﻿1 KINANƆ.
18.
À gurↄ plaaa kɛ̀, ben Dii yã sù Iliaa lousaiwɛ̃ aagↄ̃dee guu à bè: Ǹ gá ǹ n zĩnda ↄdↄa Ahabunɛ, mɛ́ tó lou ma à bùsun. 
Ben Ilia fɛ̀ɛ èe gaa a zĩnda ↄdↄa Ahabunɛ. Kɛ̀ dekaa gbãaa kpà Samaria, 
ben Ahabu a bɛgwari Obadia sìsi. Obadia pì sↄ̃ↄ Dii vĩa vĩ maamaa. 
Kɛ̀ Yɛzɛbɛli e Dii annabinↄ dɛdɛ yã, ben Obadia ń gbɛ̃ kenↄ sɛ̀ɛ gↄ̃ↄn basↄↄro à ń útɛ gbɛ̀wɛɛnↄ guu gↄ̃ↄn baplaa akurikuri, ben à ń gwá kↄ̃n pↄ́bleeo kↄ̃n ío. 
Ben Ahabu bè Obadianɛ: Wà dↄdↄ guuzi wà gá íbↄkiinↄ kↄ̃n swawɛɛnↄn píngi. Wègↄ̃ dↄ̃ro ke wé sɛ̃̀ e wà kpá wa sↄ̃nↄa kↄ̃n wa bãagãsↄ̃nↄ. 
Ben aↄ̃ guu kpàatɛ, aↄ̃ baade a zɛ́ sɛ̀. 
Kɛ̀ Obadia tɛna, ben aↄ̃ kpàkↄ̃a kↄ̃n Iliao. À à dↄ̃̀, ben à dàɛ a puua à bè: Ma dii Ilia, ḿbe gweↄ́? 
Ilia wèàla à bè: Mámbee! Ǹ gá o n diinɛ má kú kɛ̀. 
Ben Obadia bè: Bↄ́ taarin má kɛ̀, kɛ̀ nɛ́ɛ mamↄma n zↄ̀bleri naa Ahabunɛ a ↄzĩ à ma dɛɛ? 
Má sì kↄ̃n Dii n Ludao bori ke bùsu kee kuu kɛ̀ ma dii gì gbɛ̃nↄ zĩḿma wà n wɛtɛnziro. Tó wà bè ń kú gwero, è tó aↄ̃ ladamɛ. 
Ben nɛ́ɛ oomɛ dↄ mà gá mà o ma dii Ahabunɛ kɛ̀ ń kú kɛ̀ↄ́? 
Tó ma da zɛ́n, mɛ́gↄ̃ dↄ̃ guu kɛ̀ Dii Nini é n sɛ́ à tányoro. Tó ma gaa má ò Ahabunɛ, tó à mↄ̀ èe n ero, eé ma dɛmɛ. Mamↄma n zↄ̀bleri sↄ̃ má Dii vĩa vĩ zaa ma ↄ̀wazikɛgurↄmɛ. 
Ma dii Ilia, kɛ̀ Yɛzɛbɛli e Dii annabinↄ dɛdɛɛ, nɛ́ɛ yã kɛ̀ má kɛ̀ maroo? Mámbe ma ń gbɛ̃kenↄ sɛ̀ɛ gↄ̃ↄn basↄↄro, ma ń útɛ gbɛ̀wɛɛnↄ guu gↄ̃ↄn baplaa akurikuri, ma ń gwá kↄ̃n pↄ́bleeo kↄ̃n ío. 
Ben n bèmɛ dↄ mà gá mà o ma dii Ahabunɛ ń kú kɛ̀ↄ́? Eé ma dɛee. 
Ben Ilia bè: Má sì kↄ̃n Dii Zĩ̀kpɛde kɛ̀ mɛ́ɛ dↄↄzio, mɛ́ ma zĩnda ↄdↄanɛ gbã̀a sa. 
Ben Obadia gàa à dà Ahabulɛ à yã pì ònɛ, ben Ahabu gàa da Ilialɛ. 
Kɛ̀ Ahabu Ilia è, à bènɛ: Isarailinↄ bùsu dɛ̀ri, ḿbe gweↄ́? 
Ben Ilia bè: Èe kɛ mámbe ma Isarailinↄ bùsu dɛ̀ro, ḿbe kↄ̃n n de bɛdeenↄ ámbe á dɛ̀, zaakɛ a pã kpà Dii yãdiɛnanↄzi a dↄ Baalizi. 
