﻿SAAMUNƆ.
88.
Ɛzɛra bori Emani lɛ̀. Dii Luda ma Mìsiri, mɛ́ɛ wii pɛɛnzi fãantɛ̃ kↄ̃n gwãavĩo. 
Ǹ tó ma aduakɛna ká n kiia, ǹ swã kpá ma wiipɛnazi. 
Zaakɛ yã'ↄ̃amma ma nↄ̀sɛ pà, ma wɛ̃̀ndi kú gaa lɛ́zĩ. 
Wà ma da gbɛ̃ kɛ̀ aↄ̃ↄe sii gɛ̀wãannↄ tɛ́, ma gↄ̃ gbãasaidee ũ. 
Wà pã kpàmazi wà ma da gɛ̀nↄ tɛ́ lán gbɛ̃ kɛ̀ aↄ̃ↄ daɛna miran sↄ̀rↄrↄnↄ bà, lán gbɛ̃ kɛ̀ aↄ̃ yã dↄngu dↄro aↄ̃ bà kúnyo dↄroonↄ bà. 
N ma zu wɛ̀ɛ zã̀n ai tↄↄtɛ tú kokotɛ̃wɛɛ gusiaan. 
N pↄfɛ̃ tↄ̃̀ma, à ísↄ̃ dàmala. 
Ń tò ma gbɛ̃nↄ ma zĩnna, ń tò aↄ̃ↄ ye ma kãziro. Wà ma kagura kɛ̀, bↄkii kuuro, 
nawɛ̃a ma wɛ́ɛ sìsi. Mɛ́ɛ n sisii zaa kↄngↄ ai uusiɛ, ma ↄↄnↄↄ dↄnzi. 
Gɛ̀nↄn nɛɛ̀ yãbↄnsaɛ kɛńnɛↄ́? Gɛ̀wãadeenↄ bé wè fɛɛ wà n sáabu kpáↄ́? 
Wè n gbɛ̃kɛɛ tↄ̃kɛ̃ mira guun yↄ́? Wè n náanɛkɛyã o gɛ̀wãann yↄ́? 
Wà n dabuyãnↄ dↄ̃ gusiaa guun yↄ́? N maakɛnanↄ dↄ̃na kú yãsãngukii guun yↄ́? 
Dii, mɛ́ɛ wii pɛɛnzi, ma aduakɛna kↄngↄ è ká n kiia. 
Bↄ́yãnzin nɛ́ɛ giimazizi, Dii? À kɛ̀ dia n mìkpɛɛ zùmɛɛ? 
Má kú gaa lɛ́zĩ wɛ̃ndawɛ̃nda zaa ma gↄ̃kparɛkɛgurↄ, n yã pãsĩnↄ tↄ̃̀ma, ma gↄ̃ sã̀ii. 
N pↄfɛ̃namazii dàmala, n vĩapↄnↄ ma kaatɛ. 
Aↄ̃ dàmala lán í bà zaa kↄngↄ ai uusiɛ, aↄ̃ lìgamazi mámmam. 
Ń tò ma gbɛ̃nↄ kↄ̃n ma gbɛ̃nnanↄ ma zĩnna, gusiaa bé à gↄ̃̀ ma kpàasi ũ. 
