﻿AYUBA.
31.
Ma la dà kɛ̀ ma wɛ́ɛ égↄ̃ kú nↄkparɛaro. 
Bↄ́ bé eé gↄ̃ gbɛ̃ntee baka ũ Luda kiia zaa musuu? Bↄ́ túbin eé e Gbãapingide kiia zaa ludambɛɛ? 
Gbɛ̃ zaaanↄn kisia è ń leroo? Zaakɛrinↄn mↄ́nzi è gɛ̃ńziroo? 
À dɛ Ludaa e ma yãkɛnanↄ ee à ma kɛ̀sɛsɛna lɛ́ dↄ̃roo? 
Mɛɛ̀gↄ̃ táa oo kↄ̃n mↄnafikion yↄ́? Mɛɛ̀ wã mà gbɛ̃ sãsãn yↄ́? 
Luda ma yↄ̃ a zɛ́a à gwa, eé dↄ̃ kɛ̀ má taari vĩro. 
Tó ma pã zɛ́nɛ, bensↄ̃ pↄ́ kɛ̀ ma wɛ́ɛ ènↄ bé èe ma swɛ̃̀ blee, ke tó ma ↄↄ kú yã zaa ke guu, 
ɛ̃ndɛ̃ mà pↄ́ tↄ̃ gbɛ̃ pãndenↄ ble, wà pↄ́ kɛ̀ má bànↄ biɛbiɛ. 
Tó gbɛ̃ke nↄↄ nii gɛ̃̀ ma swɛ̃̀n, tó ma naguzi ma gbɛ̃daaa nↄↄ yãnzi, 
ɛ̃ndɛ̃ gbɛ̃ pãnde gbá di ma naↄ̃a, àgↄ̃ kĩi kɛɛ danↄnɛ. 
Zaakɛ tó ma yã pì kɛ̀, dà zaaamɛ, durun kɛ̀ à kà wà à yã gↄ̃gↄ̃mɛ. 
Yã pì nɛ́ tɛ́ pↄ́kaatɛrimɛ, kɛ̀ dɛ à dↄ ma bura pↄ́nↄa à tɛ́ kũ kororo. 
Tó ma gↄ̃gbɛ̃ ke nↄgbɛ̃ zĩkɛri yã vĩmao, tó mɛ́ɛ gↄ̃gↄ̃ a zɛ́aro, 
mɛ́ kɛ diamɛ, tó Luda fɛ̀ɛmazii? Tó à mↄ̀mazi, mɛ́ benɛ diamɛ? 
Luda kɛ̀ à ma í kàsa nɛ́'isↄn bé à adee í kàsa seroo? Luda mɛ̀n doo pì bé à wa baade kɛ̀ à da gbɛɛɛnloo? 
Tó ma takaasidee tɛ̃̀ pↄ́ kɛ̀ èe à nii dɛɛ, tó ma gi gyaanↄↄ wɛ̃nda bozi, 
tó ma pↄ́ blè, ma tonɛ kɛ̀ gwàri vĩroo tɛ̃̀ sↄ̃, tↄ̀! 
Lɛnlo! Zaa ma gↄ̃kparɛkɛgurↄ tonɛnↄ den ma ũ. Zaa lán ma bↄ ma da nɛ́'isↄn nà gyaanↄnↄ dↄnlɛrin ma ũ. 
Tó ma gbɛ̃ke è kɛ̀ ĩa e à dɛɛ, ke tó ma takaasidee è kɛ̀ à bisa vĩ à kúalaro, 
tó èe ma sáabu kpá kɛ̀ ma a sãkã bisa kùàla à mɛ̀ kɛ̀ lↄ́gↄlↄgↄro, 
tó ma gbãaa mↄ̀ tonɛnɛ, kɛ̀ má dↄ̃ kɛ̀ weé zɛmao yãkpaɛkɛnan yãnzi, 
ma gã̀ bↄkũn, ma gã̀sã wó a pɛ́kiia. 
Má Luda wɛ́ɛtãmmana vĩa vĩ, à bítakɛ yãnzi mɛ́ fↄ̃ mà yã beee taka kɛro. 
Tó vuran ma gbãaa èa, tó ma bè vura atɛ̃ɛn má náanɛkɛna, 
tó ma auziki bítan ma pↄↄ dↄa, ↄↄdaa kɛ̀ à gɛ̃̀ ma ↄzĩ pì, 
tó ↄfãntɛ̃ tɛ́kɛnan má tɛ́zi, ke mↄvura táa'ona kↄ̃n à maakɛɛo, 
ben aↄ̃ yã e ma swɛ̃̀ blee busɛbusɛ, ai ma lɛ́ pɛ̀ ma ↄↄa ma ì kpàoḿma, 
beee nɛ́ durun kɛ̀ à kà wà à yã gↄ̃gↄ̃mɛ, mↄnafikikɛna Luda Musudenɛn gwe. 
Mɛ́ɛ pↄnnaa kɛ ma zanguri mↄ́nzi'ena yã musuro, mɛ́ɛ à yáa dↄ kɛ̀ yã à lè yãnziro. 
Mɛ́ɛ we ma durun kɛ̀ ma à kàro. 
Dé bé à pìtama kɛ̀ èe pↄ́ ble à kã̀roo? Ma bɛdeenↄn ma sèedadeenↄ ũ. 
Ma bɛ zɛ́ ègↄ̃ wɛ̃na nibↄnↄnɛ, mɛɛ̀ we gbɛ̃ kɛ̀ èe gɛ̃tɛɛ ì gãalɛro. 
Ma a taarinↄ ùtɛ gbɛ̃nↄnɛↄ́? Ma lá kù ma durunnↄan yↄ́? 
Parii vĩa ma kũ ai ma fua mà yã oↄ́? Kɛ̀ weé kya kámagu yãnzin ma gi bↄ kpɛ́nziↄ́? 
O'o! Dé bé eé ma yã kɛ̀ mamaa? Ma zɛo. Gbãapingide wemala sa. Luda kɛ̀ yã vĩmao pì kɛ̃ takadan. 
Mɛ́ takada pì sɛ́ mà da ma gã̀n, mɛ́ kú fùra ũ, 
mɛ́ gá mà yã kɛ̀ má kɛ̀nↄ tↄ̃kɛ̃nɛ píngi, mɛ́ gázi lán wɛ̃ɛnɛ bà. 
Tó ma buraa e giimazi, bensↄ̃ à dↄ̀rↄnↄↄ e wii lɛɛma, 
tó ma bura pↄ́ blè bensↄ̃ mɛ́ɛ tↄↄtɛ pì fĩa boro, ke tó ma gbɛ̃ kɛ̀ aↄ̃ↄ vĩ yãanↄ dɛ̀dɛ, 
ɛ̃ndɛ̃ lɛ̀kara bↄɛ gbado gɛ̃ɛ ũ, pampaa sↄ̃ bↄɛ ése gbɛ̀n. Ayuba yã lɛ́n gwe. 
