﻿BƆNA.
31.
Dii yã ò Musanɛ à bè: 
Ǹ ma! Ma Uri nɛ́ Bezalɛli, Uru dio, Yuda borii sɛ̀. 
Má tò ma Ninii kúa, ben à ↄ̃ndↄ̃ kↄ̃n gonio kↄ̃n dↄ̃nao è ↄzĩ píngi guu. 
À zã ble pↄ́nↄa dↄ̃ kↄ̃n vurao kↄ̃n kondogio kↄ̃n mↄ̀gotɛ̃o. 
À gbɛ̀ bɛ̀ɛde ana dↄ̃ kↄ̃n à dana pↄ́ guuo kↄ̃n lí'anao kↄ̃n ↄzĩ sãnda píngio. 
Beee gbɛra ma Aisamaki nɛ́ Ɔↄliabu, Dani borii dìɛ à dↄnlɛri ũ. Ma ↄzĩkɛrinↄ gbà ↄ̃ndↄ̃ↄ ń píngi, lɛ aↄ̃ e wà pↄ́ kɛ̀ má dìɛnnɛɛnↄ kɛ píngi: 
Dakↄ̃rɛki kuta kↄ̃n doka àkpatio kↄ̃n à nɛ́kpaɛo kↄ̃n kpɛ́ pì pↄ́ ketenↄ píngi, 
teebu kↄ̃n a pↄ́ ketenↄ, vura atɛ̃ɛ dabu kↄ̃n a pↄ́ ketenↄ píngi, tuaetitikpatakii, 
sa'opↄ kɛ̀ wè ká tɛ́n à tɛ́ kũ oki kↄ̃n a pↄ́ ketenↄ píngi, dàga kↄ̃n a dibↄo, 
pↄ́kãsãa kɛ̀ wà tã̀nↄ, sa'ori Aruna pↄ́kãsãa kɛ̀ eé sↄ̃omaziinↄ kↄ̃n à nɛ́nↄ sa'opↄkãsãanↄ píngi, 
pↄ́ kyakɛnↄsi kↄ̃n bisakuta tuaetiti gũ nnaao. Aↄ̃ pↄ́ pìnↄ kɛ, lán má dìɛnnɛ nà píngi. 
Dii yã ò Musanɛ à bè: 
Ǹ o Isarailinↄnɛ aↄ̃ kámmabogurↄↄ kɛ̀ má dìɛ yã da, zaakɛ à dɛ sèeda ũ mapi kↄ̃n apinↄ dagura ai a boriia, lɛ à e à dↄ̃ mamↄma Dii ma a sɛ ma gbɛ̃nↄ ũ. 
Àgae kámmabogurↄↄ pì yã da, zaakɛ gurↄↄ pì kuuare adonamɛ. Gbɛ̃ kɛ̀ gurↄↄ pì tɛ̃̀ kɛ̀, adee gàmɛ. Gbɛ̃ kɛ̀ zĩi kɛ̀ gurↄↄ pìa, wà adee bↄ a gbɛ̃nↄ tɛ́ wà dɛ. 
Àgae zĩi kɛ gurↄ swɛɛdo, à gurↄ swɛɛplaadeen é kámma bo, zaakɛ mamↄma Dii ma pↄ́mɛ. Gbɛ̃ kɛ̀ zĩi kɛ̀ kámmabogurↄↄa gàmɛ. 
Isarailinↄ gaegↄ̃ kámmabogurↄↄ pì yã kũna aↄ̃ diɛ gurↄ ìsi ũ ai ń boriia ma bà kuunańyo yã ũ. 
Eégↄ̃ dɛ sèeda ũ mapi kↄ̃n Isarailinↄ dagura gurↄ píngi, zaakɛ mamↄma Dii ma musu kↄ̃n andunao kɛ̀ gurↄ swɛɛdomɛ, ben má yã̀a ma kámma bò à gurↄ swɛɛplaadee zĩ. 
Kɛ̀ Dii yã ò Musanɛ Sinai kpiii musu à yã̀a, ben à dokayã kɛ̃̀ gbɛ̀ walaanↄa mɛ̀n plaa kↄ̃n a zĩnda ↄnɛo à kpàa. 
