﻿BƆNA.
8.
Ben Dii bè Musanɛ: Ǹ gá ǹ o Fili'aunanɛ, mamↄma Dii ma bè à ma gbɛ̃nↄ gbarɛ aↄ̃ gá dↄnzi kɛmɛ. 
Tó à gì ń gbarɛzi sↄ̃, mɛ́ tó blↄ̀nↄ da à bùsu gu píngila. 
Blↄ̀nↄ é Nili pa ai aↄ̃ bikũ baa, aↄ̃é gɛ̃ à ua guu ai à kpɛ́n, aↄ̃é didi à gádoa. Aↄ̃é gɛ̃ à ìbanↄ uanↄ guu kↄ̃n à gbɛ̃nↄ uanↄ. Aↄ̃é ká à kĩinↄ kↄ̃n à gónↄ guu. 
Blↄ̀nↄ é didia kↄ̃n à gbɛ̃nↄ kↄ̃n à ìbanↄ ń píngi. 
Dii ɛ̀ara à bè Musanɛ: Ǹ o Arunanɛ à a gò sɛ́ à dↄ swaanↄla kↄ̃n swa'ↄnɛnↄ kↄ̃n íbↄkiinↄ, blↄ̀nↄ é da Igipiti bùsula. 
Kɛ̀ Aruna a gò dↄ̀ Igipiti ínↄla, ben blↄ̀nↄ bↄ̀ɛ wà dà bùsu pìla. 
Ben ɛ̃zɛ̃dee pìnↄↄ kɛ̀ lɛ se ń ɛ̃zɛ̃dekɛɛ guu, aↄ̃ↄ tò blↄ̀nↄ dà Igipitila. 
Ben Fili'auna Musa kↄ̃n Arunao sìsi à bè: À agbaa kpá Diinɛ à blↄ̀nↄ kɛ̃ma kↄ̃n ma gbɛ̃nↄ, mɛ́ a gbɛ̃nↄ gbarɛ aↄ̃ gá saa oa. 
Ben Musa bè Fili'aunanɛ: Ǹ gurↄↄ diɛmɛ mà agbaa kpánnɛ Diinɛ kↄ̃n n ìbanↄ kↄ̃n n gbɛ̃nↄ, lɛ à blↄ̀nↄ kɛ̃mma kↄ̃n n uanↄ aↄ̃égↄ̃ kú swaazi ado. 
Fili'auna bè: Zia. Ben Musa bè: Eé kɛ lán ń ò nà lɛ ǹgↄ̃ dↄ̃ kɛ̀ gbɛ̃kee dɛ lán Dii wa Luda bàro. 
Blↄ̀nↄ é kɛ̃mma kↄ̃n n uanↄ kↄ̃n n ìbanↄ kↄ̃n n gbɛ̃nↄ aↄ̃égↄ̃ kú swaazi ado. 
Kɛ̀ Musa kↄ̃n Arunao gù Fili'auna kiia, Musa wɛ́ɛ kɛ̀ Diia blↄ̀ kɛ̀ aↄ̃ dà Fili'aunalaanↄ yã musu. 
Dii Musa wɛ́ɛkɛɛ sì, ben blↄ̀nↄ gàga kpɛ́nↄ guu kↄ̃n uanↄ kↄ̃n buraanↄ. 
Wà ń kákakↄ̃a, ben bùsu gũu sↄ̃̀ píngi. 
Kɛ̀ Fili'auna è à kɛ̀ sã̀ↄ, à swã kpɛ́ gbãa, ben à gì Musa kↄ̃n Arunao yã mazi lán Dii ò nà. 
Dii bè Musanɛ: Ǹ o Arunanɛ à a gò sɛ́, à tↄↄtɛ lɛ́o, bùsuti é li gãi ũ Igipiti gu píngia. 
Ben aↄ̃ↄ kɛ̀ lɛ. Aruna a gò sɛ̀ à tↄↄtɛ lɛ̀o, ben bùsuti lì gãinↄ ũ, aↄ̃ dà gbɛ̃nteenↄla kↄ̃n nↄ̀bↄnↄ. Igipiti bùsuti lì gãinↄ ũ píngi. 
