﻿SAAMUNƆ.
89.
Ɛzɛra bori Etani lɛ̀. Dii, mɛ́gↄ̃ lɛ̀ sii n gbɛ̃kɛ yã musu yãana sai, mɛ́gↄ̃ n náanɛkɛyã kpàakpa kɛɛ wɛ̃̀ kↄ̃n wɛ̃̀o. 
Mɛ́ o kɛ̀ n gbɛ̃kɛɛ yãana vĩro, n náanɛkɛɛ kãsãa pɛɛna n bɛ zaa musu. 
N bè: Ma bà kú kↄ̃n gbɛ̃ kɛ̀ má sɛ̀o, ma lɛ́ gbɛ̃̀ ma zↄ̀bleri Daudanɛ. 
Nɛ́ tó à borii gↄ̃ kí blee gurↄ píngi, nɛ́ à kpata gba gbãaa ai à boriia. 
Musudeenↄ è n dabuyãnↄ sáabu kpá, Dii, malaikanↄ è n náanɛkɛyã o ń kakↄ̃ana guu. 
Zaakɛ gbɛ̃kee kú musu kɛ̀ kà Dii ũro, malaika ke é sí lɛ́kↄ̃zioro. 
Luda vĩa è malaikanↄ kũ ń kakↄ̃anan, à naasi vĩ dɛ gbɛ̃ kɛ̀ aↄ̃ↄ ligazinↄla. 
Dii Luda Zĩ̀kpɛde, dé bé à sɛ̃nkpɛnyo? Ń gbãaa vĩ kↄ̃n náanɛo yã píngi guu. 
Nɛɛ̀ gbãaa mↄ ísiaanɛ, tó à sↄ̃ fɛ̀ɛ vĩvĩnao, nɛɛ̀ à gbãaa fↄ̃. 
N Igipitinↄ dúgu zↄ̃̀, aↄ̃ gↄ̃̀ gɛ̀nↄ ũ, n n zangurinↄ fã̀akↄ̃a kↄ̃n n gã̀sã gbãaao. 
Musu nɛ́ n pↄ́mɛ, tↄↄtɛ dↄ nɛ́ n pↄ́mɛ, n anduna kàɛ kↄ̃n pↄ́ kɛ̀ kú à guunↄ píngi. 
N gu'igbãro kↄ̃n sↄↄmɛtɛo kɛ̀, Tabo kↄ̃n Ɛmↄni gbɛ̀nↄ è guda kɛ kↄ̃n n tↄ́o. 
N gã̀sã nɛ́ gbãaa pↄ́mɛ, n ↄ gbãaa bensↄ̃ n ↄplaa dↄ musu. 
Maakɛ kↄ̃n yãzɛdekɛɛon n kpata kãsãa ũ, gbɛ̃kɛ kↄ̃n náanɛo bé à dↄnnɛ aɛ. 
Aubarikadeenↄn gbɛ̃ kɛ̀ aↄ̃ↄ gudadↄmmaanↄ ũ, kɛ̀ aↄ̃è táa o gupuraa kɛ̀ kú n kuunzi, Dii. 
Aↄ̃ègↄ̃ pↄnnaa kɛɛ kↄ̃n n tↄ́o gurↄ píngi, aↄ̃è ĩa dã kↄ̃n n maakɛɛo. 
Zaakɛ aↄ̃ gakui kↄ̃n ń gbãaaon n ũ, n zɛnawao è wa sɛ́ lezĩ. 
Wa kína nɛ́ Dii pↄ́mɛ, wa sɛngbango pì nɛ́ Isarailinↄ Luda pↄ́mɛ. 
N yã ò n yãmarinↄnɛ yã wɛ́ɛgupu'ena guu n bè: Ma dↄnlɛ kɛ̀ gↄ̃ gbãaanɛ, ma gↄ̃kparɛ sɛ̀ musu a gbɛ̃nↄ tɛ́. 
Ma a zↄ̀bleri Dauda è, ma a nↄ́si kùa ma à dìɛ. 
Mɛ́gↄ̃ à kũna ma ↄzĩ, ma gã̀sã gbãaa égↄ̃ kúo. 
Ibɛɛ ke é fↄ̃ à tángba síaro, gbɛ̃ zaa ke é e à ↄ tↄ̃aro. 
Mɛ́ à wɛdɛrinↄ ú lↄ́ à aɛ, mɛ́ à zangurinↄ nɛ. 