Ǹ Isarailinↄ sísi ń píngi, wà dakↄ̃rɛ Kamɛli kpiii musu lɛdo kↄ̃n Baali tãagbãgbãri gↄ̃ↄn wàa plaa kpɛ́ baplaa akuri kↄ̃n Asɛra tãade gↄ̃ↄn wàa plaaa kɛ̀ aↄ̃è pↄ́ ble kↄ̃n Yɛzɛbɛlionↄ. 
Ahabu Isarailinↄ sìsi ń píngi, ben à tãadee pìnↄ kàkↄ̃a Kamɛli kpiii musu. 
Ben Ilia sↄ̃̀ gbɛ̃nↄzi à ń lá à bè: A laasuu égↄ̃ kpaatɛna ai bↄrɛmɛ? Tó Dii nɛ́ Ludamɛ, à tɛ́zi. Tó Baalimɛ sↄ̃, à tɛ́zi. Aↄ̃ↄe yãke siàlaro, 
ben Ilia bèńnɛ: Dii annabinↄ tɛ́ mámbe ma gↄ̃ mado. Baali tãagbãgbãrinↄ sↄ̃, gↄ̃ↄn wàa plaa kpɛ́ baplaa akurimɛ. 
À zùswareenↄ kpáwa mɛ̀n plaa, tãadee pìnↄ à mɛ̀n doo sɛ́ aↄ̃ zↄ̃zↄ̃kↄ̃rɛ wà ká yàkala, aↄ̃ton tɛ́ naaro. Mamↄma sↄ̃, mɛ́ à doo kɛkɛ mà ká yàkala, mɛ́ tɛ́ naa sero. 
Aↄ̃mↄnnↄ é Baali sísi, mamↄma sↄ̃ mɛ́ Dii sísi. Aↄ̃ gbɛ̃ kɛ̀ mà, ben à sù tɛ́o, àmbe Luda ũ. Ben baade píngi bè: Yã maaamɛ! 
Ben Ilia bè tãadee pìnↄnɛ: À zùsware mɛ̀n doo sɛ́ à kɛkɛ káaku, zaakɛ ámbe á pari. À a tãa sísi, mↄde àton tɛ́ naaro. 
Ben aↄ̃ zùswaree kɛ̀ wà kpàḿma sì aↄ̃ kɛ̀kɛ, ben aↄ̃ↄe Baali sisii zaa kↄngↄ ai ↄfãntɛ̃ gàa káo mìdangura. Aↄ̃ↄe ↄ̃ wãa, aↄ̃ↄe ligaa sa'okii kɛ̀ wà bòzi, aↄ̃ↄe bee: Baali, nɛ́ yã mawaroo? Baa kↄ̃n beeeo aↄ̃ↄe yãke maro, èe yã maḿmaro. 
Kɛ̀ ↄfãntɛ̃ kà mìdangura, ben Ilia e ń lalandi kɛɛ à bè: À wii lɛ́ gbãa à kaara, à dɛ diimɛ gwɛɛ! Ke à laasuu tà gu pãndeamɛ. Ke à gàa bĩikpɛɛ kɛmɛ. Ke à gàa wɛ́tɛamɛ. Ke èe ii oomɛ, ben ée à vuroo? 
Ben aↄ̃ↄe wii lɛɛ kↄ̃n kòto gbãaao, aↄ̃ↄe ń zĩnda lilii kↄ̃n fɛ̃ɛdaao kↄ̃n sário lán aↄ̃ↄ kↄ̃ dↄ̃o nà, ai aru e plaa ń mɛ̀a. 
Kɛ̀ ↄfãntɛ̃ gò mìa, ben aↄ̃ↄe yã yaa ai sa uusiɛ ogurↄↄ gàa à kào. Baa kↄ̃n beeeo èe yãke síńlaro, èe yã maḿmaro, èe swã kpáńziro. 
Ben Ilia bè pariinɛ: À sↄ̃mazi kɛ̀! Kɛ̀ aↄ̃ sↄ̃̀zi ń píngi, ben à Dii gbãgbãkii kɛ̀ gbòro kɛ̀kɛ èe boo. 
