﻿SAAMUNƆ.
115.
Èe kɛ wámbeero Dii, èe kɛ wámbeero, ḿbe ń dɛ wà n tↄ́ bↄ n gbɛ̃kɛ kↄ̃n n náanɛo yãnzi. 
À kɛ̀ dia boriinↄ è wa la wà be wa Ludaa kú mámɛ? 
Wa Ludaa kú musu, pↄ́ kɛ̀ à yezin è kɛ. 
Aↄ̃ ń tãanↄ pì kↄ̃n kondogio kↄ̃n vurao, gbɛ̃ntee ↄzĩimɛ. 
Aↄ̃ↄ lɛ́ vĩ, mↄde aↄ̃è yã oro, aↄ̃ↄ wɛ́ɛ vĩ, mↄde aↄ̃è guu ero. 
Aↄ̃ↄ swã vĩ, mↄde aↄ̃è yã maro, aↄ̃ↄ yĩ vĩ, mↄde aↄ̃è pↄ́ gũu maro. 
Aↄ̃ↄ ↄↄ vĩ, mↄde aↄ̃è pↄ́ kũro, aↄ̃ↄ gbá vĩ, mↄde aↄ̃è táa oro, aↄ̃è kòto kɛkɛro. 
Aↄ̃ pìrinↄↄ sɛ̃nkpɛńyomɛ kↄ̃n gbɛ̃ kɛ̀ aↄ̃ↄe ń náanɛ kɛɛnↄ ń píngi. 
Isarailinↄ, à Dii náanɛ kɛ! Àmbe a dↄnlɛri ũ kↄ̃n a sɛngbangoo. 
Aruna boriinↄ, à Dii náanɛ kɛ! Àmbe a dↄnlɛri ũ kↄ̃n a sɛngbangoo. 
Dii vĩakɛrinↄ, à Dii náanɛ kɛ! Àmbe a dↄnlɛri ũ kↄ̃n a sɛngbangoo. 
Dii dↄ̀ wa yãn, eé aubarika dawagu. Eé aubarika da Isaraili boriinↄn, eé aubarika da Aruna boriinↄn, 
eé aubarika da a vĩakɛrinↄn, nɛ́ féte gbɛ̃nsi. 
Dii a bori kↄ̃are, apinↄ kↄ̃n a nɛ́nↄ. 
Dii aubarika daagu, àmↄ kɛ̀ musu kↄ̃n tↄↄtɛo kɛ̀. 
Musu nɛ́ Dii pↄ́mɛ, mↄde à tↄↄtɛ nà gbɛ̃nteenↄnɛ ń ↄzĩ. 
Èe kɛ gɛ̀nↄ bé wè Dii táaki lɛ́ro, kesↄ̃ gbɛ̃ kɛ̀ aↄ̃ lɛ́ yĩtɛnↄ. 
Wámbe, wégↄ̃ Dii sáabu kpaa zaa tia ai gurↄ píngi. Aleluya! 
