﻿SAAMUNƆ.
105.
À Dii sáabu kɛ à à tↄ́ kpá, à tó boriinↄ à yãkɛnanↄ dↄ̃. 
À lɛ̀ sí à à táaki lɛ́, à à yãbↄnsaɛkɛnanↄ tↄ̃kɛ̃ píngi. 
À ĩa dã kↄ̃n Dii tↄ́ kɛ̀ kú adonao, a Dii kiwɛtɛrinↄ à pↄnnaa kɛ, 
À Dii kii wɛtɛ à gbãaa wɛ́ɛ kɛa, àgↄ̃ à uu wɛtɛɛ yãana sai. 
À tó yãbↄnsaɛ kɛ̀ à kɛ̀nↄ dↄagu, à dabuyãkɛnanↄ kↄ̃n à yãkpaɛkɛnanↄo, 
a Dii zↄ̀bleri Ibraĩ boriinↄ, a Yakubu borii kɛ̀ à a sɛɛnↄ. 
Àmbe Dii wa Luda ũ, à yãkpaɛkɛna kú anduna guu píngi. 
À bà kuunawao yã è sãn zikiro, yã kɛ̀ à dìɛ égↄ̃ kuu ai wa boriia. 
À bà kú kↄ̃n Ibraĩo, à ɛ̀ara à sì kↄ̃n a kuunao Isaakunɛ dↄ. 
À yã pì pàpa Yakubunɛ dokayã ũ, ben à kú kↄ̃n Isarailinↄo ai gurↄ píngi. 
À bè é Kanaa bùsu kpáḿma, eégↄ̃ dɛ ń baka ũ kɛ̀ aↄ̃gↄ̃ vĩ. 
Gurↄↄ beeea aↄ̃ↄ pariro, wè ń yã daro, aↄ̃ↄ kú Kanaa bùsun bↄ̀amↄnↄ ũmɛ. 
Aↄ̃ègↄ̃ likↄ̃aa zↄ̃ↄ bori kↄ̃n boriionↄ tɛ́, aↄ̃ègↄ̃ lili oo bùsu kↄ̃n bùsuo. 
Èe we wà gbãaa mↄ̀ńnɛro, à kpã̀kɛ̃ kínanↄzi aↄ̃ yã musu à bè, 
aↄ̃ton ↄ na gbɛ̃ kɛ̀ a ń sɛ́nↄaro, aↄ̃ton wɛ́ɛ tã a annabinↄaro. 
Ben à tò nↄaa gɛ̃̀ bùsu pìn, à tò aↄ̃ kũsãɛ yã̀a píngi. 
Ben à Yusufu gbàrɛ à dↄ̀ńnɛ ń aɛ, wà à yà zↄ̀ ũ. 
Wà mↄ̀kyakoo kà à gbáa, wà mↄ̀ dà à waalɛ 
ai yã kɛ̀ à gĩakɛ à ò gàa à pàpao, ben yã kɛ̀ Dii dànɛ tò yã bↄ̀o nna. 
Kɛ̀ kína gbɛ̃ zĩ̀, ben wà à gbàrɛ, bùsu gbɛ̃nsi pì à bↄ̀ bàn. 
À à dìɛ a bùsu dↄn'aɛdee ũ, à tò à iko vĩ a auzikinↄa píngi. 
Yusufu à kínɛnↄ tòto a pↄyezia, à ↄ̃ndↄ̃ↄ dàda à ìbanↄnɛ. 
Ben Yakubu sù Igipiti, Isarailinↄↄ kuu nibↄnↄ ũ Hamu boriinↄ bùsun. 
Dii tò a gbɛ̃nↄ kↄ̃̀ gwe maamaa, à tò aↄ̃ pari kũ̀ dɛ ń ibɛɛnↄla. 
À ń ibɛɛ pìnↄ swã gbã̀gbãńnɛ, ben aↄ̃ zà à gbɛ̃nↄn, aↄ̃ ↄ̃ndↄ̃ↄ kɛ̀ à zↄ̀blerinↄzi. 
À a zↄ̀bleri Musa zĩ̀ḿma kↄ̃n Aruna kɛ̀ à à sɛ̀o. 
Aↄ̃ dabudabuyãnↄ kɛ̀ Igipitinↄnɛ, aↄ̃ yãbↄnsaɛnↄ kɛ̀ Hamu boriinↄ bùsun. 
À gusiaa gbàrɛḿma, guu sì ń bùsun, kɛ̀ aↄ̃ gì à yã mazi yãnzi. 
À ń ínↄ lì aru ũ, ben ń kpↄ̀nↄ gàga. 
Kasoonↄ dà ń bùsula kↄ̃n ń gbãadeenↄ daɛkiinↄ píngi. 
À yã ò, ben ifĩinↄ dàńla, gãinↄ sì ń tɛ́ ai aↄ̃ bùsu lɛ́n píngi. 
À lougbɛ kwɛ̀ɛńnɛ lou gɛ̃ɛ ũ, lapatana dà ń bùsula píngi. 
À ń geepi línↄ ɛ̀'ɛ kↄ̃n ń kãkãpura línↄ, à ń bùsu línↄ kɛ̀ dúgudugu. 
À yã ò, ben kwaanↄ kàńgu, sutɛ̃nↄ kà aↄ̃ lɛ́ vĩro. 
Aↄ̃ ń bùsu sɛ̃̀ kↄ̃n láo blè wà nɛ̀, aↄ̃ ń burapↄnↄ blè píngi. 
À ń bùsu daudunↄ dɛ̀dɛ ń píngi, ń nɛ́ daudu kɛ̀ aↄ̃ↄ ì ń ↄ̀wazikɛgurↄↄnↄ. 
À bↄ̀ kↄ̃n Isarailinↄ, aↄ̃ kondogi kↄ̃n vurao sɛna, aↄ̃ bori gbɛ̃kee e gɛ̃̀n sí zɛ́nlo. 
Kɛ̀ aↄ̃ bↄ̀ɛ, Igipitinↄ pↄↄ kɛ̀ nna, kɛ̀ vĩa ń kũ Isarailinↄ yã musu. 
À tɛ́luguu dà a gbɛ̃nↄla, à kɛ̀ tɛ́ ũ gwãavĩ à guu pùńnɛ. 
Aↄ̃ wɛ́ɛ kɛ̀a, ben à mↄ̀ńnɛ kↄ̃n bùrunↄ, à musu pↄ́blee kpàḿma, aↄ̃ mↄ̀ḿma. 
À gbɛ̀si pàra, ben í bↄ̀n, í bàa lɛ̀ gbáan gwe lán swa'i bà. 
Zaakɛ à dↄ̀ lɛ́ kɛ̀ à gbɛ̃̀ a zↄ̀bleri Ibraĩnɛ yãn. 
À bↄ̀ kↄ̃n a gbɛ̃nↄ, aↄ̃ↄe pↄnnaa kɛɛ, gbɛ̃ kɛ̀ à ń sɛ́nↄↄ e guda kɛɛ. 
À boriinↄ bùsu kpàḿma, aↄ̃ zĩi kɛ̀ danↄ kɛ̀ àre blè, 
lɛ aↄ̃ e wàgↄ̃ à yãdiɛnanↄ kũna, aↄ̃ à dokayãnↄ da. Aleluya! 
