﻿SAAMUNƆ.
31.
Dauda lɛ̀. Dii, ḿbe ma nanzi, ǹton tó wí ma kũ zikiro. Ǹ ma mì sí n maakɛna yãnzi, 
Ǹ swã kpámazi, ǹ ma faaba kɛ kpakpaa, ǹ gↄ̃ ma utɛki gbɛ̀ ũ, zɛki gbãaa kɛ̀ eé ma faaba kɛɛ ũ. 
Ma gbɛ̀si kↄ̃n ma zɛki gbãaaon n ũ, ǹ dↄmɛ aɛ ǹ ma da zɛ́a n tↄ́ yãnzi. 
Ǹton tó mà si bà kɛ̀ wà kpàkpamɛɛnlo, zaakɛ ma mìsirin n ũ. 
Ma a ninii nànnɛ n ↄzĩ, ǹ ma mì sí Dii Luda yãpurade. 
Ma za gbɛ̃ kɛ̀ aↄ̃è na tãanↄan, Diin má náanɛ kɛ̀. 
Mɛ́ yáa dↄ mà pↄnnaa kɛ kↄ̃n n yenzio, zaakɛ n ma yã'ↄ̃amma è, n ma nawɛ̃akɛna dↄ̃̀mɛ. 
Nɛ́ɛ ma na ma ibɛɛnↄnɛ ń ↄzĩro, n ma gba mɛ̀porokii. 
Ǹ ma wɛ̃nda gwa Dii, zaakɛ má kagurakɛnamɛ, pↄsiaa tò ma wɛ́ɛ gↄ̃̀ súkusuku, ma pↄↄ sia kũ̀ ma nↄ̀sɛ yàka. 
Pↄsiaa e ma wɛ̃̀ndi lagoo, m̀bna e ma wɛ̃̀ yãaa, laasuu tò má gbãaa vĩ dↄro, ma wánↄ bùsa. 
Ma gbɛ̃daaanↄ è kya kámagu ma ibɛɛnↄ yãnzi, ma yã è ma gbɛ̃nↄ vĩa kũ maamaa, gbɛ̃ kɛ̀ weè dakↄ̃rɛ gãalɛnↄ è pãmɛ. 
Ma yã e dↄ gbɛ̃ken dↄro, ma gↄ̃ lán gɛ̀ bà, ma gↄ̃ńnɛ lán oo kãndo bà. 
Mɛɛ̀ ma kɛ̀ gbɛ̃nↄↄ e ma pee pari, vĩapↄnↄↄ ligamazi. Aↄ̃è kakↄ̃a wà lɛ́ kpákↄ̃sↄ̃mazi, aↄ̃è lɛdolɛ kɛ ma wɛ̃̀ndibↄna yãnzi. 
Mↄde ḿbe ma n náanɛ kɛ̀ Dii, mɛɛ̀ be ma Ludan n ũ. 
Ma wɛ̃̀ndi ègↄ̃ kú n ↄzĩ gurↄ píngimɛ, ǹ ma sí ma ibɛɛ kɛ̀ aↄ̃ↄe ma wɛtɛɛ wà ma dɛɛnↄ ↄzĩ. 
Ǹ uu were mamↄma n zↄ̀bleria, ǹ ma mì sí n yenzi guu. 
Dii, ǹton tó wí ma kũro, zaakɛ ma wii pɛ̀nzi. Ǹ tó wí zaakɛrinↄ kũ, ǹ tó aↄ̃ lɛ́ gↄ̃ nakↄ̃ana gɛ̀wãan, 
ǹ tó ɛgɛtori pìnↄ nɛ́nɛ naɛ. Aↄ̃è dↄkɛ kↄ̃n gbɛ̃ maaanↄ, aↄ̃è kya káńgu kↄ̃n ĩadãnao. 
Auziki kɛ̀ ń kàkↄ̃a n vĩakɛrinↄnɛ bíta, nɛɛ̀ aubarika da gbɛ̃ kɛ̀ aↄ̃ↄ nanziinↄn gbɛ̃ píngi wáa. 
Tó gbɛ̃nↄ lɛ́ kpàkↄ̃sↄ̃ńzi, nɛɛ̀ ń utɛ n kuu, tó wèe lɛokpakↄ̃a kɛɛńyo, nɛɛ̀ ń dãkpa n kukiia. 
Aubarikadeen Dii ũ, zaakɛ à yenzi bíta ↄ̀dↄamɛ wɛ́tɛ kɛ̀ wà lìgazi guu. 
Swɛ̃̀ kɛ̃̀magu gwe, ben ma bè, wà n kii zɛ́ zↄ̃̀mɛ. Kɛ̀ ma faaba lɛ́ zùnzi, n ma wɛ̃nda wiipɛna mà. 
Àgↄ̃ ye Diizi, amↄa a gbɛ̃nↄ. Dii è a náanɛkɛrinↄ dãkpa, è fĩa bo ĩadãrinↄnɛ pãsĩpãsĩ. 
Amↄa kɛ̀ a wɛ́ɛ dↄ Diizinↄ, àgↄ̃ gbãa à a swɛ̃̀ kpáɛ. 
