﻿SAAMUNƆ.
50.
Asafa lɛ̀. Dii Luda Gbãapingidee e yã oo, èe lɛ́ zuu anduna gbɛ̃nↄzi zaa ↄfãntɛ̃bↄɛ kpa ai à gɛ̃kii kpa. 
Luda gakui e bii Zayↄn, wɛ́tɛ kɛ̀ à maakɛɛ papana. 
Wa Ludaa e mↄↄ, eégↄ̃ yĩtɛnaro. Tɛ́ kɛ̀ è ń blee kú à aɛ, zàga'ĩa pãsĩ ligazi. 
Èe musudeenↄ kↄ̃n tↄↄtɛdeenↄ sisii lɛ à e à yãkpaɛ kɛ kↄ̃n a gbɛ̃nↄ. 
À bè: À ma yãmarinↄ kakↄ̃amɛ, gbɛ̃ kɛ̀ ma bà kúńyo sa'ona gãzĩnↄ. 
Ludan yãkpaɛkɛri ũ, musudeenↄ è à yãkɛna a zɛ́a kpàakpa kɛ. 
À ma, ma gbɛ̃nↄ, má yã vĩ mà oare, Isarailinↄ, mɛ́ a bↄbↄ a dàn, mámbe Luda a Luda ũ. 
Mɛ́ɛ kpãkɛ̃ɛazi a sa'ona yãnziro, ke sa'opↄ kɛ̀ eègↄ̃ kaa tɛ́n à tɛ́ kũ baa bↄrɛ. 
Má zùswaree kɛ̀ kú a kpàsan nii vĩro, ke blè kɛ̀ kú a kara guu, 
Zaakɛ nↄ̀bↄsɛ̃tɛnↄ nɛ́ ma pↄ́nↄmɛ kↄ̃n pↄ́kãde kpàsa kɛ̀ aↄ̃ↄ kú sĩ̀sĩ pariinↄ musuo. 
Má kpii musu bãanↄ dↄ̃ píngi, sɛ̃̀tɛ pↄ́ ketenↄↄ kuu ma pↄ́ ũmɛ. 
Tó nↄaa e ma dɛɛ, mɛ́ oarero, zaakɛ má anduna vĩ kↄ̃n à pↄ́ kɛ̀ kunnↄ píngi. 
Mɛɛ̀ zùsware nↄ̀bↄ són yↄ́? Mɛɛ̀ blèkofĩi aru min yↄ́? 
À saa oma kɛ̃nnakↄ̃o pↄ́ ũ, à lù kɛ̀ á sɛ̀ ma Luda Musudea fĩa bo. 
À ma sísi nawɛ̃akɛgurↄ, mɛ́ a bↄ, é bɛ̀ɛ límɛ. 
Ben Luda bè zaakɛrinↄnɛ: À kɛ̀ dia ée ma yãdiɛnanↄ dↄdↄↄ, bↄ́yãnzin ma bà kuunańyo yã da a lɛ́nzi? 
Á ye ma yãdannɛziro, a ma yãnↄ kpà kpɛɛ. 
Tó a kpãi è, eè à kɛ a gbɛ̃nna ũmɛ, bensↄ̃ eègↄ̃ kaakↄ̃a kↄ̃n zinakɛrinↄ. 
A lɛ́gbɛ zaa, eè lɛ́nnaa kásańnɛ. 
Eègↄ̃ a gbɛ̃ndoo pee, eè a da nɛ́ ɛgɛ bo. 
A yã beeenↄ kɛ̀, ben má yĩtɛna. Ée daa má dɛ lán a bàmɛ, mↄde mɛ́ kpãkɛ̃azi mà a bↄbↄ a dàn. 
Amↄa kɛ̀ ma yã sã̀aguunↄ, à yã pì ma. Tó lɛn sↄ̃ro, mɛ́ a kɛ gyáigyai, gbɛ̃ke é fↄ̃ à a símaro. 
Gbɛ̃ kɛ̀ kɛnnakↄ̃o saa òmaa bɛ̀ɛ lìmɛ, èe ma gba zɛ́ mà ↄdↄaare lán mɛɛ̀ gbɛ̃nↄ mì sí nà. 
