﻿AYUBA.
3.
Beee gbɛra Ayuba lɛ́ wɛ̃̀ à yã zaaa ò a igurↄↄ musu 
à bè: 
Luda ma igurↄↄ kɛ pã atɛ̃nsa gwãavĩ kɛ̀ wà ma nↄ̀ sì pì. 
Gurↄↄ pì li gusiaa ũ, zaa musu Luda tón à yã daro, àton tó guu puaro. 
Gusia kũ níginigi gurↄↄ pìa, ludambɛ siaa kúɛa, gusia bìtim daàla. 
Gwãavĩ pì sↄ̃ sia kũ níginigi, wàton da wɛ̃̀ gurↄↄnↄ tɛ́ dↄro, wàton naro mↄ gurↄↄnↄ guuro. 
Gwãavĩ pì kɛ gwãavĩ fĩi ũ, guda tóngↄ̃ dↄ gurↄↄ beeearo. 
Pↄ́dammari kɛ̀ aↄ̃è tó ↄfãntɛ̃ guu puroonↄ láari kɛ gurↄↄ pìa, gbɛ̃ kɛ̀ aↄ̃ↄ dↄ̃ lán wè ↄ ká kùkukuzi pìnↄ. 
À gudↄnao sↄsↄnɛnↄ sia kũ, weé à gudↄna dã pã, guwɛɛ é kɛ̃ro. 
Zaakɛ gurↄↄ pì e ma da nɛ́'isↄ zɛ́ tatamalɛro, à tò ma wɛ́ɛ sì nawɛ̃alɛ. 
À kɛ̀ dia wèe ma i gɛ̀ ũroo? Bↄ́yãnzi mɛ́ɛ bↄ gbɛɛɛn ma sↄkpa gↄ̃ↄroo? 
À kɛ̀ dia wà ma kpa gbálaa? Bↄ́yãnzin wà yↄ̃ kpàma má mìzi? 
Tó ma ga yã, lɛ ma gↄ̃ kítikiti, lɛ ma ii ò ma kámma bò 
kↄ̃n kínanↄ kↄ̃n anduna guu lɛ́dammari kɛ̀ aↄ̃ kíbɛ ziinↄ kɛ̀kɛ wà bò ń zĩndanɛnↄ, 
wɛ̃ɛnɛ kɛ̀ aↄ̃ vura kàkↄ̃ańzinↄ bensↄ̃ aↄ̃ kondogi kà ń kpɛ́n à pà. 
À maa yã wà ma vĩi lán nↄ̀bↄɛnɛ bà, lán nɛ́ kɛ̀ mↄ̀ gɛ̀ ũ èe anduna eroo bà. 
Gwen zaakɛrinↄ è ń zaakɛna tón bensↄ̃ gbɛ̃ busananↄ è kámma bon. 
Zĩ̀zↄnↄ è ĩampakii e gwe, aↄ̃è ń wɛ́ɛtãmmarinↄ kòto ma dↄro. 
Gbãadeenↄ kↄ̃n talakanↄↄ kú gwe ń píngi, bensↄ̃ zↄ̀ ègↄ̃ dɛ a dii pↄ́ ũ gwe dↄro. 
Bↄ́yãnzi Luda è guu pu wɛ̃ndadeenↄnɛzi? À kɛ̀ dia è wɛ̃̀ndi kpá gbɛ̃ kɛ̀ aↄ̃ pↄↄ siaanↄa? 
Aↄ̃ wɛ́ɛ ègↄ̃ dↄ gaazi aↄ̃è ero, aↄ̃è kpáɛ kɛzi dɛ auziki kɛ̀ utɛnala. 
Tó aↄ̃ gà wà ń vĩi, aↄ̃è pↄnnaa kɛ, aↄ̃ nↄ̀sɛ è kɛ nna. 
Luda ń zia yã ùtɛńnɛ, à kara lìgańzi kpa sãnda píngia. 
Wesakakↄ̃a à bo bé à gↄ̃̀ ma pↄ́blee ũ, ma m̀bona è yãaro. 
Yã kɛ̀ ma vĩa kɛ̀nɛ pì bé à ma le, yã kɛ̀ ma kã gìzi pì bé à sùma. 
Má ĩampana vĩro, ma làakari kpaɛnaro. Má kámmabona vĩro, ma nawɛ̃akɛna è yãaro. 
