﻿SAAMUNƆ.
69.
Dauda lɛ̀. Luda, ǹ ma mì sí, zaakɛ í ma kũ ma waalɛ. 
Foo e ma mↄↄ ma ka zã̀, kɛ̀sɛpɛkii kuuro, ma kpaɛ í lↄ̀n, ísↄ̃ e ma blee. 
Ma wii lɛ̀ ma kpasa, ma kòto nàɛ, ma wɛ́ɛ dↄ̀ ma Ludazi ai ma wɛ́ɛ kɛ̀ yↄ̀ↄↄ. 
Gbɛ̃ kɛ̀ aↄ̃ zàmagu pãanↄↄ pari dɛ ma mìkãnↄla. Ma ibɛɛnↄↄ lɛ́ vĩro, aↄ̃ↄ yezi wà ma dɛ pↄ́ke wíńnɛ sai. Pↄ́ kɛ̀ mɛ́ɛ à kpãi oroon aↄ̃ bè mà i mà kpáḿma. 
Luda, ń ma yↄ̃nkↄyãnↄ dↄ̃, ma taarinↄↄ utɛnannɛro. 
Dii Luda Zĩ̀kpɛde, gbɛ̃ kɛ̀ aↄ̃ wɛ́ɛ dↄnziinↄ ǹton tó wí ń kũ ma yãnziro. Isarailinↄ Luda, gbɛ̃ kɛ̀ aↄ̃è n kii wɛtɛnↄ ǹton tó aↄ̃ tↄ́ yaka ma yãnziro. 
Zaakɛ n yãnzin mɛ́ɛ mɛnaa kↄ̃n sↄ̃sↄ̃ozi, ben wí gɛ̃̀ ma wɛ́ɛn 
Ma gↄ̃ gbɛ̃ zĩ̀tↄ ũ ma gbɛ̃nↄ tɛ́, ma gↄ̃ gbɛ̃ miradodee ũ ma da bɛdeenↄ tɛ́. 
N ua yã ma kũ gbãa maamaa, gbɛ̃nↄ dↄkɛnanyo gↄ̃̀mɛ. 
Tó ma lɛ́ yì pↄsiaa guu, wègↄ̃ ma sↄ̃sↄ̃ↄ. 
Tó ma pↄsia utanↄ fĩ̀fĩma, wègↄ̃ ma faboomɛ. 
Gbɛ̃ kɛ̀ aↄ̃ↄ vɛ̃ɛna gãalɛnↄ è ma pe, ígbãamirinↄ è lɛ̀ damao. 
Mↄde tó à gↄ̃̀ ma yãnzi, Dii, ḿbe mɛ́gↄ̃ wɛ́ɛ kɛɛmma a gurↄↄa. Ǹ wemala Luda n gbɛ̃kɛ bíta yãnzi, ǹ ma mì sí yãpura. 
Ǹ ma bↄ foon, ǹton tó mà vlɛ̃ɛnlo. Ǹ ma bↄ í lↄ̀n, ǹ ma sí ma zangurinↄa. 
Ǹton tó ísↄ̃ ma blero, ǹton tó mà kpáɛ í lↄ̀nlo, ǹton tó wɛ̀ɛ tatamalɛro. 
Ǹ wemala Dii, zaakɛ n gbɛ̃kɛɛ maa, ǹ aɛ dↄma n sùu bíta guu. 
Ǹton mìkpɛɛ zu n zↄ̀blerinɛro, ǹ wemala kpakpaa, zaakɛ ma gↄ̃ kagurakɛna. 
Ǹ sↄ̃mazi ǹ ma mì sí, ǹ ma faaba kɛ ma ibɛɛnↄ yãnzi. 
Ń ma sↄ̃sↄ̃na dↄ̃ kↄ̃n ma wídammao kↄ̃n ma kpɛbↄnao, nɛ́ɛ gbɛ̃ kɛ̀ aↄ̃ↄ ma kũna yãonↄ ee. 
Sↄ̃sↄ̃na ma swɛ̃̀ zↄ̃̀, ma gↄ̃ gbãaa sai, gbɛ̃ kɛ̀ eé ma wɛ̃nda gwaan má wɛ̀tɛ, mɛ́ɛ ero, gbɛ̃ kɛ̀ eé ma nↄ̀sɛ kpáɛmɛɛn ma wɛ́ɛ dↄ̀zi, à kuuro. 
Aↄ̃ ɛ̃zɛ̃ zaaa kàmɛ pↄ́bleen, kɛ̀ ímii ma dɛ, aↄ̃ wɛ̃ kpã̀kpãa kpàma ma mi. 
Aↄ̃ zĩbaakɛna gↄ̃ńnɛ takutɛɛ ũ à ń kũ à yã lúńnɛ. 
Aↄ̃ wɛ́ɛ sisi lɛ aↄ̃ton guu ero, aↄ̃ wó gↄ̃ kokona. 
Ǹ n pɛ̃tɛ̃ pitaḿma, ǹ n pↄfɛ̃ pãsĩ pisiḿma. 
Aↄ̃ bɛɛ gↄ̃ bɛzĩ ũmɛ, aↄ̃ gbɛ̃ke tóngↄ̃ kuu lɛ à vɛ̃ɛ ń kpɛ́n dↄro. 
Zaakɛ aↄ̃è wɛ́ɛ tã gbɛ̃ kɛ̀ n ń lɛ́nↄa, aↄ̃è gbɛ̃ kɛ̀ n ń kari kɛ̀nↄ wãwã yã o. 
Ǹ ń yã píngi taari dińnɛ, aↄ̃ baka tóngↄ̃ kú n mìsina guuro. 
Ǹ ń tↄ́ gogo wɛ̃̀ndi takada guu, lɛ aↄ̃ tↄ́ tóngↄ̃ kú kↄ̃n gbɛ̃ maaanↄ tↄ́oro. 
Luda, má kú wãwãa guu kↄ̃n yã'ↄ̃ammao, ǹ ma sɛ́ lezĩ lɛ mà bↄ aafia. 
Mɛ́ Luda tↄ́ bↄ lɛ̀sina guu, mɛ́ à sáabu kɛ mà à tↄ́ sɛ́ lezĩ. 
Beee é ká Diinɛ dɛ sa'ona kↄ̃n zùola, baa zùsware kobadee. 
Takaasideenↄ é e aↄ̃ pↄnnaa kɛ, a Luda kiwɛtɛrinↄ égↄ̃ wɛ̃̀ndi vĩ. 
Zaakɛ Dii è wɛ̃ndadeenↄ yã ma, è kya ká a gbɛ̃ kɛ̀ aↄ̃ↄ dɛ zĩ̀zↄ ũunↄnlo. 
À à táaki lɛ́ musu kↄ̃n tↄↄtɛo, ísia kↄ̃n pↄ́ kɛ̀ kú à guunↄ píngi. 
Zaakɛ Luda é Zayↄn mì sí, eé ɛara à Yuda wɛ́tɛnↄ káɛ, à gbɛ̃nↄ é vɛ̃ɛn ń pↄ́ ũ. 
À zↄ̀bleri nɛ́nↄ bé wégↄ̃ vĩ, gbɛ̃ kɛ̀ aↄ̃ↄ ye à tↄ́ nnaazinↄ égↄ̃ kún. 
