﻿SAAMUNƆ.
35.
Dauda lɛ̀. Dii, ǹ íbɛtɛ kpá kↄ̃n ma ibɛɛnↄo, ǹ zĩ̀ ká kↄ̃n gbɛ̃ kɛ̀ aↄ̃ↄe zĩ̀ kaamaonↄ. 
Ǹ n sɛngbango kↄ̃n n gↄ̃kɛbↄnↄ sɛ́ɛ, ǹ fɛɛ ǹ dↄmalɛ. 
Ǹ n sári kↄ̃n n fɛ̃ɛdaao sɛ́ dↄ, ǹ fɛɛ gbɛ̃ kɛ̀ aↄ̃ↄe ma gbɛsɛɛnↄzi. Ǹ bemɛ ma mìsirin n ũ. 
Gbɛ̃ kɛ̀ aↄ̃ↄe ma wɛtɛɛ wà ma dɛɛnↄ, ǹ tó aↄ̃ kpɛɛ li, wí ń kũ. Gbɛ̃ kɛ̀ aↄ̃ↄe à zaaa gↄ̃gↄ̃maziinↄ, ǹ tó aↄ̃ fua, mà ń kpɛɛ e. 
Aↄ̃gↄ̃ dɛ lán ése ũkã kɛ̀ ĩa sɛ̀ɛ bà, Dii Malaika pɛ́ḿma. 
Aↄ̃ zɛ́ gↄ̃ gusiaa ũ kↄ̃n gu zãɛo, Dii Malaika ↄ yĩpańzi. 
Zaakɛ aↄ̃ wɛ̀ɛ yↄ̃̀mɛ pã, mɛ́ɛ yãke kɛńnɛro, ben aↄ̃ bà kpàkpamɛ. 
Ǹ tó mↄ́nzi ń le à kɛńnɛ ásaru ũ, ǹ tó bà kɛ̀ aↄ̃ↄ kpàkpamɛɛ ń kũ, aↄ̃ lɛ́ɛ wɛ̀ɛ kɛ̀ aↄ̃ↄ yↄ̃̀ pì guu. 
Ma pↄↄ é gbasa à kɛ Diia nna, mɛ́ pↄnnaa kɛ kɛ̀ à ma mì sì yãnzi. 
Mɛ́ be kↄ̃n nↄ̀sɛo do, Dii, dé bé à dɛ lán n bà? Nɛɛ̀ takaasideenↄ sí gbãamↄnnɛrinↄa, nɛɛ̀ wɛ̃ndadeenↄ bↄ ń wɛ́ɛtãmmarinↄ ↄzĩ. 
Sèeda ɛgɛdeenↄ è fɛɛmazi, aↄ̃è yã kɛ̀ má à yã dↄ̃roo lalama. 
Aↄ̃è à maaa fĩa bomɛ kↄ̃n à zaaao, ben ma gↄ̃ gbɛ̃ miradodee ũ. 
Tó aↄ̃ↄe gyãa kɛɛ yã sↄ̃, mɛɛ̀ uta kãsãa damɛ, mɛɛ̀ ma zĩnda busa kↄ̃n lɛ́yinao, mɛɛ̀ adua kɛńnɛ yãana sai, 
lán wà be aↄ̃ↄ dɛ ma gbɛ̃nna ke ma danɛ ũu bà. Mɛɛ̀gↄ̃ lili oo mìpɛɛna kↄ̃n pↄsiaao, lán wà bè ma dan mɛ́ɛ wɛ̃nda kɛɛnɛ bà. 
Mↄde kɛ̀ ma gɛ̃̀n sì, aↄ̃ lìgamazi kↄ̃n pↄnnaao, aↄ̃ ma zãmba kɛ̀ aↄ̃ lɛ̀ɛma, aↄ̃ ma yaka yãana sai. 
Aↄ̃ ma fabò pãsĩpãsĩ, aↄ̃ swaa pìtimazi. 
Dii, nɛ́gↄ̃ ma gwaa lɛ ai bↄrɛmɛ? Músu pìnↄↄ e ma kɛɛ gyáigyai, ǹ ma síḿma màgↄ̃ kú wɛ̃̀ndio. 
Mɛ́ n sáabu kpá pari kakↄ̃ana guu, mɛ́ n tↄ́ kpá gbɛ̃nↄ wáa. 
Ǹton tó ma ibɛɛnↄ ma yáa dↄro, ǹton tó gbɛ̃ kɛ̀ aↄ̃ zàmagu pãanↄ ma gwa kↄ̃n wɛ́ɛ zaaaoro. 
Yã nnaa è bↄ ń lɛ́nlo, aↄ̃è yã di nↄ̀sɛyĩideenↄa. 
Aↄ̃è lɛ́ aɛ wà be: Ɛ̃hɛ̃, ɛ̃hɛ̃, wa wɛ́ɛ è. 
Dii, n wɛ́ɛ è, ǹtongↄ̃ yĩtɛnaro, ma Dii, ǹtongↄ̃ zã̀maoro. 
Ma Luda, ǹ fɛɛ ǹ zɛmao, ma Dii, ǹ tó yã bↄmao nna. 
Nɛɛ̀ yã kɛ a zɛ́a, Dii ma Luda, ǹ yã nnaa kpáma, ǹton tó aↄ̃ ma yáa dↄro. 
Ǹton tó aↄ̃ be ń swɛ̃̀n wà ma nɛro, ǹton tó aↄ̃ be wà ma mↄ bɛ̃ɛro. 
Lán aↄ̃ↄe pↄnnaa kɛɛ ma wɛ́ɛtãmma musu nà, ǹ tó wí ń kũ mà ń kpɛɛ e. Lán aↄ̃ↄe bítakɛɛ ↄdↄamɛ nà, ǹ wí daḿma ǹ ń kpɛ bↄ. 
Gbɛ̃ kɛ̀ ma bↄna maaa è kɛńnɛ nnaanↄ ǹ tó aↄ̃ pↄnnaa kɛ aↄ̃ guda kɛ. Gbɛ̃ kɛ̀ ma bↄna aafia è kɛńnɛnↄ ǹ tó aↄ̃gↄ̃ bee Dii bé à bíta. 
Mapi sↄ̃, mɛ́ n maakɛ yã o, mɛ́gↄ̃ n sáabu kpaa gurↄ píngi. 
