﻿2 SAMUƐLI.
22.
Kɛ̀ Dii kí Dauda bↄ̀ Solu kↄ̃n à ibɛɛ kpaaanↄ ↄzĩ, à lɛ̀ dà kↄ̃n Dii tↄ́o 
à bè: Diin ma gbɛ̀si kↄ̃n ma zɛki gbãaao ũ, ma mìsirimɛ. 
Ma Ludan ma gbɛ̀si ũ, mɛɛ̀ nazi. Àmbe ma sɛngbango ũ ma mìsiri gbãa kↄ̃n ma gulezĩo, ma utɛki kↄ̃n ma bↄkiio, è ma sí gbɛ̃ pãsĩnↄa. 
Dii kà wà à sáabu kpá. Mɛɛ̀ à sísi, è ma bↄ ma ibɛɛnↄ ↄzĩ. 
Góro'itɛ vlɛ̃̀ɛmao, ísↄ̃ kɛ̀ è ń kaatɛ e ma blee. 
Mira bànↄ lìgamazi, gaa takutɛɛ kpàkpamɛ ma aɛ. 
Kɛ̀ má kú nawɛ̃a guu lɛ, ma Dii sìsi, ma wii pɛ̀ ma Ludazi, ben à ma kòto mà zaa a bɛ, ma wiii kà à kiia, à gɛ̃̀ à swãn. 
Tↄↄtɛ lùgaluga à nìgãnigã, kpiiinↄ dègedege ai ń kãsãan. Aↄ̃ lùgaluga kɛ̀ à pↄ fɛ̃̀ yãnzi. 
Tɛ́sukpɛ bↄ̀ à yĩzĩ, tɛ́ kɛ̀ è ń kpata bↄ̀ à lɛ́n, à yↄ̃̀nↄↄ e tɛ́ kɛɛ à aɛ. 
À musu wɛ̃̀ à pìta, lou sìsi à gbá gĩzĩ. 
Èe vĩaa dina kɛrubu kpɛɛ, èe yàa paa ĩala. 
À gusiaa dà a zĩndala, ludambɛ sia kũ̀ à kúkiila. 
Zaa à gakui tɛ́kɛna guu lou e pii pãsĩpãsĩ. 
Dii pàta zaa musu, Luda Musude kòto dↄ lapatana ũ. 
À kà fã̀ ma ibɛɛnↄa à ń fãakↄ̃a, à tò lou pìḿma à pɛ̀ḿma. 
Kɛ̀ Dii pàtaḿma, kɛ̀ à pↄ́ bↄ̀ a yĩzĩ, ísia tↄↄtɛ bↄ̀ gupuraaa, anduna kãsãa gↄ̃̀ kaɛna pↄ̃tɛ̃. 
À ↄ bↄ̀ zaa musu à ma kũ, à ma bↄ swadaa guu. 
À ma si ma ibɛɛ gbãaa ↄzĩ kↄ̃n ma zanguri kɛ̀ aↄ̃ gbãaa dɛmalaanↄ. 
Aↄ̃ lɛ̀ɛma ma mↄ́nzikɛgurↄ, mↄde Dii zɛ̀mao. 
À ma bↄ à ma gba mɛ̀porokii, à ma mì sì, kɛ̀ à yemazi yãnzi. 
Dii yã kɛ̀mɛ ma nↄ̀sɛ maa lɛ́n, à fĩa bòmɛ ma gbãsĩsaikɛ lɛ́n. 
Zaakɛ má Luda yãdiɛnanↄ kũna, mɛ́ɛ à zaaa kɛ ma a Luda tònlo. 
À dokayãnↄ ègↄ̃ dↄↄmɛ aɛ píngi, mɛ́ɛ kpɛɛ li yã kɛ̀ à dìɛnↄnɛro. 
Má kuuna taari vĩ Diinɛro, má a zĩnda kũna durun sai. 
Dii fĩa bòmɛ ma nↄ̀sɛ maa lɛ́n, zaakɛ à è má kuu gbãsĩ sai. 
Náanɛdeen n ũ náanɛdeenↄnɛ, taarisaideen n ũ taarisaideenↄnɛ. 
