﻿SAAMUNƆ.
83.
Asafa lɛ̀. Luda, ǹtongↄ̃ yĩtɛnaro, n lɛ́ tóngↄ̃ nakↄ̃anaro, ǹton zɛ sitiigiro, Luda. 
Ǹ n ibɛɛnↄ gwa lán aↄ̃ fɛ̀ɛ wà zɛ̀ nà, n zangurinↄↄ e ń mì zuzuu. 
Aↄ̃ↄe ↄ̃ndↄ̃ↄ kɛɛ n gbɛ̃nↄzi, aↄ̃ↄe lɛ́ kpaakↄ̃sↄ̃ n gbɛ̃ yenzideenↄzi. 
Aↄ̃ↄe bee: À mↄ́ wà ń borii bↄ, lɛ aↄ̃ tↄ́ Isaraili tóngↄ̃ dↄ gbɛ̃ken dↄro. 
Aↄ̃ lɛ́ kpàkↄ̃sↄ̃, aↄ̃ yã kↄ̃sɛ̀, aↄ̃ lɛdolɛ kɛ̀ kↄ̃o wà fɛɛnzi. 
Ɛdↄmunↄ kↄ̃n Sumaila boriinↄ kↄ̃n Mↄabunↄ kↄ̃n Agyara boriinↄ 
kↄ̃n Gebalideenↄ kↄ̃n Amↄninↄ kↄ̃n Amalɛkinↄ kↄ̃n Filisitininↄ kↄ̃n Tayadeenↄ. 
Baa se Asirianↄ nàḿma dↄ, lɛ aↄ̃ ↄ da Lutu boriinↄa. 
Ǹ kɛńnɛ lán ń kɛ̀ Midiãnↄnɛ nà, lán ń kɛ̀ Sisera kↄ̃n Yabĩonɛ nà Kisↄ̃zi. 
N ń kɛ́ dúgudugu Ɛndↄ, ben aↄ̃ gↄ̃̀ kaɛna tↄↄtɛ lán busa bà. 
Ǹ kɛ ń wɛ̃ɛnɛnↄnɛ lán wà kɛ̀ Orɛbu kↄ̃n Zeebuonɛ nà. Ǹ kɛ ń kínɛnↄnɛ lán wà kɛ̀ Zɛba kↄ̃n Zalamunaonɛ nà. 
Aↄ̃pinↄ bé wà bè yã, wà Luda sãdãkii sɛ́ ń pↄ́ ũ. 
Ma Luda, ǹ tó aↄ̃ gↄ̃ lán ĩampuu sɛ̃̀ bà lán ése ũkã kɛ̀ ĩa e sɛ́ɛɛ bà. 
Lán dàko è tɛ́ kũ nà, kesↄ̃ lán tɛ́ è kpiiinↄ ble nà, 
ǹ pɛ́ɛńzi kↄ̃n n zàga'ĩao, ǹ tó n ĩa pãsĩ swɛ̃̀ kɛ̃ńgu. 
Ǹ tó wí gɛ̃ ń wɛ́ɛn, lɛ aↄ̃ↄ n gbãaa dↄ̃ Dii. 
Wí égↄ̃ ń kũu gurↄ píngi kↄ̃n bídio, aↄ̃é bↄru kpɛɛ wà kaatɛ. 
Ǹ tó aↄ̃gↄ̃ dↄ̃ kɛ̀ n tↄ́n Dii, ḿbe Luda Musude ũ anduna guu píngi. 