À gbɛ̀ sɛ̀sɛ mɛ̀n kuri awɛɛplaa Yakubu boriinↄ pari lɛ́n. Yakubun Dii yã ònɛ yã à bè wàgae benɛ sa Isaraili. 
Kɛ̀ à Dii gbãgbãkii pì bò, ben à wɛ̀ɛ yↄ̃̀ à lìgazi. Wɛ̀ɛ pì kà à í sí lita gɛ̃ro. 
À yàka kà sa'okii pìla, à zù pì zↄ̃̀zↄ̃kↄ̃rɛ à kà yàka pìa à bè: À í tↄ́ lo siigↄ̃, é ká sa'opↄ pìa kↄ̃n yàka pìo. 
Kɛ̀ aↄ̃ↄ tↄ̀, ben à bè: À ɛara à tↄ́ dↄ. Kɛ̀ aↄ̃ↄ tↄ̀, ben à bè: À ɛara à tↄ́ à kɛ gɛ̃̀n aagↄ̃. Ben aↄ̃ↄ tↄ̀ ai gɛ̃̀n aagↄ̃. 
Í pì bàa lɛ̀ à lìga sa'okii pìzi ai wɛ̀ɛ pì pà. 
Sa uusiɛ ogurↄ ben annabi Ilia sↄ̃̀zi à bè: Dii, Ibraĩ kↄ̃n Isaakuo kↄ̃n Isarailio Luda, ǹ tó wà dↄ̃ gbã̀a kɛ̀ ḿbe Isarailinↄ Luda ũ bensↄ̃ n zↄ̀blerin ma ũ, mɛ́ɛ yã kɛ̀ kɛɛ kɛ̀ ḿbe n ma dan yãnzi. 
Ǹ yã mama Dii! Ǹ yã mama, lɛ gbɛ̃ kɛ̀nↄ e wà dↄ̃ kɛ̀ Dii, ḿbe ń Luda ũ bensↄ̃ nɛ́ɛ ń nↄ̀sɛ liɛńnɛ lɛ aↄ̃ ɛara wà summa. 
Ben Dii tɛ́ sù sa'obↄ pìa kↄ̃n yàkao kↄ̃n gbɛ̀nↄ kↄ̃n bùsuo, aↄ̃ tɛ́ kũ̀, ben í kɛ̀ kú wɛ̀ɛ pìn bàba. 
Kɛ̀ gbɛ̃nↄↄ è, ben aↄ̃ dàɛ ń puua wà bè: Diimɛ Luda ũ! Diimɛ Luda ũ! 
Ben Ilia dàńnɛ à bè: À Baali tãagbãgbãri pìnↄ kũkũ, aↄ̃ gbɛ̃ke tón pitiaguro. Kɛ̀ wà ń kũkũ, ben Ilia gàańyo Kisↄ̃ guzurɛn à ń dɛdɛ gwe. 
Ilia bè Ahabunɛ: Ǹ gá pↄ́ ble ǹ í mi, zaakɛ ma lou kĩi mà dↄ. 
Ben Ahabu gàa pↄ́ ble à í mi. Ben Ilia dìdi à gàa Kamɛli mìsↄ̃ntɛ̃a à vɛ̃̀ɛ à mì kà tú. 
À bè a zĩkɛrinɛ: Ǹ gá guu gwa ísiaa kpa. Ben à gàa à gwà. Kɛ̀ à sù à bè: Pↄ́kee kú gwero. Ben Ilia bènɛ à ɛara à gá gwa dↄ, ben à gàa lɛ ai gɛ̃̀n swɛɛplaa. 
À gɛ̃̀n swɛɛplaadeeo zĩkɛri pì bè: Ma lou sèeda è sɛtɛɛgɛ lán ↄla bà, èe fɛɛɛ ísiaala. Ben Ilia bènɛ: Ǹ gá ǹ o Ahabunɛ à sↄ̃goro dↄ sↄ̃nↄa à gɛ̃n à pita kpiiia ai lou gↄ̃ gá à dãdã. 
Lou e sisii busɛbusɛ, zàga'ĩa fɛ̀ɛ, ben lou mà maamaa. Ahabu kú sↄ̃goron, èe taa Yɛzɛrili. 
Dii gbãaa mↄ̀ Iliaa, ben à a utadaa kàkakↄ̃a à kũ̀, à bàa lɛ̀ à Ahabu kɛ̃̀ ai à gàa káo Yɛzɛrili. 
