﻿NARONA.
24.
Kɛ̀ Balamu è sa maa ona Isarailinↄnɛ kà Diin, èe gá màso kɛ lán yãa bà dↄro, ben à aɛ dↄ̀ gbáaa. 
Kɛ̀ à wɛ́ɛ zù, ben à Isarailinↄ è kaɛna ń boriia. Luda Nini pìtaa, 
ben à yã kɛ̀ à è ò à bè: Bɛↄ nɛ́ Balamu yãn yɛ̀, mamↄma kɛ̀ ma wɛ́ɛ kɛ̃na yãn yɛ̀. 
Mamↄma kɛ̀ mɛɛ̀ Luda yã ma yãn yɛ̀. Ma Gbãapingide wɛ́ɛgupu è, má daɛna ma puua, ma wɛ́ɛ wɛ̃na. 
Yakubu boriinↄ bùrakaɛna maa fá! Isaraili bisakutaanↄↄ maa! 
Aↄ̃ kaɛna lán guzurɛ dàkonↄ bà, lán swa dↄ̀rↄ kara búnↄ bà. Aↄ̃ↄ dɛ lán zà lí kɛ̀ Dii bànↄ bà, lán sida lí kɛ̀ aↄ̃ↄ kú í saɛnↄ bà. 
Í é ń orozãnↄ pa yɛ́lɛlɛ, aↄ̃ pↄ́tↄ̃nanↄ é í e maamaa. Aↄ̃ kína gbãaa égↄ̃ dɛ Agagala, aↄ̃ kpata é tↄ́ bↄ. 
Luda ń bↄ́ɛ Igipiti, aↄ̃ gbãaa vĩ lán zùsɛ̃tɛ bà. Aↄ̃è zĩ̀ ble borii kɛ̀ aↄ̃ íbɛtɛ kpàńyonↄa, aↄ̃è ń wánↄ wíwi aↄ̃è ń pápa kào. 
Aↄ̃è sↄ̃pɛɛ wà daɛ lán músu bà, dé bé eé fↄ̃ à ń fɛɛɛ? Luda aubarika da gbɛ̃ kɛ̀ aↄ̃é sa maaa ońnɛnↄn, à gbɛ̃ kɛ̀ aↄ̃é sa zaaa ońnɛnↄ ká. 
Balaki pↄ fɛ̃̀ Balamuzi à ↄnɛtee dↄ̀a à bè: Ma ibɛɛnↄ kana yãnzin ma n sisizi, ben n sa maaa òńnɛ gɛ̃̀n aagↄ̃ↄ́? 
Ǹ tá n bɛ tia gↄ̃ↄ. Ma bè mɛ́ gbaa kɛnnɛmɛ yã, mↄde Dii gìnnɛ ǹ láada e. 
Balamu bènɛ: Mɛ́ɛ o gbɛ̃ kɛ̀ n ń zĩmaanↄnɛroo! 
Ma bè baa tó n ma gba n bɛɛ kɛ̀ pana kↄ̃n kondogio kↄ̃n vurao, mɛ́ bↄ Dii yã kpɛɛ mà yã kɛ kↄ̃n ma zĩnda pↄyezioro, à maaa ke à zaaa. Yã kɛ̀ Dii bè mà oon mɛ́ o. 
Mɛ́ɛ taa ma gbɛ̃nↄ kiia sa. Ǹ mↄ́ mà onnɛ lán gbɛ̃ pìnↄ é kɛ n gbɛ̃nↄnɛ nà zia. 
Ben Balamu yã kɛ̀ à è ò à bè: Bɛↄ nɛ́ Balamu yãn yɛ̀, mamↄma kɛ̀ ma wɛ́ɛ kɛ̃na yãn yɛ̀. 
Mamↄma kɛ̀ mɛɛ̀ Luda yã ma yãn yɛ̀. Má Luda Musude nↄ̀sɛguuyã dↄ̃. Ma Gbãapingide wɛ́ɛgupu è, má daɛna ma puua, ma wɛ́ɛ wɛ̃na. 
Mɛ́ɛ Isarailinↄ ee, èe kɛ tianlo, mɛ́ɛ ń gwaa, à gurↄↄ e ká gĩaro. Sↄsↄnɛ é bↄ Yakubu boriinↄ tɛ́, kpatableri é bↄ Isarailinↄ tɛ́, eé Mↄabunↄ mì wíwi, eé zↄkakari pìnↄ mìwatoro fↄ̃fↄ̃. 
Ɛdↄmunↄ bùsu é gↄ̃ à pↄ́ ũ, à ibɛɛ Sei bùsu é gↄ̃ à pↄ́ ũ, Isarailinↄ gbãaa égↄ̃ kaaramɛ. 
Yakubu bori ke é kí bleḿma, eé gbɛ̃ kpaaa kɛ̀ aↄ̃ gↄ̃̀nↄ kaatɛ. 
Balamu Amalɛki boriinↄ è, ben à yã kɛ̀ à è ò à bè: Amalɛki boriinↄ nɛ́ boriinↄ mìdeemɛ, mↄde aↄ̃é kaatɛ zãa. 
Kɛ̀ Balamu Keninↄ è, ben à yã kɛ̀ à è ò à bè: A kúkii gbãa gíngin, a sà kú gbɛ̀ musu. 
Baa kↄ̃n beeeo weé a kaatɛmɛ, Asirianↄ é a kũkũ zĩ̀zↄnↄ ũ. 
Balamu yã kɛ̀ à è ò dↄ à bè: O'o, tó Ludaa kɛ̀ lɛ, dé bé eé bↄↄ? 
Góro'itɛnↄ é bↄ Sipiru bùsun, aↄ̃é zĩ̀ ble Asirianↄ kↄ̃n Eberunↄa, mↄde aↄ̃pinↄ é kaatɛmɛ se. 
Balamu fɛ̀ɛ à tà a bɛ, ben Balaki dà zɛ́n se. 
