﻿1 KINANƆ.
9.
Kɛ̀ Sulemanu Dii ua kàɛ à yã̀a kↄ̃n a uao kↄ̃n zĩi kɛ̀ à pↄↄ kúanↄ píngi, 
ben Dii ɛ̀ara à bↄ̀ à mↄ̀zi à gɛ̃̀n plaadeeo lán à bↄ̀ à mↄ̀zi Gibiↄ̃ nà 
à bènɛ: Ma adua kɛ̀ ń kɛ̀ kↄ̃n agbaa kɛ̀ ń kpàmɛɛo mà. Ma kpɛ́ kɛ̀ ń bò pì dìɛ ma pↄ́ ũ, ma tↄ́ égↄ̃ kúa yãana sai. Ma wɛ́ɛ égↄ̃ kúa, ma pↄↄ égↄ̃ kúa. 
Mpi sↄ̃, tó ń tɛ́ ma zɛ́n súusu kↄ̃n nↄ̀sɛ puraao lán n de Dauda bà, tó ń yã kɛ̀ má dìɛnnɛɛnↄ kũna kↄ̃n ma yã'onnɛnanↄ, tó nɛ́ɛ ma ↄdↄkii gwaa, 
mɛ́ n kpata kãsãa pɛ́ɛ Isarailinↄ tɛ́, eégↄ̃ yãana vĩro, lán ma à lɛ́ gbɛ̃̀ n de Daudanɛ nà, ma bè à boriinↄ égↄ̃ kú Isaraili kpatan gurↄ píngi. 
Tó mpi ke n nɛ́nↄ kpɛɛ lìmɛ sↄ̃, tó á ma dokayãnↄ kↄ̃n yã kɛ̀ má dìɛareenↄ kũnaro, tó a gaa a dↄ tãanↄzi ai ée ń gbãgbãa, 
mɛ́ Isarailinↄ bↄɛ bùsu kɛ̀ má kpàḿman, mɛ́ gí kpɛ́ kɛ̀ má dìɛ ma pↄ́ ũu pìzi, aↄ̃é gↄ̃ fabona pↄ́ ũ, pena pↄ́ ũ bori pínginɛ. 
Baa kↄ̃n kpɛ́ pì naasikɛɛo, à yã é bↄ gbɛ̃ kɛ̀ aↄ̃ↄe gɛ̃tɛɛ à saɛnↄ saɛ. Aↄ̃é sio gá wà be: À kɛ̀ dia Dii kɛ̀ bùsu kɛ̀ kↄ̃n kpɛ́ kɛ̀onɛ lɛɛ? 
Weé beńnɛ: Kɛ̀ aↄ̃ pã kpà Dii ń Luda kɛ̀ à ń dezinↄ bↄ̀ɛ Igipitizi yãnzimɛ. Aↄ̃ zɛ̀ kↄ̃n tãanↄ, aↄ̃ↄe ń gbãgbãa aↄ̃ↄe kuɛɛńnɛ. Beee yãnzin Dii mↄ́nzi beee kpàńzi píngizi. 
Sulemanu ua mɛ̀n plaaa pìnↄ kàɛ wɛ̃̀ baromɛ, Dii ua kↄ̃n à zĩnda uao. Beee gbɛran 
à Galili bùsu wɛ́tɛ kpà Taya kí Hiramua mɛ̀n baro, zaakɛ Hiramu sida lí kↄ̃n pini lío kↄ̃n vurao kpàa lán à yezi nà. 
Kɛ̀ Hiramu bↄ̀ Taya à gàa à wɛ́tɛ kɛ̀ Sulemanu kpàawaanↄ gwà, èe kɛnɛro, 
ben à bè: Ma gbɛ̃, wɛ́tɛ kparee takanↄn ń kpàma gwee? Ben wà tↄ́ kpà guu pìnɛ Kabulu ai kↄ̃n a gbã̀ao. 
Hiramu gĩakɛ à vura kpã̀sã Sulemanunɛ yã tↄn siigↄ̃. 
