﻿1 SAMUƐLI.
10.
Ben Samuɛli nↄ́si tùu sɛ̀ à nↄ́si kù Solunɛ a mìa, ben à lɛ́ pɛ̀a à bè: Dii bé à n diɛ dↄn'aɛdee ũ a gbɛ̃ Isarailinↄnɛ. Nɛ́ kí ble Dii gbɛ̃nↄnɛ ǹ ń bↄ ń ibɛɛ kɛ̀ aↄ̃ ligańzinↄ ↄzĩ. Sèeda kɛ̀ eé tó ǹ dↄ̃ kɛ̀ Dii bé à n diɛ a gbɛ̃nↄ dↄn'aɛdee ũun yɛ̀. 
Tó wa kɛ̃kↄ̃a kɛ̀ tia, nɛ́ da gↄ̃ↄn plaaanↄlɛ Zɛlɛza, Rasɛli mira saɛ, Bɛyãmi bùsu lɛ́zɛkiia. Aↄ̃é bennɛ: Wà zaaki kɛ̀ n gaa wɛtɛɛnↄ è. Aↄ̃ yã n de kũna gbãa dↄro, n yã kã̀hãnn èe kɛɛ sa, èe bee dian é kɛ a nɛ́ yã musu nà? 
Bↄna gwe, tó n gaa aɛ, tó n ka gbíi lí beee kiia zaa Tabo, gↄ̃ↄn aagↄ̃ↄ é danlɛ gwe dↄ, aↄ̃ↄe gaa Luda gbãgbã zaa Bɛtɛli. Aↄ̃ gbɛ̃ doo blènɛnↄ kũna mɛ̀n aagↄ̃, aↄ̃ gbɛ̃ doo burɛdi kũna mɛ̀n aagↄ̃, ben aↄ̃ gbɛ̃ doo geepiwɛ̃ kũna tùu do. 
Aↄ̃é n aafia gbeka, aↄ̃é burɛdi mɛ̀n plaaa kpámma, nɛ́ sí. 
Beee gbɛra tó n ka Luda sĩ̀sĩ kɛ̀ kú Gibɛa, guu kɛ̀ Filisitininↄ gudãkpakii kún, tó n ka kĩi kↄ̃n wɛ́tɛ pìo, nɛ́ kpákↄ̃a kↄ̃n annabinↄ aↄ̃ↄ tɛ́tɛkↄ̃zi, aↄ̃ↄe pitaa gbãgbãkiia. Wèe dↄↄńnɛ aɛ kↄ̃n kuntiginↄ kↄ̃n gã̀gãnↄ kↄ̃n kurenↄ kↄ̃n mↄrↄnↄ, aↄ̃ↄe annabikɛyã oo. 
Dii Nini é summa, nɛ́ annabikɛyã ońyo, nɛ́ li gbɛ̃ dufu ũ. 
Tó sèeda beeenↄ kɛ̀ lɛ, ǹ yã kɛ̀ n à kɛna zɛ́ è kɛ, zaakɛ Ludaa kúnyo. 
Ǹ dↄmɛ aɛ gana Giligala, mɛ́ n le gwe, mɛ́ sa'opↄ kɛ̀ wè ká tɛ́n à tɛ́ kũ o kↄ̃n kɛnnakↄ̃o sa'opↄo. Ǹ ma dã gwe ai gurↄ swɛɛplaa, mɛ́ mↄ́ mà n le gwe, mɛ́ yã kɛ̀ nɛ́ kɛɛ onnɛ. 
Kɛ̀ Solu kpɛɛ lì Samuɛlinɛ, èe taa, Luda à nↄ̀sɛ lìɛnɛ, ben sèeda pìnↄ kɛ̀ zĩ beee zĩ píngi. 
Kɛ̀ aↄ̃ kà Gibɛa, annabinↄ dààlɛ aↄ̃ↄ tɛ́tɛkↄ̃zi, ben Luda Nini sùa, èe annabikɛyã oońyo. 
