﻿AYUBA.
14.
Gbɛ̃ntee è bↄ nↄgbɛ̃ kiiamɛ, à wɛ̃̀ndi kusu, ègↄ̃ kuu yãkete sairo. 
È pia lán lávu bà è kori kũ, è gɛ̃tɛ lán ↄra bà è gì kɛro. 
Gbɛ̃ beee takan nɛ́ wɛ́ɛ dↄnɛ ǹ yãkpaɛ kɛoↄ́? 
Pↄ́ gbãsĩ é fↄ̃ à pↄ́ gbãsĩsai iↄ́? Eé sí kɛro. 
N gbɛ̃ntee gurↄↄ dìɛnɛ, à mↄ lɛ́ kú n ↄzĩ, n à wɛ̃̀ lɛ́ dànɛ, eé fↄ̃ à vĩàlaro. 
Ǹ wɛ́ɛ goa ǹ à tó gwe ai à gurↄ lɛ́ papa lán ayazĩkɛri bà. 
Lí ègↄ̃ tãmaa vĩmɛ, zaakɛ tó wà zↄ̃̀, è ɛara à pìto pá, bensↄ̃ à pìto dufu pì è furo. 
Baa tó à kãsãa zi kũ̀ tↄↄtɛ guu, bensↄ̃ à kusu gà bùsun, 
tó à í gũu mà, eé pìto pá, eé gã̀ bↄ lán lí kɛ̀ wà pɛ̀ bà. 
Tó gbɛ̃ gà sↄ̃, ègↄ̃ daɛna sↄ̀rↄrↄ, è tá ègↄ̃ kuu dↄro. 
Lán sɛ̀bɛ'i è lago nà, bensↄ̃ swa'i è baba à yãa, 
lɛn gbɛ̃ntee è daɛ lɛ è fɛɛ dↄro, ai ludambɛɛ gá gɛ̃tɛo, eé vuro, eé vu kↄ̃n ii pìoro. 
Tó nɛ́ ma utɛ gɛ̀wãan ǹ ↄ kúma ai n pↄↄ wèrema dé! Tó nɛ́ gurↄ lɛ́ diɛmɛ gwe gbasa ǹ dↄ ma yãn dé! 
Tó gbɛ̃ gà, eé ɛara àgↄ̃ kuuↄ́? Tó lɛmɛ, mɛ́gↄ̃ wɛ́ɛ dↄↄ ma vunazi ma ↄsikana guu gurↄ píngi. 
Nɛ́ lɛ́ zumazi mɛ́ wenla, nɛ́ mamↄma kɛ̀ má dɛ n ↄzĩi ũu bɛgɛɛ kɛ. 
Gurↄↄ beeea n wɛ́ɛ égↄ̃ tɛ́ ma yãkɛnanↄzi, mↄde nɛ́ ma durun yã da dↄro. 
Nɛ́ ma taarinↄ ká bↄ̀kↄn ǹ yi ǹ diɛ, nɛ́ lá kú ma zaakɛna pìnↄla. 
Lán kpiii è gboro à fãakↄ̃a nà, bensↄ̃ sĩ̀sĩ musu gbɛ̀ gbɛ̃̀ntɛ̃ è sↄ̃ki kpá, 
lán swa'i è gbɛ̀ lↄ́lↄ nà, bensↄ̃ í è bùsu sɛ́ɛ à táo, lɛn nɛɛ̀ gbɛ̃ntee tãmaa nɛnɛ lɛ. 
Nɛɛ̀ gbãaa mↄ́nɛ à tá, è su dↄro, nɛɛ̀ tó à uu liɛ à anduna tó. 
Tó à nɛ́nↄ gↄ̃̀ gbɛ̃ bɛ̀ɛdeenↄ ũ, eé dↄ̃ro, tó aↄ̃ kɛ̀ gbɛ̃ fétenↄ ũmɛ sↄ̃, eé ero. 
Wãwãan eégↄ̃ maa ado, à zĩnda pↄsiaan ègↄ̃ kɛɛ. 