Gbɛ̃ kɛ̀ Sulemanu ń dá zↄ̀zĩinnↄ yãn yɛ̀. Gbɛ̃ pìnↄ bé wà Dii ua kↄ̃n Sulemanu uao zĩi kɛ̀. Aↄ̃ Milo wɛ̀ɛ tàta kↄ̃n bùsuo, aↄ̃ Yerusalɛmu bĩi bò, aↄ̃ ɛ̀ara wà Azo kↄ̃n Mɛgidoo kↄ̃n Gɛzao kɛ̀kɛ wà kàɛ. 
Igipiti kí Fili'auna lɛ̀ɛ Gɛza pìa yã, ben à sì à tɛ́ sↄ̃̀a à Kanaa kɛ̀ aↄ̃ↄ kú à guunↄ dɛ̀dɛ, ben à kpà a nɛ́nↄgbɛ̃a zãkɛna gbaa ũ gurↄↄ kɛ̀ à à kpã̀sã Sulemanua. 
Ben Sulemanu ɛ̀ara à Gɛza pì kɛ̀kɛ à kàɛ kↄ̃n Bɛtoroni gĩzĩ pↄ́o 
kↄ̃n Baalao kↄ̃n Tadamↄ kɛ̀ kú à bùsu gbáan-o 
kↄ̃n wɛ́tɛ kɛ̀ à kũsãɛ kàɛnnↄ kↄ̃n wɛ́tɛ kɛ̀ à sↄ̃goronↄ kↄ̃n à sↄ̃nↄↄ kúnnↄ kↄ̃n kpɛ́ kɛ̀ à yezi à dↄ Yerusalɛmunↄ kↄ̃n Lɛbanↄo kↄ̃n bùsu kɛ̀ èe kí bleeanↄ píngi. 
Borii kɛ̀ aↄ̃ↄ dɛ Isaraili ũroonↄ: Amↄrinↄ, Itinↄ, Pɛrizinↄ, Ivinↄ kↄ̃n Yebusi kɛ̀ aↄ̃ gↄ̃̀nↄ ń píngi, 
gbɛ̃ kɛ̀ Isarailinↄↄ e fↄ̃ wà ń dɛdɛroonↄ, aↄ̃ borii kɛ̀ aↄ̃ gↄ̃̀ ń bùsu pìnnↄn Sulemanu ń dá zↄ̀zĩin, ben aↄ̃ègↄ̃ zĩi pì kɛɛ lɛ ai kↄ̃n a gbã̀ao. 
Èe Isarailinↄ da zↄ̀zĩinlo. Aↄ̃mbe à ń díɛ a zĩ̀kpɛɛnↄ ũ, a ìbanↄ, a kína daanↄ, a gbɛ̃nↄ dↄn'aɛdeenↄ, a sↄ̃gorodeenↄ, a sↄ̃deenↄ. 
Aↄ̃mbe zĩi kɛ̀ wèe kɛɛ pì gbɛ̃nsinↄ ũ dↄ, aↄ̃ↄ gↄ̃ↄn wàa plaa kpɛ́ baswɛɛplaa akuri. 
Kɛ̀ Fili'auna nɛ́nↄgbɛ̃ bↄ̀ Dauda wɛ́tɛ à tà a kpɛ́ kɛ̀ Sulemanu bònɛn, à gbɛran Sulemanu Milo wɛ̀ɛ tàta. 
Wɛ̃̀ kↄ̃n wɛ̃̀o Sulemanu ègↄ̃ saa oo gɛ̃̀n aagↄ̃gↄ̃. È sa'opↄ kɛ̀ wè ká tɛ́n à tɛ́ kũ kↄ̃n kɛnnakↄ̃o sa'opↄo o sa'okii kɛ̀ à bò Diinɛa, è tuaetiti kpata Dii aɛ gwe dↄ. Lɛn à Dii ua zĩinↄ kɛ̀ lɛ mámmam. 
Kí Sulemanu góro'itɛnↄ kɛ̀ Ɛziↄ̃ Gɛba Elata saɛ Ɛdↄmunↄ bùsun Isia Tɛ̃a lɛ́a. 
Hiramu a górodee kɛ̀ aↄ̃ ísiaa dↄ̃ↄnↄ zĩ̀, ben aↄ̃ dà ísiaala lɛdo kↄ̃n Sulemanu gbɛ̃nↄ. 
Aↄ̃ gàa Ofi, aↄ̃ vura sɛ̀ɛ gwe tↄn gɛ̃ro aↄ̃ sùo kí Sulemanunɛ. 
