﻿SAAMUNƆ.
76.
Asafa lɛ̀. Wè sí kↄ̃n mↄrↄnↄo. Wà Luda dↄ̃ Yuda bùsummɛ, à tↄ́ bíta Isarailinↄ tɛ́. 
À bisakutaa kú Salɛmu, à kúkii kú Zayↄn. 
Zaa gwen à kà wãaanↄ ɛ̀'ɛn kↄ̃n sɛngbangonↄ kↄ̃n fɛ̃ɛdaanↄ kↄ̃n zĩ̀kabↄnↄo. 
Nɛɛ̀ guu pu nɛɛ̀gↄ̃ tɛ́ kɛɛ, n bítakɛɛ dɛ kpiii kɛ̀ aↄ̃ kuu gurↄ pínginↄla. 
N kùgbãadeenↄ gbãaa sìḿma, aↄ̃ↄ daɛna kↄ̃n ga'iio, gↄ̃ gbãaa pìnↄ dokee e fↄ̃ à a ↄↄ sɛ̀ro. 
Yakubu Luda, n kpãkɛ̃ńzi, ben sↄ̃nↄ kↄ̃n ń sↄ̃goronↄ gↄ̃̀ kaɛna. 
Ḿbe ń naasi vĩ ndo, tó n pↄ́ bↄ̀ n yĩzĩ, dé bé eé fↄ̃ à zɛ n aɛɛ? 
Zaa musu n yãkpaɛ kɛ̀, vĩa anduna kũ̀, à yĩ̀tɛ kítikiti, 
zĩ kɛ̀ Luda, n fɛɛ ǹ yã gↄ̃gↄ̃ andunanɛ lɛ ǹ gbãasaideenↄ mì sí. 
N pↄfɛ̃na gbɛ̃nↄzi è n tↄ́ bↄ, n pↄfɛ̃ kpaaa ègↄ̃ dↄ n pii. 
À lù sɛ́ Dii a Ludanɛ à à fĩa bo. Amↄa kɛ̀ á ligawaziinↄ, à mↄ́ à Luda kɛ̀ dɛ wàgↄ̃ à vĩa vĩi gba pↄ́. 
È kpatablerinↄ kã busa, è tó vĩa anduna kínanↄ kũ. 
