﻿SAAMUNƆ.
78.
Asafa lɛ̀. Ma gbɛ̃nↄ, à ma yãdannɛna ma, à swã kpá ma yãzi. 
Mɛ́ yã oare kↄ̃n yáasio, mɛ́ yã kɛ̀ utɛna zaa zii bↄkↄ̃tɛ kɛare, 
yã kɛ̀ wá mà bensↄ̃ wá dↄ̃, yã kɛ̀ wa denↄ tↄ̃kɛ̃̀wee. 
Wé yã pì utɛ wa nɛ́nↄnɛro, wé Dii táakilɛna da wa dionↄnɛ, à gbãaa kↄ̃n yãbↄnsaɛ kɛ̀ à kɛ̀nↄ. 
À yã dìɛ Yakubu boriinↄnɛ, à a doka dà Isarailinↄnɛ, à dìɛ wa dezinↄnɛ kɛ̀ aↄ̃ tó ń nɛ́nↄ gↄ̃ dↄ̃, 
lɛ à gↄ̃ ń borii kɛ̀ aↄ̃ kpɛ́nↄnɛ fɛɛakaarayã ũ, aↄ̃ gbasa wà fɛɛ wà dada ń nɛ́nↄnɛ se, 
lɛ aↄ̃ e wà Luda náanɛ kɛ, à yãkɛnanↄ tón sãńguro, mↄde aↄ̃égↄ̃ à yãdiɛnanↄ kũna. 
Aↄ̃gↄ̃ dɛ lán ń dezinↄ bàro, zaakɛ aↄ̃ swãgbãaa kɛ̀ aↄ̃ gì Luda yãzi, aↄ̃ swɛ̃̀ kú Ludaaro, aↄ̃ yãpuraa vĩnɛro. 
Ɛflaimu boriinↄ nɛ́ kàzurinↄmɛ, ben aↄ̃ bↄ̀ru kpɛɛ zĩ̀ guu. 
Aↄ̃ↄe zɛ kↄ̃n Luda bà kuunańyo yãoro, aↄ̃ gì tɛ́ à dokazizi. 
À yãkɛnanↄ sã̀ńgu kↄ̃n yãbↄnsaɛ kɛ̀ à ↄ̀dↄańnɛnↄ. 
À dabuyãnↄ kɛ̀ aↄ̃ dezinↄ wáa Zoã wɛ́tɛ guu, Igipiti bùsun. 
À ísiaa zↄ̃̀kↄ̃rɛ à bikũ̀ńyo, à tò í gↄ̃̀ zɛna lán bĩi bà. 
À dↄ̀ńnɛ aɛ tɛ́luguu guu fãantɛ̃, gwãavĩ sↄ̃ kↄ̃n tɛ́ gupuraao. 
À gbɛ̀si pàra gbáan, à í kpàḿma bíta lán ísia'i bà. 
À tò í bↄ̀ńnɛ gbɛ̀n, à tò í bàa lɛ̀ lán swadaa bà. 
Ben aↄ̃ↄ kpɛ́ wèe durun kɛɛnɛ, aↄ̃ gì Luda Musude yã mazi gbáan. 
Aↄ̃ Luda yↄ̃̀ wà gwà kↄ̃n nↄ̀sɛplaaao, aↄ̃ ń pↄyezi pↄ́blee gbèkaa. 
Aↄ̃ Luda zaa bò wà bè: Luda é fↄ̃ à wa gba pↄ́blee gbáan kɛ̀n yↄ́? 
Baa kɛ̀ à gbɛ̀ lɛ̀, í bↄ̀ à dàgula, eé fↄ̃ à pↄ́blee ke nↄ̀bↄ kpáwa dↄↄ́? 
Kɛ̀ Dii yã pì mà, à pↄ fɛ̃̀, ben tɛ́ fɛ̀ɛ à dà Yakubu boriinↄla, à pↄfɛ̃ pìta Isarailinↄa. 
Zaakɛ aↄ̃ↄe Luda yã síro, aↄ̃ↄe à mìsina gbãa náanɛ kɛro. 
Baa kↄ̃n beeeo à yã dìɛ bàtumanɛ, à musu zɛ́ wɛ̃̀, 
ben à mana kwɛ̀ɛńnɛ aↄ̃ↄ blè, à pↄ́blee kɛ̀ bↄ̀ musu kpàḿma. 
