﻿1 KINANƆ.
19.
Ben Ahabu yã kɛ̀ Ilia kɛ̀ tↄ̃kɛ̃̀ Yɛzɛbɛlinɛ píngi, lán à tãadee pìnↄ dɛ̀dɛ nà kↄ̃n fɛ̃ɛdaao ń píngi. 
Ben Yɛzɛbɛli lɛ́kpãsã kɛ̀ Ilianɛ à bè: Ai zia mↄndaa'i, tó mɛ́ɛ kɛnnɛ lán ń kɛ̀ tãadeenↄnɛ nàro, tãanↄ yã kɛmɛ pãsĩpãsĩ! 
Ben vĩa Ilia kũ̀, ben à fɛ̀ɛ à bàa sì à a zĩnda mìbↄkii wɛ̀tɛ. Kɛ̀ à kà Bɛsɛba, Yudanↄ bùsun, gwen à a zĩkɛri tòn, 
ben à táa ò gbáan gurↄ do. À gàa à vɛ̃̀ɛ sɛ̃ lí gbáru, ben à adua kɛ̀ à e à ga à bè: Dii, yã kɛ̀kii mↄ̀ma lɛ. Ǹ ma wɛ̃̀ndi sɛ́ gↄ̃ↄ, zaakɛ má dɛ ma dezinↄlaro. 
Ben à dàɛ èe ii oo sɛ̃ lí pì gbáru. Èe gì kɛro ben malaika mↄ̀ à ↄ kɛ̀a à bè: Ǹ fɛɛ ǹ pↄ́ ble. 
Kɛ̀ Ilia guu gwà, ben à kàra aasana è kↄ̃n í tùuo kaɛna a mìzi. Ben à pↄ́ blè à í mì à ɛ̀ara à dàɛ. 
Dii Malaika ɛ̀ara à mↄ̀ à gɛ̃̀n plaadeeo, à ↄ kɛ̀a à bè: Ǹ fɛɛ ǹ pↄ́ ble, zaakɛ tá gbã̀an nɛ́ɛ mↄↄ o. 
Ben à fɛ̀ɛ à pↄ́ blè à í mì. Pↄ́blee pì tò à gbãaa è, ben à táa ò gurↄ baplaa fãantɛ̃ kↄ̃n gwãavĩo ai à gàa à kà Luda kpiii kɛ̀ wè be Orɛbua. 
Ben à gɛ̃̀ gbɛ̀wɛɛn à ì gwe, ben Dii yã sùa à bè: Ilia, bↄ́n nɛ́ɛ kɛɛ kɛ̀? 
À wèàla à bè: Dii Luda Zĩ̀kpɛde, ma làakari fɛ̀ɛ maamaa, zaakɛ Isarailinↄ pã kpà n bà kuunańyo yãzi, ben aↄ̃ n gbãgbãkiinↄ gbòro aↄ̃ n annabinↄ dɛ̀dɛ kↄ̃n fɛ̃ɛdaao. Mámbe ma gↄ̃ mado, ben aↄ̃ↄe ma wɛɛ se. 
Ben Dii bè: Ǹ bↄ ǹ gá zɛ ma aɛ kpiii musu, mɛ́ gɛ̃tɛ n aɛ. Zàga'ĩa gbãaa fɛ̀ɛ, èe kpiii pìnↄ paraa èe gbɛ̀nↄ wiwii Dii aɛ, mↄde Dii kú ĩa pì guuro. Ĩa pì gbɛra tↄↄtɛ nìgãnigã, mↄde Dii kú tↄↄtɛ nigãnigãna pì guuro. 
Tↄↄtɛ nigãna pì gbɛra ben tɛ́ bↄ̀, mↄde Dii kú tɛ́ pì guuro. Tɛ́ pì gbɛra ben kòto busɛ bↄ̀ tɛɛɛ. 
Kɛ̀ Ilia kòto pì mà, à a utadaa kù a wɛ́ɛla. Ben à bↄ̀ à gàa à zɛ̀ gbɛ̀wɛɛ pì lɛ́a, à mà wà bèare: Ilia, bↄ́n nɛ́ɛ kɛɛ kɛ̀? 
À wèàla à bè: Dii Luda Zĩ̀kpɛde, ma làakari fɛ̀ɛ maamaa, zaakɛ Isarailinↄ pã kpà n bà kuunańyo yãzi, ben aↄ̃ n gbãgbãkiinↄ gbòro aↄ̃ n annabinↄ dɛ̀dɛ kↄ̃n fɛ̃ɛdaao. Mámbe ma gↄ̃ mado, ben aↄ̃ↄe ma wɛɛ se. 
Ben Dii bènɛ: Ǹ ɛara ǹ tá Damasiku gbáan. Tó n ka gwe, ǹ Azaili ká Sirianↄ kína ũ, 
nɛ́ Nimisi dio Yehu ká Isarailinↄ kína ũ, nɛ́ Abɛli Mɛↄla gbɛ̃ Safata nɛ́ Ɛlisa kɛ n gɛ̃ɛ ũ annabi ũ. 
Gbɛ̃ kɛ̀ bↄ̀ Azaili fɛ̃ɛdaa lɛ́zĩ, Yehu bé eé à dɛ. Tó à bↄ̀ Yehu fɛ̃ɛdaa lɛ́zĩ sↄ̃, Ɛlisa bé eé à dɛ. 
Baa kↄ̃n beeeo má Isarailinↄ kũna gↄ̃ↄn bↄrↄ swɛɛplaa, kɛ̀ aↄ̃ gbɛ̃kee e kúɛ Baalinɛ à lɛ́ pɛ̀aro. 
Ben Ilia fɛ̀ɛ à bↄ̀ gwe à gàa à Safata nɛ́ Ɛlisa lè, èe bú wii kↄ̃n zùnↄ swaaro kuri awɛɛplaa. Àmbe à tɛ́ zù swaaro kpɛɛdeezi. Ben Ilia sↄ̃̀zi à a gyaba gò à dààla. 
Ben Ɛlisa a zùnↄ tò gwe à bàa lɛ̀ à bↄ̀ à tɛ́ Ilia kpɛɛ, ben à bènɛ: Ǹ tó mà gá lɛ́ za ma de kↄ̃n ma daoa gĩa, mɛ́ gbasa mà mↄ́ mà tɛ́nzi sa. Ben Ilia bènɛ: Ǹ gá ǹ ɛara ǹ su. Asa ń dↄ̃ yã kɛ̀ má kɛ̀nnɛ. 
Ben Ɛlisa ɛ̀ara à gàa à a zùnↄ kòto kpà à tɛ́ lè kↄ̃n a zù swaaro gbóngoo, ben à zù pìnↄ nↄ̀bↄ fùfu kɛ̀ à kpà gbɛ̃nↄa aↄ̃ↄ sò. Ben à bↄ̀ à tɛ̀ Iliazi, à gↄ̃̀ à plaadee ũ. 
