﻿SAAMUNƆ.
109.
Dauda lɛ̀. Luda, ḿbe mɛɛ̀ n táaki lɛ́, ǹtongↄ̃ yĩtɛnaro. 
Zaakɛ gbɛ̃ zaa bↄnkpɛɛdeenↄ è ma yaka, aↄ̃è lɛ́ bↄ wà ɛgɛyã dima. 
Aↄ̃è ligamazi kↄ̃n zangu yão, aↄ̃è swèe kɛmao pↄ́ke wíwinnɛna sai. 
Aↄ̃è yenzi sↄkpamɛ kↄ̃n yãdimmanao, baa kɛ̀ mɛɛ̀ adua kɛńnɛ. 
Aↄ̃è à maaa fĩa bomɛ kↄ̃n à zaaao, yenzi sↄ̃, kↄ̃n zanguo. 
Ǹ Setãn swi kɛa, ǹ à kpakↄ̃zi kↄ̃n Ibilisio. 
Ǹ tó yãkpaɛ à ble, ǹ tó à aduakɛna kɛnɛ taari ũ. 
À wɛ̃̀ndi gↄ̃ kusu, gbɛ̃ pãnde gↄ̃ à gɛ̃ɛ ũ. 
À nɛ́nↄ gↄ̃ de sai, à naↄ̃ gↄ̃ gyaanↄↄ ũ. 
À nɛ́nↄ gↄ̃ likↄ̃azↄ̃rinↄ ũ wàgↄ̃ baa kɛɛ, wàgↄ̃ ń kpakɛɛ ń bɛ zĩnↄ guu. 
À fĩadee à pↄ́nↄ nakↄ̃a píngi, gbɛ̃ zĩ̀tↄnↄ à zĩ àre ble. 
Gbɛ̃ke tón gbɛ̃kɛɛ kɛnɛro, wàton à nɛ́ kɛ̀ à tònↄ wɛ̃nda boro. 
À boriinↄ kaatɛ, aↄ̃ tↄ́ tóngↄ̃ kú borii kɛ̀ aↄ̃é fɛɛnↄ tɛ́ro. 
À dezinↄ zaakɛna yã gↄ̃ dↄ Diin, ǹton tó à da durun kɛ̃a zikiro. 
Aↄ̃ durun gↄ̃ dↄn Diin, aↄ̃ yã sã gbɛ̃nↄn anduna guu. 
Zaakɛ èe dↄn à gbɛ̃kɛɛ kɛ gbɛ̃kenɛro, è wɛ́ɛ tã takaasideenↄa kↄ̃n wɛ̃ndadeenↄ kↄ̃n pↄsiadeenↄo ai gɛ̀wãan. 
À ye sa zaa onnɛnazi, ǹ tó à wí à musu. Sa maa onnɛna è kánɛro, ǹ tó aubarika kɛo zã̀. 
À lɛ́kɛnnɛna dà lán uta bà, à à mɛ̀ yàku lán í bà, à gɛ̃̀ à wánↄn lán nↄ́si bà. 
Kana pì gↄ̃ daàla lán uta bà, àgↄ̃ dↄ à pii lán asaa bà. 
Dii fĩa bo ma yãdimmarinↄnɛ lɛ kↄ̃n gbɛ̃ kɛ̀ aↄ̃è yã zaaa o ma musunↄo. 
Dii Gbãapingide, ǹ ma wɛ̃nda gwa n tↄ́ yãnzi, ǹ ma bↄ n maakɛ kↄ̃n n gbɛ̃kɛɛo yãnzi. 
Zaakɛ takaaside wɛ̃ndadeen ma ũ, ma pↄↄ yàka búgubugu. 
Mɛ́ɛ gɛ̃tɛɛ lán uusiɛ ↄra bà, má dɛ lán kwaa kɛ̀ ĩa e sɛɛ bà. 
Lɛ́yina tò ma gbá è sí sɛ́ dↄro, ma yãyã ma gↄ̃ wↄ̀ↄzↄgↄ. 
Ma gↄ̃ yáadↄzipↄ ũ ma yãdimmarinↄnɛ, aↄ̃è ma gwa wà mì gbãkɛ. 
Ǹ dↄmalɛ, Dii ma Luda, ǹ ma mì sí n gbɛ̃kɛ yãnzi, 
lɛ aↄ̃ dↄ̃ kɛ̀ n ↄↄ bé à kɛ̀, ḿbe Dii, n kɛnamɛ. 
Baa tó aↄ̃ ma ka, nɛ́ aubarika damagu, tó aↄ̃ fɛ̀ɛmazi, wí é ń kũ, mapi n zↄ̀bleri mɛ́ pↄnnaa kɛ. 
Tↄ́ zaaa gↄ̃ ma yãdimmarinↄnɛ uta ũ, aↄ̃ wí da ń zĩndaa lán gumusu bà. 
Mɛ́ Dii sáabu kpá kↄ̃n kòto gbãaao, mɛ́ à táaki lɛ́ pari kakↄ̃ana guu. 
Zaakɛ è zɛ kↄ̃n wɛ̃ndadeenↄ, è ń sí gbɛ̃ kɛ̀ aↄ̃è yã vɛ̃ɛḿmanↄa. 
