﻿SAAMUNƆ.
39.
Dauda lɛ̀. Ma bè, mɛ́gↄ̃ ma zĩnda kũna dↄ̃, mɛ́ tó ma lɛ́ ma da durunkɛna guuro. Tó gbɛ̃ zaaa kúmao, mɛ́ ma lɛ́ kũ. 
Ma lɛ́ nakↄ̃a, ma yĩ kítikiti, mɛ́ɛ yãke oro, baa yã maaa se, ben ma yã'ↄ̃amma sↄ̀kpa à kàara. 
Ma swɛ̃̀ puusu bↄ̀ ma guu, kɛ̀ ma laasuu lɛ̀, ma swɛ̃̀ tɛ́ bↄ̀, ben ma lɛ́ bↄ̀ ma bè: 
Dii, ǹ tó màgↄ̃ ma wɛ̃̀ndigurↄ lɛ́ dↄ̃, kↄ̃n ma gurↄ pari zaka lɛ́o. Ǹ tó màgↄ̃ dↄ̃ lán ma wɛ̃̀ndi é gɛ̃ zɛ́la nà kãndo. 
N ma wɛ̃̀ndi lɛ́ yↄ̃̀ n ↄla zakan, ma kuuna dɛ wɛ́ɛ kↄ̃n yĩola n kiiaro. Baade píngi è gɛ̃ zɛ́la lán ĩa bàmɛ, 
gbɛ̃ntee tɛna ègↄ̃ dɛ lán ↄra bàmɛ. È bãabãa bo à auziki kakↄ̃a, mↄde à dↄ̃ tó dén eé gↄ̃nɛro. 
Tó lɛmɛ, bↄ́ tãmaan mɛ́gↄ̃ vĩi? Ḿbe ma wɛ́ɛ dↄnzi, Dii. 
Ǹ ma taarinↄ kɛ̃mɛ, ǹton tó yↄ̃nkↄↄnↄ ma faboro. 
Ma lɛ́ nakↄ̃ana, mɛ́ɛ ma lɛ́ wɛ̃kↄ̃aro, zaakɛ ḿbe n yã beee kɛ̀. 
Ǹton ma lɛ́ dↄro, ma gbãsĩ lɛ̀ n ↄkũ yãnzi. 
Nɛɛ̀ gbɛ̃ toto nɛɛ̀ wɛ́ɛ tãa à durun yãnzi, nɛɛ̀ à auziki yaka lán blɛ́ bà. Baade píngi è gɛ̃ zɛ́la lán ĩa bàmɛ. 
Ǹ ma aduakɛna sí Dii, ǹ swã kpá ma wiipɛnazi. Ǹton ma ↄ́ↄdↄna kpá swãkotoro, zaakɛ n nibↄn ma ũ, má dɛ gbɛ̃ zĩ̀tↄ ũ lán ma dezinↄ bà. 
Ǹ uu goma lɛ ma pↄↄ e àgↄ̃ nna dↄ, ai màgↄ̃ gá anduna tó. 