Kɛ̀ gbɛ̃ kɛ̀ aↄ̃ↄ à dↄ̃ↄnↄ à è, èe annabikɛyã oo kↄ̃n annabinↄ, aↄ̃ kↄ̃ làla wà bè: Bↄ́ bé à Kisi nɛ́ lèee? Solu kú annabinↄ tɛ́mɛ see? 
Ben Gibɛa gbɛ̃ke yã wèńla à bè: Gbɛ̃ kpaaanↄ denↄn dénↄ ũ sↄ̃ↄ? Ben à gↄ̃̀ pena pↄ́ ũ wè be: Solu kú annabinↄ tɛ́mɛ see? 
Kɛ̀ Solu annabikɛyã ò à yã̀a, ben à gàa gbãgbãkii pìa. 
Kɛ̀ Solu tà bɛ kↄ̃n a zĩkɛrio, à desɛ̃ ń lá à bè: A gaa mámɛ? Solu wèàla à bè: Wa gaa zaakinↄ wɛtɛmɛ. Kɛ̀ wée ń ero, ben wa gaa Samuɛli kiia. 
Ben Solu desɛ̃ bènɛ: Yã kɛ̀ Samuɛli òaree tↄ̃kɛ̃mɛ. 
Ben Solu bè: À bèwe wà zaaki pìnↄ è. Mↄde èe kpata yã kɛ̀ Samuɛli ònɛ tↄ̃kɛ̃nɛro. 
Ben Samuɛli Isarailinↄ kàkↄ̃a Dii aɛ Mizipa. 
À bèńnɛ: Dii a Luda bè, a a bↄɛ Igipiti, a a si Igipitinↄ kↄ̃n borii kɛ̀ aↄ̃ ↄ tↄ̃̀awaanↄ ↄzĩ ń píngi. 
Luda a bↄ a yã'ↄ̃ammanↄ kↄ̃n a nawɛ̃akɛnanↄ guu píngi, ben a gizi gbã̀a, a bènɛ à kí káare kpatan. Tↄ̀, à mↄ́ à zɛ Dii aɛ sa bori kↄ̃n boriio, ualɛ kↄ̃n ualɛo. 
Kɛ̀ Samuɛli mↄ̀ kↄ̃n Isaraili boriinↄ ń píngi, ben Bɛyãmi boriinↄ kàbankpɛ blè. 
Ben à mↄ̀ kↄ̃n Bɛyãmi boriinↄ ualɛ kↄ̃n ualɛo. Ben Matari ua kàbankpɛ blè. Uadee pìnↄ tɛ́ Kisi nɛ́ Solu bé à blè. Kɛ̀ wà à wɛ̀tɛ, wèe à ero. 
Ben wà ɛ̀ara wà Dii là dↄ wà bè: Gↄ̃gbɛ̃ pì mↄ̀ kɛ̀ kↄ̀ↄ́? Ben Dii bè: À utɛna asoonↄ dagura. 
Ben wà bàa lɛ̀ wà gàa wà à bↄ̀ wà sùo ń tɛ́. Kɛ̀ à zɛ̀ ń tɛ́, aↄ̃ píngi gbã̀a zɛ̀ à gã̀ lɛ́n. 
Ben Samuɛli bèńnɛ ń píngi: A gbɛ̃ kɛ̀ Dii sɛ̀ èↄ́? Gbɛ̃kee kuu lán à bà a tɛ́ro. Ben baade píngi wii lɛ̀ wà bè: Luda wa kína dↄ̃ kↄ̃n aafiao! 
Ben Samuɛli kíblena zɛ́ bↄ̀kↄ̃tɛńnɛ, ben à kɛ̃̀ takadan à dìɛ Dii kpɛ́n. Ben à ń gbáɛ, baade tà a bɛ. 
Solu sↄ̃ tà a bɛ zaa Gibɛa. Gↄ̃ wↄ́rↄngↄdee kɛ̀ Luda zĩi kɛ̀ ń swɛ̃̀ guunↄ tɛ̀zi. 
Ben gbɛ̃ pã kenↄ bè: Gbɛ̃ beee bé eé wa mì síↄ́? Ben aↄ̃ kya kàn, aↄ̃ↄe mↄ́nɛ kↄ̃n pↄ́keoro, mↄde Solu a yĩtɛɛ o. 