Aↄ̃ malaikanↄ pↄ́blee blè, à kũsãɛ kɛ̀ńnɛ, à gɛ̃̀ ↄla. 
À tò ĩa gbãaa bↄ̀ ↄfãntɛ̃bↄɛ kpa, à pɛ̀ sↄↄmɛtɛ kpa ĩaa dↄ kↄ̃n a gbãaao, 
ben à nↄ̀bↄ kwɛ̀ɛńnɛ pari lán lutɛ̃ bà, bãanↄ dàńla lán ísialɛ bùsu'ãatɛ̃ bà. 
À tò aↄ̃ pìtapita ń bùran, aↄ̃ gↄ̃̀ káɛ ligana ń kpɛ́nↄzi. 
Luda pↄ́ kɛ̀ aↄ̃ↄe à ni dɛɛnↄ kpàḿma, ben aↄ̃ↄ blè wà kã̀ gíngin. 
Lɛ à ni kpɛ́ à bↄńgu, gurↄↄ kɛ̀ pↄ́blee pì kpɛ́ da ń lɛ́n, 
Luda pↄfɛ̃ fɛ̀ɛńzi, à Isaraili gↄ̃ gbãaanↄ dɛ̀dɛ, à ń gↄ̃kparɛnↄ lɛ̀ à nɛ̀. 
Baa kↄ̃n beeeo aↄ̃ↄ kpɛ́ wèe durun kɛɛ, baa kↄ̃n à yãbↄnsaɛkɛnanↄ, aↄ̃ↄe à náanɛ kɛro. 
Ben à ń wɛ̃̀ndi kɛ̀ńnɛ pã lán lɛ́'ĩa bà, à tò mↄ́nzi ń lé. 
Tó à ń gbɛ̃kenↄ dɛ̀dɛ, ben aↄ̃è à kii wɛtɛ, aↄ̃è ɛara wà aɛ dↄa kↄ̃n wãaao. 
Ben aↄ̃ dↄ̀n sa kɛ̀ Ludan ń gbɛ̀si ũ, Luda Musudemɛ ń mìsiri ũ. 
Gurↄ mↄ̀a sa aↄ̃è lɛ́ maa, aↄ̃è ɛgɛɛ tonɛ, 
aↄ̃ swɛ̃̀ kúaro, aↄ̃ à bà kuunańyo yã gbòro. 
Àpi sↄ̃ ń wɛ̃nda gwà, à ń durun kɛ̃̀ńnɛ, èe ń kaatɛro. Ègↄ̃ a zĩnda pↄfɛ̃ kpaɛɛ baabↄrɛ, è a pɛ̃tɛ̃pitammana ↄzã gba. 
À ń gbɛ̃nteekɛɛ dↄ̃̀ḿma, kɛ̀ aↄ̃è gɛ̃tɛ suna sai lán ĩa bà. 
Aↄ̃ swãgbãaa kɛ̀nɛ gbáan gɛ̃̀n ũgbangba! Aↄ̃ à pↄↄ yàka sɛ̃̀tɛ gwe à kɛ̀ bíta. 
Aↄ̃ Luda yↄ̃̀ wà gwà, aↄ̃ Luda yↄ̃̀ wà gwà, aↄ̃ Isarailinↄ Luda kɛ̀ kú adona pↄↄ fɛ̃̀. 
À iko gbãaa sã̀ńgu, lán à ń sí ń ibɛɛnↄa nà, 
lán à dabuyãnↄ kɛ̀ Igipiti nà, bensↄ̃ à yãbↄnsaɛnↄ kɛ̀ Zoã bùsun. 
À ń swa ínↄ lì aru ũ, ben aↄ̃ↄe fↄ̃ wà à í mì dↄro. 
À ifĩinↄ kàńgu, aↄ̃ ń soso, kↄ̃n kasoonↄ dↄ, à mↄ́nzi kpàńzi. 
À tò kwaanↄ ń bura pↄ́wɛɛnↄ blè, à sutɛ̃nↄ kà ń burapↄnↄn. 
À tò lougbɛ ń geepi líkpɛnↄ kɛ̀ dúgudugu, zàga'ĩa ń kãkã línↄ ɛ̀'ɛ. 
À ń pↄ́kãdeenↄ kàatɛ kↄ̃n lougbɛo, laa pɛ̀ɛ ń kpàsanↄa. 
