﻿SAAMUNƆ.
106.
Aleluya! À Dii sáabu kɛ, zaakɛ à maa, à gbɛ̃kɛɛ yãana vĩro. 
Dé bé eé fↄ̃ à Dii yãbitakɛnanↄ oo? Dé bé eé fↄ̃ à à táaki lɛ́ píngii? 
Aubarikadeenↄn gbɛ̃ kɛ̀ aↄ̃è yã kɛ a zɛ́anↄ ũ, kɛ̀ aↄ̃è yã maaa kɛ gurↄ píngi. 
Tó nɛ́ɛ à nnaa kɛɛ n gbɛ̃nↄnɛ, ǹ tó ma yã gↄ̃ dↄngu, Dii, tó nɛ́ɛ ń mì sii, ǹ ma wɛ́ɛ gwa, 
lɛ ma baka e àgↄ̃ kú n gbɛ̃nↄ nnamanan, mà pↄnnaa kɛ kↄ̃n borii kɛ̀ n ń sɛ́nↄ, lɛ mɛ́ n táaki lɛ́ n gbɛ̃ pìnↄ tɛ́. 
Wa durun kɛ̀ lán wa dezinↄ bà, wa taari kɛ̀ wa yã zaaa kɛ̀. 
Kɛ̀ wa dezinↄ kú Igipiti, aↄ̃ↄe Dii dabuyãkɛnanↄ yã daro, gbɛ̃kɛyã parii kɛ̀ à kɛ̀ńnɛnↄ sã̀ńgu, ben aↄ̃ swãgbãaa kɛ̀ Isia Tɛ̃aa saɛ. 
Baa kↄ̃n beeeo à ń mì sì a tↄ́ yãnzi, lɛ à à gbãa bíta ↄdↄa. 
À kpã̀kɛ̃ Isia Tɛ̃aazi, ben gukori bↄ̀, à gɛ̃̀ńyo à wɛ̀ɛn, aↄ̃ bikũ̀ lán wà be gbáan bà. 
À ń bↄ́ ń ibɛɛnↄ ↄzĩ, à ń sí ń zangurinↄ gbãaaa. 
Í dà ń wɛdɛrinↄla, baa aↄ̃ gbɛ̃ mɛ̀n do èe bↄro. 
Ben aↄ̃ à yã kɛ̀ à ò sì, aↄ̃ à táaki lɛ̀. 
Mↄde à yãkɛnanↄ sã̀ńgu gↄ̃ↄ, ben aↄ̃ↄe zɛ lɛ à lɛ́ daḿmaro. 
Aↄ̃ pↄ́ble pãnde ni dɛ̀ gbáan, ben aↄ̃ Dii yↄ̃̀ wà gwà sɛ̃̀tɛ gwe. 
À pↄ́ kɛ̀ aↄ̃ wɛ́ɛ kɛ̀a kpàḿma, ben à mɛ̀'ibabagyãa zĩ̀ḿma. 
Aↄ̃ nↄ̀sɛgↄ̃aanↄ kpà kↄ̃n Musao bùran kↄ̃n Aruna kɛ̀ kú adona Diinɛo. 
Tↄↄtɛ pàra à Datani mↄ̀, à sìkↄ̃rɛ Abiramua kↄ̃n a gbɛ̃nↄ. 
Tɛ́ fɛ̀ɛ aↄ̃ ìbanↄ tɛ́, tɛ́nɛnɛ gbɛ̃ zaaanↄ blè. 
Aↄ̃ mↄ̀ pì zaa Orɛbu lán zùswaree bà, aↄ̃ dↄnzi kɛ̀ ń tãa kɛ̀ aↄ̃ↄ pìnɛ. 
Aↄ̃ Luda Gakuide lendee kpà kↄ̃n zù sɛ̃̀sori takao. 
Aↄ̃ sã̀ Luda ń mìsiri yãn, kɛ̀ à yã bítanↄ kɛ̀ńnɛ zaa Igipiti, 
kɛ̀ à dabuyãnↄ kɛ̀ Hamu boriinↄ bùsun, kɛ̀ à naasiyãnↄ kɛ̀ Isia Tɛ̃aazi. 
Beee yãnzin à bè é a gbɛ̃nↄ kaatɛ, ben Musa kɛ̀ à à sɛ̀ kpànɛ, à tò à pↄↄ kpàɛ, èe gàa à ń kaatɛro. 
