﻿AYUBA.
42.
Ben Ayuba bè Diinɛ: 
Má dↄ̃ kɛ̀ nɛ́ fↄ̃ ǹ yã píngi kɛ, gbɛ̃ke é fↄ̃ à kpá n pↄyezinanɛro. 
N bè, dé bé èe kpaa ↄ̃ndↄ̃ↄnɛ dↄ̃saii? Yãpuramɛ, ma yã kɛ̀ má à gbá dↄ̃roo ò, yãbↄnsaɛ kɛ̀ dɛ ma dↄ̃nalaa. 
N bè mà swã kpá, nɛ́ yã o, nɛ́ yã lalama, mɛ́ wenla. 
Ma n yã mà kↄ̃n swãomɛ yã, tia sa ma wɛ́ɛ sìnlɛ. 
Beee yãnzi ma kya kà ma zĩndan, ma a nↄ̀sɛ lìɛ ma vɛ̃ɛ bùsutin tubura. 
Dii yã beeenↄ ona gbɛra à yã ò Temana gbɛ̃ Ɛlifazanɛ à bè: Ma pↄ fɛ̃̀nzi kↄ̃n n gbɛ̃nna gↄ̃ↄn plaaanↄ, zaakɛ ée ma yã o a zɛ́a lán ma zↄ̀bleri Ayuba bàro. 
À zùsware sɛ́ mɛ̀n swɛɛplaa kↄ̃n sãkaroo mɛ̀n swɛɛplaa, à gáo ma zↄ̀bleri Ayuba kiia à sa'opↄ kɛ̀ wè ká tɛ́n à tɛ́ kũ oo, ma zↄ̀bleri Ayuba é adua kɛare. Mɛ́ à aduakɛna sí mɛ́ kɛare a yↄ̃nkↄkɛnaaro. Ée ma yã o a zɛ́a lán ma zↄ̀bleri Ayuba bàro. 
Ben Temana gbɛ̃ Ɛlifaza kↄ̃n Sua gbɛ̃ Bilidadao kↄ̃n Naamati gbɛ̃ Zofao gàa wà kɛ̀ lán Dii òńnɛ nà, ben Dii Ayuba aduakɛnnɛna sì. 
Ayuba aduakɛna a gbɛ̃nnanↄnɛ gbɛra Dii tò à sù a gwena ziin. À ɛ̀ara à pↄ́ kɛ̀ à vĩ yãa kàaranɛ lɛo plaa. 
À vĩ̀i kↄ̃n à dãaronↄ mↄ̀ à kiia ń píngi kↄ̃n à gbɛ̃ dↄ̃nanↄ ń píngi. Aↄ̃ pↄ́ blèo a bɛ aↄ̃ sósobi kɛ̀o, aↄ̃ à làakari kpàɛnɛ yã kɛ̀ Dii tò à à lè píngi yãnzi. Ben aↄ̃ baade à gbà kondogi ↄↄ kↄ̃n vura tãngao mɛ̀n doodo. 
Dii aubarika dà Ayuban zãa dɛ káakupↄla. À sãanↄ vĩ bↄrↄ gɛ̃ro dosai, lakuminↄ bↄrↄ swɛɛdo, zùnↄ bↄrↄ plaa kↄ̃n zaakinↄ bↄrↄ do. 
À nɛ́gↄ̃gbɛ̃nↄ ì gↄ̃ↄn swɛɛplaa kↄ̃n nɛ́nↄgbɛ̃nↄ mɛ̀n aagↄ̃ dↄ. 
À nɛ́nↄgbɛ̃ káakudee tↄ́n Yemima, à plaade tↄ́n Kezia, à aagↄ̃de tↄ́n Kɛrɛnapuku. 
Bùsu pì guu píngi nↄgbɛ̃ kee kuu à maaa kà Ayuba nɛ́nↄgbɛ̃ pìnↄ ũro. Aↄ̃ de ń túbi dìɛńnɛ kↄ̃n ń dãgↄ̃nↄ. 
Ayuba nawɛ̃akɛna gbɛra à kɛ̀ wɛ̃̀ baswɛɛplaa dↄ, à wɛ́ɛ sì a dionↄ kↄ̃n a swãkpɛɛnↄ kↄ̃n a nasionↄlɛ. 
À zi kũ̀ kótokoto àton gà. 