Mɛ́ gbɛ̃kɛɛ kɛɛnɛ kↄ̃n náanɛo, weé à sɛ́ lezĩ kↄ̃n ma tↄ́o. 
Mɛ́ ísiaa nanɛ a ↄzĩ, eégↄ̃ iko vĩ swaanↄa. 
Eé ma sísi à be, má dɛ a De ũ kↄ̃n a Ludao, a gbɛ̀si ũ kↄ̃n a mìsirio. 
Mɛ́ à kɛ ma daudu ũ, eégↄ̃ dɛ anduna kínanↄ mìdee ũ. 
Mɛ́gↄ̃ gbɛ̃kɛɛ vĩo gurↄ píngi, ma bà kɛ̀ kúo gborona vĩro. 
Mɛ́ tó à borii gↄ̃ kí blee gurↄ píngi, à kpata égↄ̃ kuu lán ludambɛɛ ègↄ̃ kuu nà. 
Tó à boriinↄ pã kpà ma dokazi, bensↄ̃ aↄ̃ↄe tɛ́ ma yãdiɛnanↄziro, 
tó aↄ̃ bↄ̀ ma yã kpɛɛ, bensↄ̃ aↄ̃ ma yãdannɛnanↄ kũnaro, 
mɛ́ gò tↄ̃ḿma ń taarinↄ yãnzi, mɛ́ ń kɛ búgubugu ń zaakɛna musu. 
Mↄde gbɛ̃kɛɛ kɛ̀ má vĩo é yãaro, mɛ́ fↄ̃ mà náanɛsaiyã kɛro. 
Mɛ́ ma bà kuunao yã gbororo, mɛ́ yã kɛ̀ bↄ̀ ma lɛ́n liɛro. 
Má sì kↄ̃n ma kuunao gɛ̃̀n do, mɛ́ ɛgɛɛ to Daudanɛro, kɛ̀ ma bè, 
à borii égↄ̃ kuu gurↄ píngi, à kpata égↄ̃ kuu ma wáa lán ↄfãntɛ̃ bà. 
Lán mↄvura dɛ sèeda náanɛdee ũ musu nà, lɛn à kpata égↄ̃ kuu gurↄ píngi lɛ. 
Baa kↄ̃n beeeo n gi kína kɛ̀ ń kàzi, n ↄ gbàrɛzi n pↄ fɛ̃̀zi maamaa. 
N n bà kuuna kↄ̃n n zↄ̀blerio yã gbòro, n kya kà à kífuran ń pã̀ɛ tↄↄtɛ. 
N à wɛ́tɛ bĩinↄ gbòro, n à zɛki gbãaanↄ gbɛ̃̀ ń dàɛ. 
Gbɛ̃ kɛ̀ aↄ̃ↄe gɛ̃ɛ zɛ́laanↄ ń baka bↄ̀n ń píngi, à gↄ̃̀ fabona pↄ́ ũ a bori daanↄnɛ. 
N à wɛdɛrinↄ gã̀ dↄ̀ musu, ń tò à ibɛɛnↄ pↄnnaa kɛ̀. 
N à fɛ̃ɛda gbãaa ɛ̀, nɛ́ɛ zɛo zĩ̀ guuro. 
N à kíkɛgo sìa, n à kíkpata lɛ́ kùɛ. 
Ń tò à zi kũ̀ a gbãaan, n wí dàa gumusu ũ. 
Dii, nɛ́gↄ̃ utɛnawe ai bↄrɛmɛ? N pↄfɛ̃ tɛ́ égↄ̃ kũu gurↄ píngin yↄ́? 
Ǹ laasuu lɛ́ ma wɛ̃̀ndi kusukɛɛa. N gbɛ̃ntee kɛ̀ pãn yↄ́? 
Dé bé eégↄ̃ kuu à gí gazii? Dé bé eé fↄ̃ à a zĩnda sí mira gbãaaa? 
Dii, gbɛ̃kɛɛ kɛ̀ ń vĩ yãa gàa mámɛ? N yenzi kɛ̀ ń à lɛ́ gbɛ̃̀ Daudanɛ kↄ̃n náanɛo sↄ̃ nɛ́? 
Ǹ tó n zↄ̀bleri fabona yã dↄngu, boriinↄ ma atafii kɛ̀ wà ma nↄ̀sɛ yàka. 
N ibɛɛnↄ kína kɛ̀ ń kà lalandi kɛ̀ ai guu kɛ̀ à kɛ̀sɛ pɛ̀ɛn, Dii. 
Aubarikadeen Dii ũ ai gurↄ píngi! Aami! Aami! 
