﻿SAAMUNƆ.
86.
Dauda lɛ̀. Dii, ǹ swã kpá ma yãzi ǹ wemala, zaakɛ takaaside wɛ̃ndadeen ma ũ. 
Ǹ ma wɛ̃̀ndi dãkpa, zaakɛ má a zĩnda kpàmma. Ǹ mamↄma n zↄ̀bleri mì sí, zaakɛ mɛ́ɛ n náanɛ kɛɛ. Ḿbe ma Luda ũ. 
Ǹ sùu kɛmao, Dii, zaakɛ mɛɛ̀gↄ̃ n sisii kↄngↄ kↄ̃n uusiɛo. 
Ǹ mamↄma n zↄ̀bleri pↄↄ kɛ nna, zaakɛ ma làakari tà n kiia, Dii. 
Ń maa bensↄ̃ ń sùu vĩ, Dii, n gbɛ̃kɛ bíta n sìsirinↄnɛ. 
Dii, ǹ swã kpá ma wɛ́ɛkɛnazi, ǹ làakari dↄ ma wɛ̃nda wiiia. 
Mɛ́ n sísi ma nawɛ̃akɛgurↄↄ zĩ, zaakɛ nɛɛ̀ wemala. 
Tãa ke é sí lɛ́kↄ̃zinyoro, Dii, gbɛ̃kee è fↄ̃ à n kɛna kɛro. 
Borii kɛ̀ ń kɛ̀nↄ é mↄ́ wà kúɛnnɛ, aↄ̃ n tↄ́ bↄ ń píngi. 
Zaakɛ ń bíta bensↄ̃ nɛɛ̀ dabuyãnↄ kɛ, ḿbe Luda ũ ndo. 
Ǹ n zɛ́ ↄdↄamɛ, Dii, mɛ́gↄ̃ táa oo n yãpuraa guu, ǹ ma laasuu kɛmɛ do, lɛ màgↄ̃ n vĩa vĩ. 
Mɛ́ n sáabu kpá kↄ̃n nↄ̀sɛo do, Dii ma Luda, mɛ́gↄ̃ n tↄ́ bↄↄ gurↄ píngi. 
Zaakɛ gbɛ̃kɛɛ kɛ̀ ń kɛ̀mɛɛ bíta, n ma wɛ̃̀ndi bↄ̀ gɛ̀wãa lↄ̀n. 
Luda, karambaanideenↄↄ e fɛɛɛmazi, gbɛ̃ pãsĩnↄↄ e ma wɛɛ, aↄ̃è n yã daro. 
N Dii, Luda sósobideen n ũ, ń sùu vĩ bensↄ̃ n pↄↄ è fɛ̃ kpaaro, n gbɛ̃kɛ kↄ̃n n náanɛo bíta. 
Ǹ aɛ dↄma ǹ ma wɛ̃nda gwa, ǹ n zↄ̀bleri gba gbãaa, ǹ mapi n zↄ̀nↄkpare nɛ́ mì sí. 
Ǹ yãmaakɛna gbɛ̀ ↄdↄamɛ lɛ ma zangurinↄ e, wí ń kũ, zaakɛ Dii, n dↄmalɛ, n ma làakari kpàɛmɛ. 