À a pↄfɛ̃ bíta bↄ̀bↄńzi, à kɛ̀ńyo ĩi kↄ̃n pↄfɛ̃o kↄ̃n pɛ̃tɛ̃o, à malaika kisiadeenↄ gbàrɛḿma. 
À a pↄfɛ̃ zɛ́ wɛ̃̀, èe gí gaanɛ dↄro, à gagyãa kàńgu. 
À Igipiti daudunↄ dɛ̀dɛ ń píngi, Hamu bori nɛ́gↄ̃gbɛ̃ káakunↄ gàga. 
Mↄde à bↄ̀ kↄ̃n a gbɛ̃nↄ lán sãanↄ bà, à dↄ̀ńnɛ aɛ gbáan lán sã kpàsanↄ bà. 
À tɛ́ńyo làakario kpáɛna vĩa sai, aↄ̃ ibɛɛnↄ sↄ̃, ísiaa dàńla. 
À kàńyo a bùsu lɛ́zi, gusĩsĩdee kɛ̀ à sì kↄ̃n a gbãaao pì. 
À pɛ̀ńnɛ boriinↄa, ben à ń bùsu kpàatɛtɛńnɛ ń pↄ́ ũ, à ua kpàkpa Isaraili boriinↄa. 
Ben aↄ̃ Luda yↄ̃̀ wà gwà aↄ̃ gì à yã mazi, aↄ̃ↄ Luda Musude yãdiɛnanↄ kũnaro. 
Aↄ̃ ɛ̀ara wà bↄ̀ à kpɛɛ lán ń denↄ bà, aↄ̃ náanɛ vĩro lán sá kotina bà. 
Aↄ̃ à pↄↄ fɛ̃̀ kↄ̃n ń sa'okiinↄo, aↄ̃ à nↄ̀sɛgↄ̃aanↄ fɛ̀ɛ kↄ̃n ń tãanↄ. 
Kɛ̀ Ludaa dↄ̃̀ lɛ, ben à pↄ fɛ̃̀, à gì Isarailinↄzi zaazaa. 
À a bisakutaa tò zaa Silo gwe, à bɛɛ kɛ̀ à dↄ̀ gbɛ̃nteenↄ tɛ́ pì. 
À tò aↄ̃ wɛdɛrinↄ mↄ̀ wà a àkpati sɛ̀, àmbe à gbãa kↄ̃n à gakuibↄkiio ũ. 
À tò wà a gbɛ̃nↄ dɛ̀dɛ kↄ̃n fɛ̃ɛdaao, à pↄ fɛ̃̀ borii kɛ̀ ń sɛ́zi. 
Aↄ̃ gↄ̃kparɛnↄ tɛ́ kũ̀ zĩ̀ guu, aↄ̃ nↄkparɛnↄↄ e e wà zãkɛlɛ sì dↄro. 
Wà ń sa'orinↄ dɛ̀dɛ kↄ̃n fɛ̃ɛdaao, aↄ̃ gyaanↄnↄↄ e fↄ̃ wà ↄ́ↄ dↄ̀ro. 
Ben Dii fɛ̀ɛ sa lán i'ori bà, lán gↄ̃sa kɛ̀ vù kↄ̃n wɛ̃'iio bà. 
À ń wɛdɛrinↄ gbɛ̃̀, aↄ̃ bↄ̀ru kpɛɛ, à tò aↄ̃ gↄ̃̀ kↄ̃n wíyão gurↄ píngi. 
À gì Ɛflaimu boriinↄzi, èe Yusufu borii pì sɛ́ dↄro. 
Yuda boriin à sɛ̀ sa kↄ̃n Zayↄn kpiii kɛ̀ à yezio. 
À a kúkii bò musumusu gwe, eégↄ̃ kuu gurↄ píngi lán anduna kaɛna bà. 
Ben à a zↄ̀bleri Dauda sɛ̀, à à bↄ̀ sãkpasan. 
À à bↄ̀ sãdãn, à dↄ̀ Isarailinↄnɛ aɛ, Luda gbɛ̃ Yakubu boriinↄ kínamɛ. 
Dauda ń kpá a kpɛɛ kↄ̃n nↄ̀sɛo do, à dↄ̀ńnɛ aɛ kↄ̃n a ↄ aubarikadeeo. 
