﻿SAAMUNƆ.
102.
Wɛ̃ndade gbãasaidee kɛ̀ èe a yã'ↄ̃ammanↄ bↄɛɛ Diinɛ aduakɛna. Dii, ǹ ma aduakɛna ma, ǹ tó ma wiii n kii le. 
Ǹton wɛ́ɛ gá ǹ zumɛ ma nawɛ̃akɛgurↄro, ǹ swã kpámazi, tó ma n sisi, ǹ wemala kpakpaa, 
Zaakɛ ma gurↄↄ e gɛ̃tɛɛ lán tɛ́sukpɛ bà, ma mɛ̀ e puusu bↄↄ lán tɛ́yↄ̃ bà. 
Ma nↄ̀sɛ yàka, ma gↄ̃ lán sɛ̃̀ kori bà, ma sã pↄ́bleyãn. 
Ma m̀bona gbãngbãn bé à tò ma gↄ̃ wákabaran ũ. 
Ma gↄ̃ lán gbáa tiongoo bà, lán bɛzĩ koroo bà. 
Ii è gɛ̃ ma wɛ́ɛnlo, ma gↄ̃ lán bãa kɛ̀ zↄ̃ kpɛ́ musu adoo bà. 
Ma ibɛɛnↄ ègↄ̃ ma sↄ̃sↄ̃ↄ gurↄ píngi, ma faborinↄ è gbɛ̃ ká kↄ̃n ma tↄ́o. 
Túbun mɛɛ̀ ble pↄ́blee ũ, ma wɛ́ɛ'i è ká ma íminan 
n pↄfɛ̃ kↄ̃n n pɛ̃tɛ̃o yãnzi, zaakɛ n ma sɛ n ma zĩnna. 
Ma gurↄↄ e gɛ̃tɛɛ lán ↄra bà, ben mɛ́ɛ gagaa lán sɛ̃̀ bà. 
Mpi sↄ̃ Dii, nɛɛ̀gↄ̃ kú kpatan gurↄ píngi, n tↄ́ é garo ai wa boriia. 
Nɛ́ fɛɛ ǹ Zayↄn wɛ̃nda gwa, zaakɛ gurↄↄ kà, gurↄↄ kɛ̀ ń dìɛ kà, kɛ̀ nɛ́ à pↄnnaa wɛtɛ. 
À gbɛ̀nↄ kɛ̀ n zↄ̀blerinↄnɛ maa, à gborona bùsu è kɛńnɛ wɛ̃nda. 
Bori píngi é vĩa kɛnnɛ, Dii, anduna kínanↄ é n kíkɛɛ dↄ̃ ń píngi. 
Zaakɛ Dii é Zayↄn kɛkɛ à bo dↄ, eé bↄ à mↄ́ḿma kↄ̃n gakuio. 
Eé takaasideenↄ aduakɛna sí, eé ń wɛ́ɛkɛna kpá swãkotoro. 
À tó yã kɛ̀ gↄ̃ kɛ̃na kpɛɛdeenↄ yãnzi lɛ gbɛ̃ kɛ̀ aↄ̃ kpɛ́nↄ Dii táaki lɛ́. 
Dii tↄↄtɛ gwà zaa a kúkiia, zaa musu à wɛ́ɛ kpàɛ gĩzĩ, 
lɛ à gbɛ̃nↄ zↄ̀blena wii ma à ń bↄ gaa lɛ́zĩ yãnzi, 
Weé Dii tↄ́ bↄ Zayↄn, weé à táaki lɛ́ Yerusalɛmu. 
zĩ kɛ̀ gbɛ̃nↄ é kↄ̃ kakↄ̃a gwe, kↄ̃n kpatablerinↄ wà dↄnzi kɛnɛ. 
À ma gbãaa bùsa zɛ́gbãn, à ma wɛ̃̀ndi kɛ̀ kusu, 
ben ma bè: Ma Luda, ǹton ma wɛ̃̀ndi bↄ gugbãnlo, mmↄn kɛ̀ ń kuu ai wa boriia. 
N anduna kãsãa pɛ̀ɛ zaa káaku, musu nɛ́ n ↄzĩimɛ. 
Aↄ̃ píngi é gɛ̃tɛ, mↄde nɛ́gↄ̃ kuu, aↄ̃é zi kũ lán pↄ́kãsãa bà, nɛ́ ń liɛ lán uta bà ǹ ń zĩnna. 
Mpi sↄ̃ n kuuna ègↄ̃ dↄ̃nkↄ̃, n gurↄↄ yãana vĩro. 
N zↄ̀blerinↄ nɛ́nↄ égↄ̃ kuu aafia, aↄ̃ boriinↄ é kãsãa pɛ́ɛ n kuu. 
