﻿SAAMUNƆ.
80.
Asafa lɛ̀. Ǹ swã kpá, Isarailinↄ Dↄn'aɛde, mmↄn kɛ̀ nɛɛ̀ Yusufu boriinↄ dã lán sãa bà. Ǹ bↄ ǹ mↄ́, mmↄn kɛ̀ ń vɛ̃ɛna kɛrubunↄ dagura, 
ǹ dↄ Ɛflaimu boriinↄnɛ aɛ kↄ̃n Bɛyãmi boriinↄ kↄ̃n Manase boriinↄ. Ǹ fɛɛ kↄ̃n n gbãaao, ǹ mↄ́ ǹ wa mì sí! 
Luda, ǹ tó wà ɛara wà su wa gwena ziin, ǹ uu werewa, ǹ wa mì sí. 
Dii Luda Zĩ̀kpɛde, nɛ́ fɛ̃ ǹ gí n gbɛ̃nↄ aduakɛna sízi ai bↄrɛmɛ? 
N wɛ́ɛ'i dↄ̀ńnɛ ń pↄ́mina ũ, n ń wɛ́ɛ'i yↄ̃̀ńnɛ à pↄ́ pà, aↄ̃ↄ mì. 
Ń tò wa gↄ̃ fabona pↄ́ ũ wa saɛdeenↄnɛ, wa ibɛɛnↄↄ e wa lalandi kɛɛ. 
Luda Zĩ̀kpɛde, ǹ tó wà su wa gwena ziia, ǹ uu werewa ǹ wà mì sí. 
N geepi lí wùrɛ Igipiti, n pɛ boriinↄa, ben ń lí pì pɛ̀ aↄ̃ gbɛ̀n. 
N guu kɛ̀kɛnɛ à kãsãa pɛ̀ɛ, ben à ↄ tà à guu sì. 
À ↄra dà kpiiinↄla, à gã̀nↄ dɛ sida lí bítanↄla. 
À ↄ tà à kà ai ísia lɛ́a, à ↄnɛnↄ kà ai Yuflatizi. 
Bↄ́yãnzin n à kara gbòrozi lɛ gbɛ̃ kɛ̀ aↄ̃ↄe gɛ̃tɛɛnↄ gↄ̃ ↄ maɛɛ à nɛ́zi? 
Kyàkpanↄ è lɛ́ kázi wà bi, nↄ̀bↄsɛ̃tɛnↄ è mↄ́ wà à lá ble. 
N yã nna! Luda Zĩ̀kpɛde, ǹ ɛara ǹ aɛ dↄwa! Zaa musu ǹ wɛ́ɛ kpáɛ ǹ gwa! Ǹ làakari dↄ geepi lí kɛ̀a, 
borii kɛ̀ ń pɛ̀ n zĩndaa, nɛ́ kɛ̀ ń sì n pↄ́ ũu pì. 
Wà n geepi lí pì zↄ̃̀, wà tɛ́ sↄ̃̀a, n wɛ́ɛ tɛ̃aa pìtiḿma, ben aↄ̃ↄe kaatɛɛ. 
Ǹ ↄ kúɛ gbɛ̃ kɛ̀ kú n ↄplaazia, gbɛ̃ntee nɛ́ kɛ̀ ń sɛ̀ n pↄ́ ũu pì, 
wé kɛ̃mma dↄro. Ǹ wa kuuna kɛkɛ ǹ kɛwe, wé n sísi. 
Dii Luda Zĩ̀kpɛde, ǹ tó wà su wa gwena ziia, ǹ uu werewa ǹ wa mì sí. 