Ń wásawasa gbɛ̃ wásawasanↄnɛ, mↄde nɛɛ̀ íbɛtɛ kpá kↄ̃n gbɛ̃ dↄ̀rↄsaideenↄo. 
Nɛɛ̀ zĩndabusarinↄ mì sí, nɛɛ̀ gbɛ̃ kɛ̀ aↄ̃è ń zĩnda sɛ́ lezĩnↄ sↄ̃ɛ. 
Dii, ḿbe ma fitia ũ, Dii, nɛɛ̀ ma gusiaa liɛ gupuraa ũ. 
Kↄ̃n n gbãaao mɛ́ fↄ̃ mà kù kpá karaa, ma Luda gãzĩ mɛ́ fↄ̃ mà vĩ gũ̀la. 
Luda kɛ̀kii sↄ̃ yãkɛna bↄɛzina, Dii yã see vĩro, à wásawasa, à dɛ sɛngbango ũ gbɛ̃ kɛ̀ aↄ̃ nàzinↄnɛ. 
Dii baasiro, dén Luda ũu? Wa Luda baasiro, dén gbɛ̀si ũu? 
Luda bé è ma gba gbãaa, àmbe è zɛ́ poromɛ súusu. 
È tó ma gbá kãi gↄ̃ nna lán zↄ̃ pↄ́ bà, è tó màgↄ̃ táa oo gulezĩnↄ musu. 
È zĩ̀kana dadamɛ, ai ma gã̀sã é fↄ̃ à mↄ̀gotɛ̃ sá gá. 
Nɛɛ̀ n zĩ̀blesɛngbango kpáma, nɛɛ̀ naɛ ǹ ma tↄ́ bↄ. 
Nɛɛ̀ ma zɛ́ yàasa kũmɛ, lɛ ma gbá tón sataro. 
Ma pɛɛ ma ibɛɛnↄzi ma ń dúgu zↄ̃̀, mɛ́ɛ ɛara mà suro, sé kɛ̀ ma gaa ma ń dɛdɛ. 
Ma ń wiwi dúgudugu, aↄ̃ↄe fↄ̃ wà fɛ̀ɛ dↄro, aↄ̃ lɛ̀ɛ wà gↄ̃̀ kaɛna ma gbá gĩzĩ. 
N ma gba gbãaa ma zĩ̀ kào, ń tò ma ibɛɛnↄ mì nàɛmɛ. 
Ń tò ma zangurinↄ kpɛɛ lì, ben ma a ibɛɛ pìnↄ kàatɛ. 
Aↄ̃ wii lɛ̀, gbɛ̃kee e ń mì síro, aↄ̃ lɛ́ zù Diizi, èe weńlaro. 
Ma ń kɛ́ tíkɛtikɛ lán bùsutiti bà, ma táa òḿma lán zɛ́ guu bↄtↄnga bà. 
N ma bↄ ma gbɛ̃ kɛ̀ aↄ̃ fɛ̀ɛmaziinↄ ↄzĩ, n ma kɛ boriinↄ mìdee ũ. Borii kɛ̀ má ń dↄ̃roonↄ è zↄ̀ blemɛ, 
bori zĩ̀tↄnↄ è na ń sàsaa ma aɛ. Tó aↄ̃ ma yã mà, aↄ̃è mì siɛmɛ. 
Aↄ̃ kã è ga, aↄ̃è bↄ ń zɛki gbãaanↄn kↄ̃n luganao. 
Dii kuu! Aubarikadeen ma gbɛ̀si ũ! Wà Luda ma gbɛ̀si ma mìsiri tↄ́ bↄ! 
Luda bé è gɛ̃ɛ bomɛ, è tó boriinↄ mì siɛmɛ, 
è tó mà piti ma ibɛɛnↄn. N ma gba gbãaa dɛ ma zangurinↄla, n ma bↄ gbɛ̃ pãsĩnↄ ↄzĩ. 
Beee yãnzi mɛ́ n sáabu kpá boriinↄ tɛ́, mɛ́ n tↄ́ kpá, Dii. 
Dii è zĩ̀ bíta ble kína kɛ̀ à à sɛ̀nɛ, è gbɛ̃kɛɛ kɛ kína kɛ̀ à à kànɛ, mamↄma Dauda kↄ̃n ma boriinↄo ai gurↄ píngi. 
