﻿SAAMUNƆ.
94.
Dii Luda gɛ̃ɛboḿmari, Luda gɛ̃ɛboḿmari, ǹ bↄ gupuraaa! 
Anduna yãkpaɛkɛri, ǹ fɛɛ, ǹ fĩa bo wadadeenↄnɛ ń yãkɛnaa. 
Gbɛ̃ zaaanↄ égↄ̃ ń zĩnda sɛɛ lezĩ ai bↄrɛmɛ? Ai bↄrɛmɛ, Dii? 
Zaakɛrinↄ è wada yã o, aↄ̃è yã bↄɛ aↄ̃è ĩa dã ń píngi. 
Dii, aↄ̃è n gbɛ̃nↄ dúgu zↄ̃, aↄ̃è gbãaa mↄ gbɛ̃ kɛ̀ n ń sɛ́nↄnɛ. 
Aↄ̃è gyaanↄnↄ kↄ̃n bↄ̀amↄnↄ dɛdɛ, aↄ̃è tonɛnↄ kaatɛ. 
Aↄ̃è be Dii e ń ero, Yakubu boriinↄ Luda làakari kúḿmaro. 
A yↄ̃nkↄↄnↄ, à làakari kɛ! A mìsaideenↄ, é ↄ̃ndↄ̃ kũ bↄrɛn yee? 
Luda bé à swã dↄ̀, eé gí yã maziↄ́? À wɛ́ɛ kɛ̀, eé gí guu eziↄ́? 
È boriinↄ tòto kɛ, eé gí ń swã gágaziↄ́? È yã dańnɛ, à dↄ̃na vĩnloo? 
Dii gbɛ̃ntee laasuu dↄ̃, kɛ̀ yã pãamɛ. 
Aubarikadeen gbɛ̃ kɛ̀ nɛɛ̀ tòto kɛ ǹ n doka danɛ ũ, Dii. 
Nɛɛ̀ à gba kámmabona nawɛ̃akɛgurↄ, ai wàgↄ̃ wɛ̀ɛ yↄ̃ zaakɛrinɛ. 
Dii é pã kpá a gbɛ̃nↄziro, eé gbɛ̃ kɛ̀ à ń sɛ́ a pↄ́ ũunↄ zĩnnaro. 
Weé ɛara wà yãkpaɛ kɛ a zɛ́a, nↄ̀sɛpuradeenↄ é zɛo. 
Dé bé eé fɛɛmɛ gbɛ̃ zaaanↄzi? Dé bé eé zɛmao zaakɛrinↄ yã musuu? 
Tó èe kɛ Dii dↄnlɛ kɛ̀mɛnlo, lɛ má kú miran kítikiti kↄ̀. 
Kɛ̀ ma bè gu zãɛ e ma sɛɛɛ, n ma kũ n gbɛ̃kɛɛ guu, Dii. 
Kɛ̀ laasuu ma swɛ̃̀ pà, n ma làakari kpàɛmɛ n ma pↄↄ kɛ̀ nna. 
N bà égↄ̃ kú kↄ̃n yãlɛkpɛɛgↄ̃gↄ̃rinↄ kpataoↄ́? Aↄ̃ yãdiɛnanↄ è mↄ́ńnɛ kↄ̃n nawɛ̃ao, 
Aↄ̃è lɛ́ kpakↄ̃sↄ̃ gbɛ̃ maaazi, aↄ̃è yã da taarisaideela wà à dɛ. 
Diin ma zɛki gbãaa ũ, ma Ludan gbɛ̀si kɛ̀ mɛɛ̀ utɛn ũ. 
Eé ń zaakɛna sↄkpaḿma, eé ń borii bↄ aↄ̃ taarinↄ yãnzi. Dii wa Luda é ń borii bↄ. 
