﻿SAAMUNƆ.
107.
À Dii sáabu kɛ, zaakɛ à maa, à gbɛ̃kɛɛ yãana vĩro. 
Gbɛ̃ kɛ̀ Dii ń bónↄ o lɛ, gbɛ̃ kɛ̀ à ń bↄ́ ń ibɛɛnↄ ↄzĩnↄ. 
Gbɛ̃ kɛ̀ à ń bↄ́ bùsu kↄ̃n bùsuo à ń kakↄ̃a bↄna ↄfãntɛ̃bↄɛ kpa kↄ̃n a gɛ̃kpɛn kpaao kↄ̃n gu'igbãroo kpaao kↄ̃n sↄↄmɛtɛ kpaaonↄ. 
Aↄ̃ gbɛ̃kenↄ likↄ̃aa zↄ̃̀ gbáan, aↄ̃ↄe wɛ́tɛ kɛ̀ weé gá vɛ̃ɛn zɛ́ dↄ̃ro. 
Nↄaa ń dɛ́, ímii ń dɛ́, aↄ̃ wɛ̃̀ndi suuna kɛ̀. 
Ben aↄ̃ wii pɛ̀ Diizi ń nawɛ̃akɛnan, ben à ń bↄ́ ń wɛ́ɛtãmma guu. 
À ń dá zɛ́ súusun ai aↄ̃ kà wɛ́tɛ kɛ̀ aↄ̃é vɛ̃ɛn. 
Wà Dii sáabu kɛ à gbɛ̃kɛ yãnzi kↄ̃n yãbↄnsaɛ kɛ̀ è kɛ gbɛ̃nↄnɛo. 
Zaakɛ è ímidɛrinↄ kòto yĩi kũńnɛ, è pↄ́ maaa kpá nↄadɛrinↄa aↄ̃ kã. 
Aↄ̃ gbɛ̃kenↄ kú ga gusisin, aↄ̃ↄe nawɛ̃a kɛɛ yina kↄ̃n mↄ̀kyakooo. 
Zaakɛ aↄ̃ gì Luda yã mazi, aↄ̃ kya kà Luda Musude lɛ́damman. 
À tò wà ń busa kↄ̃n zĩ gbãaao, aↄ̃ gɛ̃̀n sì wà lɛ̀ɛ, dↄnlɛri kuuro. 
Ben aↄ̃ wii pɛ̀ Diizi ń nawɛ̃akɛna guu, ben à ń bↄ́ ń wɛ́ɛtãmma guu. 
À ń bↄ́ ga gusisin, à ń mↄ̀kyakoonↄ gà à kɛ̃̀kɛ̃. 
Wà Dii sáabu kɛ à gbɛ̃kɛ yãnzi kↄ̃n yãbↄnsaɛ kɛ̀ è kɛ gbɛ̃nↄnɛo. 
Zaakɛ è bĩilɛ gbà kɛ̀ wà pì kↄ̃n mↄ̀gotɛ̃o gboro, è mↄ̀si gbãnganↄ ɛ́'ɛ. 
Aↄ̃ gbɛ̃kenↄ lìkↄ̃a ń swãgbãa yãnzi, aↄ̃ wɛ́ɛtãmma è ń taarinↄ yãnzi. 
Pↄ́blee nii bↄ̀ ń pↄↄn, aↄ̃ kà gana. 
Ben aↄ̃ wii pɛ̀ Diizi ń nawɛ̃akɛnan, ben à ń bↄ́ ń wɛ́ɛtãmma guu. 
À a yã zĩ̀ḿma, ben aↄ̃ kɛ̃̀kↄ̃a, à ń bↄ́ gaa lɛ́zĩ. 
Wà Dii sáabu kɛ a gbɛ̃kɛ yãnzi kↄ̃n yãbↄnsaɛ kɛ̀ è kɛ gbɛ̃nↄnɛo. 
Wà kɛnnakↄ̃o saa oa, wà à yãkɛnanↄ tↄ̃kɛ̃ kↄ̃n gudakɛnao. 
Aↄ̃ gbɛ̃kenↄ dà ísiaala góro guu, aↄ̃ↄe laa taa í bíta pìla. 
Aↄ̃ Dii yãkɛnanↄ è, kↄ̃n yãbↄnsaɛ kɛ̀ è kɛ í dagulanↄo. 
À yã ò, ben zàga'ĩa gbãaa kàka, ísiaa sↄ̃ fɛ̀ɛ musumusu. 
Aↄ̃ↄe fɛɛɛ musu, wèe suu gĩzĩ, aↄ̃ↄ kú kari lɛ́zĩ, ben swɛ̃̀ kɛ̃̀ńgu. 
Gó nìgãnigãńyo, aↄ̃ tàtaatataa bò lán wɛ̃dɛri bà, ítɛ'ↄ̃ndↄ̃ píngi yã̀aḿma. 
Ben aↄ̃ wii lɛ̀ Diizi ń nawɛ̃akɛnan, ben à ń bↄ́ ń wɛ́ɛtãmma guu. 
À ĩa gbãaa zɛ̀, à gↄ̃̀ ĩa fɛɛɛ ũ, à ísↄ̃ kpàɛ, ben í zɛ̀ kítikiti. 
Kɛ̀ guu yĩ̀, aↄ̃ pↄↄ kɛ̀ nna, ben à gàańyo íkparɛ kɛ̀ aↄ̃ↄ yezi. 
Wà Dii sáabu kɛ à gbɛ̃kɛɛ yãnzi kↄ̃n yãbↄnsaɛ kɛ̀ è kɛ gbɛ̃nↄnɛo. 
Wà à tↄ́ bↄ pari kakↄ̃ana guu, wà à táaki lɛ́ dↄn'aɛdeenↄ kakↄ̃anan. 
À swa ídeenↄ lìɛ gbáa ũ, à tò íbↄkiinↄ gↄ̃̀ gukori ũ. 
À tↄↄtɛ aubarikadee lì gu wìsidee ũ gbɛ̃ kɛ̀ aↄ̃ↄ vɛ̃ɛnↄ yãzaakɛna yãnzi. 
À gbáa lì sɛ̀bɛ ũ, à tò gukori gↄ̃̀ íbↄkiinↄ ũ. 
À nↄadɛrinↄ kàɛ gwe, ben aↄ̃ wɛ́tɛ kàɛ wà vɛ̃̀ɛn. 
Aↄ̃ burapↄnↄ tↄ̃̀, aↄ̃ geepi línↄ bà, ben à nɛ́ ìńnɛ maamaa. 
À aubarika dàńgu, aↄ̃ pari kũ̀ maamaa, èe tó aↄ̃ pↄ́kãdeenↄ làgoro. 
Ben à ń lago dↄ, aↄ̃ bùsa gbãamↄnnɛna kↄ̃n mↄ́nzio kↄ̃n pↄsiaao yãnzi. 
À wí dà wɛ̃ɛnɛnↄa, à tò aↄ̃ likↄ̃aa zↄ̃̀ gukori zɛ́saidee guu. 
Mↄde à wɛ̃ndadeenↄ bↄ̀ takaasikɛɛn à ń sɛ́ lezĩ, à tò aↄ̃ ua kↄ̃̀ lán kpàsapↄnↄ bà. 
Tó gbɛ̃ maaanↄↄ è, aↄ̃è pↄnnaa kɛ, gbɛ̃ zaaanↄ sↄ̃ è ń lɛ́ nakↄ̃a. 
Ɔ̃ndↄ̃dee làakari dↄ yã pìnↄa, à Dii gbɛ̃kɛɛ gwa lán à dɛ nà. 
