaakɛ n doka e sãmaguro. 
Ǹ zɛmao ǹ ma bo, ǹ ma wɛ̃̀ndi dãkpa lán n à lɛ́ gbɛ̃̀ nà. 
N mìsina zã̀ kↄ̃n zaakɛrinↄ, zaakɛ aↄ̃è n yãdannɛnanↄ wɛtɛro. 
N wɛ̃ndaa bíta, Dii, ǹ ma wɛ̃̀ndi dãkpa lán n yãzɛdekɛɛ dɛ nà. 
Ma ibɛɛ kɛ̀ aↄ̃è wɛ́ɛ tãmaanↄↄ pari, mↄde mɛ́ɛ zã n yãnↄaro. 
Má ye n náanɛsaideenↄ kãziro, kɛ̀ aↄ̃ↄ n yã kũnaro yãnzi. 
Ǹ gwa lán má ye n ↄdↄkiizi nà. Dii, ǹ ma wɛ̃̀ndi dãkpa n gbɛ̃kɛɛ yãnzi. 
N yã píngipingi nɛ́ yãpuraamɛ, n dokayãnↄↄ maa aↄ̃ↄ yãana vĩro. 
Gbãadeenↄ è wɛ́ɛ tãma pã, mↄde n yã vĩa è ma kũ. 
Mɛɛ̀ pↄnnaa kɛ kↄ̃n n lɛ́gbɛ̃nao, lán ma auziki bíta sɛ̀ɛ zĩ̀ guu bà. 
Ma za mↄnafikin, má ye à yãziro, n dokan má yezi. 
Mɛɛ̀gↄ̃ n táaki lɛɛ gurↄ do gɛ̃̀n swɛɛplaplaa kɛ̀ n dokayãnↄↄ maa yãnzi. 
Gbɛ̃ kɛ̀ aↄ̃ↄ ye n dokazinↄ aafia bíta, yãke è tó aↄ̃ furo. 
Ma wɛ́ɛ dↄzi ǹ ma mì sí, Dii, mɛɛ̀ tɛ́ n yãdiɛnanↄzi. 
Má n yãnↄ kũna, zaakɛ má yezi maamaa. 
Mɛɛ̀ n ↄdↄkii gwa mɛɛ̀ n yãnↄ ma, zaakɛ ma yãkɛna píngi kú n ↄzĩmɛ. 
Ǹ tó ma wiipɛna n kii le, Dii, ǹ ma gba làakari lán ń ò nà. 
Ǹ tó ma aduakɛna ká n kiia, ǹ ma mì sí lán n lɛ́ gbɛ̃̀ nà. 
N táakilɛna gↄ̃ da ma lɛ́n, zaakɛ nɛɛ̀ n yãdannɛnanↄ damɛ. 
Mɛ́ lɛ̀ sí n lɛ́gbɛ̃na musu, zaakɛ n yãdiɛnanↄↄ maa píngi. 
Ǹgↄ̃ kú soruo ǹ ↄ dↄmalɛ, zaakɛ ma zɛ kↄ̃n n ↄdↄkiio. 
Mɛ́ɛ à ni dɛɛ ǹ ma mì sí, Dii, n dokan ma pↄnnaa ũ. 
Ǹ tó màgↄ̃ kuu, mɛ́gↄ̃ n táaki lɛɛ, ǹ tó n dokayãnↄ gↄ̃ ma kũna. 
Ma kɛ̃ zɛ́a lán sãa kɛ̀ sã̀sã bà, ǹ mamↄma n zↄ̀bleri wɛtɛ, zaakɛ n yãdannɛnanↄↄ e sãmaguro. 
