﻿BƆNA.
7.
Ben Dii bè Musanɛ: Ǹ gwa! Ma n kɛ lán ma bà Fili'aunanɛ, bensↄ̃ n vĩ̀i Aruna dɛ n lɛ́gbɛkpari ũ. 
Ǹ yã kɛ̀ má ònnɛ píngi o n vĩ̀i Arunanɛ, eé o Fili'aunanɛ à Isarailinↄ gbarɛ aↄ̃ bↄɛ a bùsun. 
Baa kↄ̃n beeeo mɛ́ à kùgbãa kũ. Mɛ́ sèedanↄ kↄ̃n dabuyãnↄ kɛ Igipiti pari, 
mↄde Fili'auna é a yã maro. Mɛ́ ↄ tↄ̃ Igipitia mà yãkpaɛ kɛńyo pãsĩpãsĩ, mɛ́ bↄ kↄ̃n ma zĩ̀kpɛ Isarailinↄo. 
Tó ma bↄ ma gbãaao Igipitia, mɛ́ Isarailinↄ bↄɛn, Igipitinↄ é dↄ̃ sa kɛ̀ mámbe Dii ũ. 
Ben Musa kↄ̃n Arunao kɛ̀ lán Dii òńnɛ nà. 
Gurↄↄ kɛ̀ aↄ̃ yã ò Fili'aunanɛ, Musa kuu wɛ̃̀ basiigↄ̃, Aruna sↄ̃ wɛ̃̀ basiigↄ̃ awɛɛ'aagↄ̃. 
Ben Dii bè Musanɛ kↄ̃n Arunao: 
Tó Fili'auna dabuyã gbèkamma, ǹ o Arunanɛ à a gò sɛ́ à pãɛ à aɛ, eé li mlɛ̃̀ ũ. 
Kɛ̀ Musa kↄ̃n Arunao gàa Fili'auna kiia, aↄ̃ↄ kɛ̀ lán Dii òńnɛ nà. Aruna a gò sɛ̀ à pã̀ɛ Fili'auna kↄ̃n a ìbanↄ aɛ, ben à lì mlɛ̃̀ ũ. 
Ben Fili'auna Igipiti wɛ́ɛzɛ̃rinↄ kↄ̃n ɛ̃zɛ̃deenↄ sìsi, ben aↄ̃ dabuyã dↄ̃nkↄ̃ pìnↄ kɛ̀ se ń ɛ̃zɛ̃dekɛɛ guu. 
Kɛ̀ aↄ̃ baade a gò pã̀ɛ, ben aↄ̃ gò pìnↄ lì mlɛ̃̀nↄ ũ, ben Aruna gò ń pↄ́nↄ mↄ̀mↄ. 
Fili'auna swã gbãa, èe ń yã maro lán Dii ò nà. 
Dii bè Musanɛ: Fili'auna kù gbãa à gì gbɛ̃nↄ gbarɛzi. 
Ǹ gá ǹ à le zia kↄngↄ gurↄↄ kɛ̀ èe gaa swaazi. Ǹgↄ̃ à dãa Nili saɛ gwe. Ǹgↄ̃ n gò kɛ̀ lì mlɛ̃̀ ũu pì kũna. 
Ǹ benɛ mamↄma Dii Eberunↄ Luda ma n zĩa, ń ònɛ à ma gbɛ̃nↄ gbarɛ aↄ̃ gá dↄnzi kɛmɛ gbáan, mↄde ai tia à gìmazi. 
Mamↄma Dii ma bè, yã kɛ̀ eé tó àgↄ̃ dↄ̃ kɛ̀ mámbe Dii ũun yɛ̀. Tó n Nili í lɛ̀ kↄ̃n gò kɛ̀ ń kũnao, eé li aru ũ. 
Kpↄ̀ kɛ̀ aↄ̃ↄ kú í pì guunↄ é gaga, Nili í é gũu sↄ̃, Igipitinↄ é fua wà mi. 
Ben Dii ɛ̀ara à bè Musanɛ: Ǹ o Arunanɛ à a gò sɛ́ à dↄ Igipiti ínↄla, aↄ̃ swaanↄ kↄ̃n ń swa'ↄnɛnↄ kↄ̃n ń íbↄkiinↄ kↄ̃n ń íkakiinↄ píngi é gↄ̃ aru ũ. Aru égↄ̃ dagula Igipiti, baa kpɛ̃ɛnↄ kↄ̃n orozã guunↄ. 
Ben Musa kↄ̃n Arunao kɛ̀ lán Dii òńnɛ nà. Aruna a gò pì sɛ̀, à Nili í lɛ̀o Fili'auna kↄ̃n a ìbanↄ wáa, ben í pì gↄ̃̀ aru ũ píngi. 
Kpↄ̀ kɛ̀ aↄ̃ↄ kú à guunↄ gàga, ben Nili í pì gũu sↄ̃̀, Igipitinↄ fùa wà mi. Aru dagula Igipiti. 
Igipiti ɛ̃zɛ̃deenↄↄ kɛ̀ lɛ se ń ɛ̃zɛ̃dekɛɛ guu, ben Fili'auna kùgbãa kũ̀, èe ń yã maro lán Dii ò nà. 
Fili'auna lìara à tà a bɛ, èe yã pì da sero. 
Igipitinↄ íbↄkii yↄ̃̀yↄ̃ Nili baa lɛ wà í mi, zaakɛ aↄ̃ↄe fↄ̃ wà swada í mìro. 
À kuu lɛ ai gurↄ swɛɛplaamɛ Dii Nili lɛna gbɛra. 
