﻿SAAMUNƆ.
55.
Dauda lɛ̀. Wè sí kↄ̃n mↄrↄnↄmɛ. Luda, ǹ ma aduakɛna ma, ǹton lá kú ma yãlaro. 
Ǹ swã kpá ma yãzi ǹ wemala, ma laasuu ma likↄ̃a ma gↄ̃ bídi guu 
ma ibɛɛnↄ yã'ona yãnzi kↄ̃n gbɛ̃ zaaanↄ wɛ́ɛbiimanao, zaakɛ aↄ̃ↄe ĩa daama, aↄ̃ↄ ma kũna kↄ̃n pↄfɛ̃o. 
Swɛ̃̀ kɛ̃̀magu, ga vĩa gɛ̃̀magu. 
Vĩa ma kũ, mɛ́ɛ lugalugaa, ma ninii dà batan. 
Tó má dɛ̀bɛ vĩ lán pↄ̃tɛ̃ɛ bà, lɛ mɛ́ vĩa mà gá kámma bo, 
mɛ́ bàa lɛ́ mà gá zã̀azã, mɛ́ gá mà vɛ̃ɛ gbáan. 
Mɛ́ wã mà gá mà utɛkii wɛtɛ, lɛ zàga'ĩa gbãaa tón ma lero yãnzi. 
Ǹ ń yã gboro, Dii, ǹ ń yã yãkↄ̃tɛńnɛ, zaakɛ má è zↄka kↄ̃n swèeo kú wɛ́tɛ guu. 
Aↄ̃è kpáɛ kɛ bĩi musu fãantɛ̃ kↄ̃n gwãavĩo, yã zaa kↄ̃n yã gbãaao di wɛ́tɛ guu. 
Gbɛ̃dɛdɛyã bé à wɛ́tɛ pì pà, gbãamↄnnɛna kↄ̃n mↄnafikio è kɛ̃ à gãalɛro. 
Tó ma ibɛɛ bé èe ma sↄ̃sↄ̃ↄ yã, mɛ́ mɛna, tó ma zanguri bé à fɛ̀ɛmazi, mɛ́ utɛnɛ. 
Mↄde ḿbeee, mmↄn kɛ̀ wá sáa, ma gbɛ̃ndoo, ma gbɛ̃nna! 
Weè fàadi bo kↄ̃o yã nnanna, weègↄ̃ tɛ́kↄ̃zi parii tɛ́ Luda ua. 
Gaa é zãmba kɛ ma ibɛɛnↄnɛ, aↄ̃é si gɛ̀wãan ń gbãagurↄ, zaakɛ zaaa vɛ̃ɛkii è ń guu. 
Mapi sↄ̃, mɛɛ̀ Luda sísi, Dii è ma mì sí. 
Kↄngↄ, fãantɛ̃ kↄ̃n uusiɛo mɛɛ̀gↄ̃ ma yã'ↄ̃ammanↄ bↄɛɛnɛ kↄ̃n m̀bnao, bensↄ̃ è ma yã ma. 
Baa kɛ̀ ma ibɛɛnↄↄ pari, è ma sí à ma bↄ swèen aafia. 
Luda ègↄ̃ vɛ̃ɛna kpatan gurↄ píngi, eé ma yã ma, eé wí daḿma, zaakɛ aↄ̃è ń dà liɛro, aↄ̃ↄ Luda vĩa vĩro. 
Ma gbɛ̃ pì swèe kɛ̀ kↄ̃n a gbɛ̃nↄo, à bↄ̀ lɛdolɛ kɛ̀ aↄ̃ↄ kɛ̀ kↄ̃o kpɛɛ. 
È yã nnaa o lán zↄ́ bà, mↄde swèe laasuu kú à swɛ̃̀n. È lɛ́nnaa kásańnɛ páipai, mↄde yáadↄmma bà da à bↄ̀kↄmmɛ. 
Ǹ n yã'ↄ̃ammanↄ tó Diinɛ, eégↄ̃ n kũna, è tó gbɛ̃ maaa fu zikiro. 
Gbɛ̃dɛri náanɛsaideenↄ é ń gurↄ dagura lero, Luda, nɛ́ tó aↄ̃ si gɛ̀wãa tùtuwɛɛn. Mapi sↄ̃, mɛ́gↄ̃ n náanɛ kɛɛ. 
