﻿NARONA.
11.
Isarailinↄ zↄka kà Diizi ń nawɛ̃akɛna yãnzi. Kɛ̀ Dii mà, à pↄ fɛ̃̀, ben à tɛ́ fɛ̀ɛ ń tɛ́, aↄ̃ bùra kpadoo tɛ́ kũ̀. 
Ben gbɛ̃nↄ wii pɛ̀ Musazi. Kɛ̀ à wɛ́ɛ kɛ̀ Diia, ben tɛ́ pì zɛ̀. 
Ben wà tↄ́ kpà guu pìnɛ Tabera, kɛ̀ Dii tɛ́ fɛ̀ɛ ń tɛ́ gwe yãnzi. 
Bori pãndenↄ kú Isarailinↄ tɛ́, aↄ̃ↄe pↄ́ble pãnde nii dɛɛ, ben Isarailinↄↄ e ↄ́ↄ dↄↄ se wà bè: Mán wé nↄ̀bↄ en wà sóo? 
Wée kpↄ̀ kɛ̀ wá sò Igipiti wa pↄyezia bɛgɛ kɛɛ kↄ̃n plɛ̃̀nↄ kↄ̃n gbɛzɛɛnↄ kↄ̃n ɛfↄnↄ kↄ̃n aubasanↄ kↄ̃n aubasa gizonↄo. 
Tia sa wa lɛ́ gà, zaakɛ weè pↄ́ke ero, tó èe kɛ mana kɛ̀ baasiro. 
Mana pì wɛ́ɛ kete, à dɛ lán lí'ↄↄ bàmɛ. 
Isarailinↄ è sɛ́ɛ wà lↄ́ gbɛ̀n ke aↄ̃è zↄ̃ gón. Aↄ̃è disa wà kàra kɛo. À nna lán kàra tɛ̃ngo bà. 
Tó kpíi kpà bùran gwãavĩ, ben mana pì è kwɛ́ se. 
Musa mà wèe ↄ́ↄ dↄↄ ualɛ kↄ̃n ualɛo. Dii pↄ fɛ̃̀ maamaa, ben à kɛ̀ Musanɛ ĩi 
à bènɛ: Bↄ́yãnzin nɛ́ɛ wɛ́ɛ tãamazi? Ma yã kparee bé à kɛ̀nnɛ zaa, ben n gbɛ̃ pìnↄ gwana asoo dìmɛɛ? 
Mámbe ma gbɛ̃ pìnↄ nↄ̀ sìↄ́? Mámbe ma ń íↄ́? Bↄ́yãnzi n bèmɛ mà ń kú kpɛɛ lán nɛ́dandee bà mà gáńyo bùsu kɛ̀ ń la dà aↄ̃ dezinↄnɛnzi? 
Mákpan mɛ́ nↄ̀bↄ en mà kpá gbɛ̃ pìnↄa ń píngii? Zaakɛ aↄ̃ↄe wii pɛɛmazi wèe bee mà ń gba nↄ̀bↄ wà só. 
Mɛ́ fↄ̃ mà gbɛ̃ pìnↄↄ kú kpɛɛ ń píngi madoro, zaakɛ aↄ̃ asoo dɛmala. 
Tó lɛn nɛ́ kɛmɛ lɛ, ǹ tó ma n pↄnnaa e ǹ ma dɛ gↄ̃ↄ. Ǹton tó mà nawɛ̃a pì kɛ dↄro. 
Ben Dii bènɛ: Ǹ Isaraili gbɛ̃nsi kɛ̀ ń ń dↄ̃ dↄn'aɛdee ũunↄ kakↄ̃a gↄ̃ↄn baaagↄ̃ akuri ǹ mↄ́ńyo dakↄ̃rɛki kuta kiia aↄ̃gↄ̃ kúnyo gwe. 
Mɛ́ pita mà yã onnɛ gwe mà a Ninii kɛ̀ kúmmaa kpadoo go mà dińnɛ, aↄ̃é gbɛ̃nↄ gwana aso sɛ́nyo lɛ ǹtongↄ̃ ń sɛna ndo dↄro yãnzi. 
Ǹ o gbɛ̃nↄnɛ aↄ̃ gbãsĩ bↄ ń zĩndan zia yãnzi, aↄ̃é nↄ̀bↄ e wà só. Zaakɛ aↄ̃ wii pɛ̀mazi wà bè, mán wé nↄ̀bↄ en kɛ̀ wà sóo? Aↄ̃ bè wà sã̀ↄ Igipiti. Beee yãnzin mɛ́ ń gba nↄ̀bↄ aↄ̃ sózi. 