Ɛ̃zɛ̃deenↄↄ yↄ̃̀ wà gwà se ń ɛ̃zɛ̃dekɛɛ guu, ben aↄ̃ fùa. Gãinↄ dà gbɛ̃nteenↄla kↄ̃n nↄ̀bↄnↄ. 
Ben ɛ̃zɛ̃deenↄ bè Fili'aunanɛ: Luda ↄgbɛmɛ. Mↄde Fili'auna swã kpɛ́ gbãa, à gì ń yã mazi lán Dii ò nà. 
Dii bè Musanɛ: Ǹ fɛɛ kↄngↄ idɛ'idɛ ǹ gá ǹ Fili'auna le gurↄↄ kɛ̀ èe gaa swaazi, ǹ onɛ mamↄma Dii ma bè, à ma gbɛ̃nↄ gbarɛ aↄ̃ gá dↄnzi kɛmɛ. 
Tó à gì ń gbarɛzi, mɛ́ ifĩinↄ daàla kↄ̃n à ìbanↄ kↄ̃n à gbɛ̃nↄ kↄ̃n à kpɛ́nↄ. Igipiti kpɛ́nↄ é pa kↄ̃n ifĩinↄ, baa tↄↄtɛ aↄ̃é daàla. 
Gurↄ beeea mɛ́ Gosɛ̃ bùsu guu kɛ̀ ma gbɛ̃nↄↄ kún tó ado. Gwen ifĩinↄ é dan gularo, lɛ àgↄ̃ dↄ̃ kɛ̀ mámbe Dii ũ à bùsun. 
Mɛ́ ma gbɛ̃nↄ dↄ̃kↄ̃zi kↄ̃n à gbɛ̃nↄ. Zian sèeda pì é kɛ. 
Ben Dii kɛ̀ lɛ. Ifĩinↄ kà Fili'auna ua guu kↄ̃n à ìbanↄ uanↄ. Igipiti yàka píngi ifĩinↄ yãnzi. 
Ben Fili'auna Musa kↄ̃n Arunao sìsi à bè: À gá saa o a Ludaa bùsu kɛ̀n. 
Ben Musa bènɛ: Eé sí kɛ wà kɛ lɛro, zaakɛ pↄ́ kɛ̀ wé saa oo Dii wa Ludaa pì dɛ Igipitinↄnɛ tɛ̃̀ ũmɛ. Tó wa saa ò kↄ̃n pↄ́ kɛ̀ dɛńnɛ tɛ̃̀ ũuo ń wáa, aↄ̃é wa pápa gbɛ̀o wà wa dɛdɛroo? 
Wé táa o gbáan gurↄ aagↄ̃mɛ, wé gbasa wà saa o Dii wa Ludaa lán à òwe nà. 
Ben Fili'auna bè: Mɛ́ a gbarɛ à gá saa o Dii a Ludaa gbáan, mↄde àton gá zã̀ro. À agbaa kpanɛmɛ sa. 
Musa bènɛ: Tó ma ta, mɛ́ agbaa kpánɛ, eé ifĩinↄ kɛ̃mma zia kↄ̃n n ìbanↄ kↄ̃n n gbɛ̃nↄ. Mↄde ǹton mↄnafiki kɛ dↄro. Ǹ tó gbɛ̃nↄ gá saa o Diia. 
Kɛ̀ Musa bↄ̀ Fili'auna kiia, à agbaa kpànɛ Diinɛ. 
Dii à wɛ́ɛkɛɛ sì, ben ifĩinↄ kɛ̃̀ Fili'aunaa kↄ̃n a ìbanↄ kↄ̃n a gbɛ̃nↄ. Èe gↄ̃ gukearo, baa mɛ̀n do. 
Mↄde Fili'auna swã kpɛ́ gbãa ai tia, à gì ń gbarɛzi. 