Aↄ̃ kya kà bùsu nidee mↄ̀n, aↄ̃ gì Dii yã náanɛ kɛzi. 
Aↄ̃ yãbuu tã̀ ń bisakutaanↄ guu, aↄ̃ↄe dↄ Dii yãziro. 
Ben à ↄ dↄ̀ à la dàńnɛ à bè, é tó aↄ̃ gaga gbáan, 
é tó aↄ̃ boriinↄ gaga boriinↄ tɛ́, é ń fãakↄ̃a bùsunↄ guu. 
Aↄ̃ dↄ̀ Peo tãazi, aↄ̃ pↄ́ kɛ̀ wà saa òo pↄ́gɛnↄa blè. 
Aↄ̃ yãkɛnanↄ Dii pↄↄ fɛ̃̀, ben gagyãa sìńgu. 
Finɛasi fɛ̀ɛ à yã pì mì zↄ̃̀, ben gyãa pì zɛ̀. 
Ben Dii tò yã bↄ̀o nna, à bà kúo ai à boriia. 
Aↄ̃ Dii pↄↄ fɛ̃̀ Mɛriba í kiia, ben yã bↄ̀ Musao zaa aↄ̃ yãnzi. 
Zaakɛ aↄ̃ à nↄ̀sɛ yàka, ben à yã ò laasuulɛna sai. 
Aↄ̃ↄe bùsu pì deenↄ kaatɛ lán Dii dìɛńnɛ nàro. 
Aↄ̃ yã̀kↄ̃tɛ kↄ̃n borii pìnↄ, aↄ̃ ń fɛɛakaara zɛ́kpaɛ sɛ̀. 
Aↄ̃ dↄ̀ ń tãanↄzi, ben yã pì gↄ̃̀ńnɛ takutɛɛ ũ. 
Aↄ̃ ń nɛ́gↄ̃gbɛ̃nↄ kɛ̀ sa'opↄ ũ, aↄ̃ saa ò tãanↄa kↄ̃n ń nɛ́nↄgbɛ̃nↄo. 
Aↄ̃ taarisaideenↄ kòto kpàkpa, aↄ̃ nɛ́gↄ̃gbɛ̃nↄ kↄ̃n ń nɛ́nↄgbɛ̃ pìnↄ. Aↄ̃ saa òńyo Kanaa bùsu tãanↄa, ben aↄ̃ bùsu pì gbãsĩ kɛ̀. 
Aↄ̃ gbãsĩ lɛ̀ ń yãkɛnanↄ yãnzi, aↄ̃ gↄ̃̀ náanɛsaideenↄ ũ ń yãkɛnanↄa. 
Ben Dii pↄfɛ̃ fɛ̀ɛńzi, à ye gbɛ̃ kɛ̀ à ń sɛ́nↄ kãzi dↄro. 
À ń ná boriinↄnɛ ń ↄzĩ, ben aↄ̃ zangurinↄ kí blè ń musu. 
Aↄ̃ ibɛɛnↄ gbãaa mↄ̀ńnɛ, aↄ̃ ↄ tↄ̃̀ḿma. 
Ègↄ̃ ń bↄↄ gɛ̃̀n baaagↄ̃, mↄde aↄ̃ zɛ̀ kↄ̃n ń swãgbãakɛnao, ben aↄ̃ sↄ̃̀ɛ ń durun yãnzi. 
Baa kↄ̃n beeeo tó à ń wiii mà, è ń nawɛ̃akɛna yã da. 
Aↄ̃ yãnzi è dↄ a bà kuunańyo yãn, è a nↄ̀sɛ liɛ a gbɛ̃kɛ bíta yãnzi. 
À tò gbɛ̃ kɛ̀ aↄ̃ ń kũkũ zĩ̀zↄ ũunↄ ń wɛ̃nda gwà. 
Dii wa Luda, ǹ wa mì sí! Ǹ wa bↄɛ boriinↄ tɛ́ ǹ wa kakↄ̃a, lɛ wà n tↄ́ kɛ̀ kú adona bↄ wà ĩa dã kↄ̃n n táakilɛnao. 
Aubarikade Dii, Isarailinↄ Luda zaa káaku ai gurↄ píngi! Gbɛ̃ píngi be aami! Aleluya! 