Aↄ̃é só èe kɛ gurↄ donlo, gurↄ plaanlo, gurↄ sↄↄronlo, gurↄ kurinlo, gurↄ baronlo. 
Aↄ̃é só mↄ do gbãngbãn ai à bↄ ń yĩn à nii bↄ ń pↄↄ guu. Zaakɛ mamↄma Dii má kú ń tɛ́, ben aↄ̃ pã kpàmazi. Aↄ̃ zↄka dↄ̀ma wà bè, bↄ́yãnzi wà bↄ̀ Igipitizi? 
Ben Musa bè: Gↄ̃gbɛ̃nↄↄ kúmao tá guu gↄ̃ↄn bↄrↄ wàa aagↄ̃, ben n bè nɛ́ nↄ̀bↄ kpáḿma wà só ai mↄ do gbãngbãn-ↄ́? 
Baa tó wà sãanↄ kↄ̃n zùnↄ dɛ̀dɛ paripari, eé mↄ́ḿmaↄ́? Tó wà ísia kpↄ̀nↄ sɛ̀ɛ píngi, eé mↄ́ḿmaↄ́? 
Dii wèàla à bè: Ma gbãaa é kánloo? Nɛ́ e tia, tó yã kɛ̀ má ònnɛɛ é kɛ ke eé kɛro. 
Musa bↄ̀ à Dii yã pìnↄ òńnɛ. À Isaraili gbɛ̃nsinↄ kàkↄ̃a gↄ̃ↄn baaagↄ̃ akuri à ń zɛ́ wà lìga kutaa pìzi. 
Ben Dii pìta tɛ́luguu guu à yã òo. À a Ninii kɛ̀ kúa kpadoo gò à dì gbɛ̃nsi gↄ̃ↄn baaagↄ̃ akuri pìnↄnɛ. Kɛ̀ à a Ninii pì dìńnɛ lɛ, aↄ̃ annabikɛɛ kɛ̀, beee gbɛra aↄ̃ↄe ɛara wà kɛ̀ dↄro. 
Gbɛ̃ kɛ̀ Musa ń sɛ́ gↄ̃ↄn plaaanↄ gↄ̃̀ bùran, gbɛ̃ doo tↄ́n Ɛlɛdada, gbɛ̃ doo sↄ̃ Mɛdada. Aↄ̃ↄe gá kutaa kiiaro, mↄde Ninii pì sùḿma se, ben aↄ̃ annabikɛɛ kɛ̀ bùran. 
Gↄ̃kparɛ ke bàa lɛ̀ à gàa à bè Musanɛ: Ɛlɛdada kↄ̃n Mɛdadao e annabikɛyã oo bùran. 
Nuni nɛ́ Yↄsuan Musa kpàasi ũ zaa a ↄ̀wazikɛgurↄ, ben à bè: Baa Musa, ǹ gíńnɛ. 
Ben Musa bènɛ: Nɛ́ɛ nↄ̀sɛgↄ̃aanↄ kɛɛńyo ma yã musun yↄ́? Tó Dii a Ninii dì a gbɛ̃nↄnɛ aↄ̃ gↄ̃̀ annabinↄ ũ ń píngi, à maaroo? 
Ben Musa ɛ̀ara bùran kↄ̃n Isarailinↄ gbɛ̃nsi pìnↄo. 
Dii tò ĩa bↄ̀ ísiaa kpa à mↄ̀ kↄ̃n bùrunↄ, aↄ̃ dà bùrala. Aↄ̃ lìga bùrazi baama píngi à kà tágurↄ doo ũ, bensↄ̃ aↄ̃ vĩana lezĩ kà gã̀sãsuu plaa. 
Fãantɛ̃ beeea kↄ̃n gwãavĩo kↄ̃n à gu làa dↄnao aↄ̃ fɛ̀ɛ wà gàa wà bùrunↄ kũ̀kũ. Gbɛ̃ kɛ̀ èe kũkũ bítaroo kũ̀kũ sùu baro. Ben aↄ̃ↄ fã̀ɛ à gàga. 
Kɛ̀ aↄ̃ à nↄ̀bↄ dà ń lɛ́n gↄ̃ↄ, aↄ̃ↄe e wà só bítaro, ben Dii pↄ fɛ̃̀ńzi à gagyãa kàńgu. 
Ben wà tↄ́ kpà guu pìnɛ Lóudeenↄ Mira, zaakɛ gwen wà gbɛ̃ kɛ̀ nↄ̀bↄ lóu ń kũnↄ vĩ̀in. 
Ben Isarailinↄ fɛ̀ɛ gwe aↄ̃ gàa Azero aↄ̃ gurↄplaa kɛ̀ gwe. 
