﻿SAAMUNƆ.
44.
Kora boriinↄ lɛ̀. Luda, yã kɛ̀ ń kɛ̀ zaa gìkɛna wa dezinↄ gurↄ, aↄ̃ↄ òwe wa swã mà. 
N ↄ yĩ̀pa bori pãndenↄzi n ĩa dàḿma, n wa dezinↄ kàɛ ń gbɛ̀n, n ń kaara aↄ̃ dàgula. 
Aↄ̃ fɛ̃ɛdaa bé à ń ká bùsu kɛ̀aro, aↄ̃ gã̀sã gbãaan aↄ̃ zĩ̀ blèoro. N zĩnda gã̀sã gbãaa bé à tò, n aɛ dↄ̀ḿma kɛ̀ ń yeńzi yãnzi. 
Ḿbe ma Kína ũ ma Luda, nɛɛ̀ tó Yakubu boriinↄ zĩ̀ ble. 
N gãzĩn weè ↄ yĩpa wa ibɛɛnↄzi, kↄ̃n n tↄ́on weè wa zangurinↄ dúgu zↄ̃. 
Èe kɛ má sá náanɛkɛnanlo, èe kɛ ma fɛ̃ɛdaa bé è ma bↄro. 
Zaakɛ ḿbe nɛɛ̀ wa sí wa ibɛɛnↄa, nɛɛ̀ wí da wa zangurinↄa. 
Luda, weègↄ̃ n sáabu kpaa gurↄ píngi, weègↄ̃ n tↄ́ kpaa yãana sai. 
Baa kↄ̃n beeeo n giwazi ń tò wí wa kũ, nɛɛ̀ bↄ kↄ̃n wa zĩ̀kpɛɛnↄ dↄro. 
Ń tò wa bↄru kpɛɛ wa ibɛɛnↄnɛ, ń tò wa zangurinↄ wa pↄ́nↄ nàkↄ̃a. 
N ń gbá zɛ́ aↄ̃ wa dɛdɛ lán sãanↄ bà, n wa fãakↄ̃a boriinↄ tɛ́. 
N n gbɛ̃nↄ yà aaga, nɛ́ɛ àre e à guuro. 
Ń tò wa gbɛ̃daaanↄ wa sↄ̃sↄ̃, gbɛ̃ kɛ̀ aↄ̃ↄ kú wa saɛnↄ wa lalandi kɛ̀. 
Ń tò wa gↄ̃ pena pↄ́ ũ boriinↄnɛ, gbɛ̃nↄ è ń mì kɛ degũdegũ wa yãnzi. 
Mɛɛ̀gↄ̃ kú kↄ̃n wíyão gurↄ píngi, wí ègↄ̃ kú ma wɛ́ɛn 
ma faborinↄ kↄ̃n ma sↄ̃̀sↄ̃rinↄ yãnzi kↄ̃n ma ibɛɛ kɛ̀ aↄ̃ↄ yezi wà gɛ̃ɛ bomaanↄ yão. 
Beee wa le píngi, baa kɛ̀ n yã e sãwaguro, wée n bà kuunawao yã gbororo. 
Wa laasuu e kɛ̃mmaro, wée kɛ̃ n zɛ́aro. 
N wa wiwi, n wa bùsu kɛ̀ gbɛ̃ngboonↄ tɛ́kii ũ, n gusia níginigi dàwala. 
Tó wa Dii tↄ́ sã̀wagu yã, ke tó wa wɛ́ɛ dↄ̀ bori zĩ̀tↄnↄ tãazi, 
Luda é gí eziↄ́? Zaakɛ àmbe à wa nↄ̀sɛguuyãnↄ dↄ̃ píngi. 
N yãnzi wá kú gaa lɛ́zĩzi zaa kↄngↄ ai uusiɛ, wè wa diɛ lán sãa kɛ̀ weé ń kòto kpánↄ bà. 
Ǹ vu Dii! À kɛ̀ dia nɛ́ɛ ii oo? Ǹ fɛɛ! Ǹton gíwazi gurↄ píngiro. 
À kɛ̀ dia n mìkpɛɛ zùwee? Wa wɛ̃ndakɛ kↄ̃n gbãaa kɛ̀ wèe mↄↄweeo sã̀ngun yↄ́? 
Wa gↄ̃ yina bùsutin, wa gↄ̃ daɛna tↄↄtɛ. 
Ǹ fɛɛ ǹ dↄwalɛ, ǹ mↄ́ ǹ wa bo n yenzi yãnzi. 
