﻿NAANA.
21.
Dii aubarika dà Saragu lán à ò nà, à kɛ̀nɛ lán à lɛ́ gbɛ̃̀nɛ nà. 
Ben à nↄ̀ sì à nɛ́ ì kↄ̃n Ibraĩo gↄ̃gbɛ̃ ũ à zikũ guu gurↄↄ kɛ̀ Luda dìɛnɛa. 
Ibraĩ tↄ́ kpà nɛ́ pìnɛ Isaaku. 
À bã̀ngu kɛ̀nɛ à gurↄ sↄraagↄ̃dee zĩ lán Ludaa dìɛnɛ nà. 
À kà wɛ̃̀ basↄↄro a nɛ́ pì igurↄ. 
Ben Sara bè: Luda yáadↄziyã kɛ̀mɛ, gbɛ̃ kɛ̀ mà píngi é yáa dↄmao. 
À bè dↄ: Weé we wà be Ibraĩnɛ yã mɛ́ gↄ̃ nɛ́dandee ũↄ́? Àɛ ma nɛ́gↄ̃gbɛ̃ ìo a zikũ guu. 
Kɛ̀ nɛ́ pì bíta kũ̀ à kɛ̃̀ yↄ̃a, ben Ibraĩ à kɛ̃na yↄ̃a pↄnnaa kɛ̀. 
Sara è nɛ́ kɛ̀ Igipiti nↄgbɛ̃ Agyara ì kↄ̃n Ibraĩo ègↄ̃ Isaaku yáa dↄↄmɛ, 
ben à bè Ibraĩnɛ: Ǹ pɛ́ zↄ̀ pìa kↄ̃n a nɛ́o, zaakɛ zↄ̀ nɛ́ pì é túbi ble kↄ̃n ma nɛ́ Isaakuoro. 
Yã pì Ibraĩ pↄↄ yàka maamaa, zaakɛ à nɛ́mɛ, 
ben Luda bènɛ: Ǹton tó n nↄ̀sɛ yaka n nɛ́ kↄ̃n n nↄgbɛ̃ zĩkɛri pìo yã musuro. Yã kɛ̀ Sara e oonnɛ píngi ǹ ma, zaakɛ Isaaku boriinↄn weégae beńnɛ n boriinↄ ũ. 
Mɛ́ tó zↄ̀ nɛ́ pì borii kɛ se, zaakɛ n nɛ́mɛ. 
Ben Ibraĩ fɛ̀ɛ kↄngↄ idɛ'idɛ, à pↄ́blee sɛ̀ kↄ̃n í tùuo à kpà Agyaraa. À dìnɛ, ben à à nɛ́ kpàa dↄ. À à gbàrɛ, ben à gàa èe likↄ̃aa zↄ̃ↄ Bɛsɛba gbáan. 
Kɛ̀ í yã̀aḿma, à gↄ̃kparɛ pì tò lí gbáru, 
ben à gàa à vɛ̃̀ɛ aɛ kàzulɛɛki zã̀ lɛ́n, zaakɛ à bè á yezi à a nɛ́ gana ero. Kɛ̀ à gàa à vɛ̃̀ɛ kãa lɛ, ben à nà ↄ́ↄdↄnaa. 
Luda gↄ̃kparɛ pì ↄ́ↄ dↄↄ mà, ben Luda Malaika lɛ́ zù Agyarazi zaa musu à bè: Bↄ́ bé à n lee Agyara? Ǹton vĩa kɛro, zaakɛ Luda nɛ́ pì ↄ́ↄ dↄↄ mà guu kɛ̀ à kún. 
Ǹ fɛɛ ǹ n nɛ́ pì sɛ́ ǹ à kũ a ↄↄa, zaakɛ mɛ́ tó à gↄ̃ bori ìsi ũ. 
Luda nↄgbɛ̃ pì wɛ́ɛ kɛ̃̀nɛ, ben à lↄ̀gↄ è. À gàa à í tↄ̀ a tùu pa, ben à mↄ̀ à kpà a nɛ́ pìa à mì. 
Ludaa kú kↄ̃n nɛ́ pìo ai à ìsi kũ̀. Ègↄ̃ kú gbáan, ben à gↄ̃̀ tofekari ũ. 
Gurↄↄ kɛ̀ à kú Parani gbáa pì guun à da Igipiti bùsu nↄↄ sɛ̀nɛ. 
Gurↄ beeea Abimɛlɛki kↄ̃n a zĩ̀kpɛɛnↄ gbɛ̃nsi Fikↄluo gàa Ibraĩ kiia aↄ̃ bènɛ: Ludaa kúnyo yã kɛ̀ nɛ́ɛ kɛɛ guu píngi. 
Ǹ la damɛ kɛ̀ gↄ̃ↄ ǹ sí kↄ̃n Ludao kɛ̀ nɛ́ bↄ ma kpɛɛro ke ma nɛ́nↄ ke ma boriinↄ. Lán ma gbɛ̃kɛɛ kɛ̀nnɛ nà, ǹ kɛmɛ lɛ kↄ̃n bùsu kɛ̀ ń kú à guu gbɛ̃ zĩ̀tↄ ũuo. 
Ben Ibraĩ bènɛ: Ma la dànnɛ. 
Ben Ibraĩ lↄ̀gↄ kɛ̀ Abimɛlɛki gbɛ̃nↄ sìa yã sɛ̀ɛ à sìnnɛ. 
Abimɛlɛki bè: Má gbɛ̃ kɛ̀ aↄ̃ yã beee kɛ̀nↄ dↄ̃ro, nɛ́ɛ omɛ yãro, gbã̀an má mà. 
Ben Ibraĩ sãanↄ kↄ̃n zùnↄ kũ̀ à kpà Abimɛlɛkia, ben aↄ̃ lɛdolɛ kɛ̀ kↄ̃o. 
Ben Ibraĩ sãnunu mɛ̀n swɛɛplaaanↄ bↄ̀ à kàɛ ńdona. 
Abimɛlɛki à là à bè: Sã mɛ̀n swɛɛplaaa kɛ̀ n ń káɛ ńdona pìnↄ yã dɛ diamɛ? 
Ben à wèàla à bè: Ǹ sã mɛ̀n swɛɛplaaa pìnↄ sí sèeda ũ kɛ̀ mámbe ma lↄ̀gↄ pì yↄ̃̀. 
Beee yãnzi wà tↄ́ kpà guu pìnɛ Bɛsɛba, zaakɛ gwen aↄ̃ la dànkↄ̃nɛ. 
Lɛn aↄ̃ lɛdolɛ kɛ̀ Bɛsɛba lɛ, ben Abimɛlɛki kↄ̃n a zĩ̀kpɛɛnↄ gbɛ̃nsi Fikↄluo lìara wà tà Filisitininↄ bùsun. 
Ibraĩ sãma lí tↄ̃̀ Bɛsɛba, ben à Dii Luda Gurↄpingide sìsi gwe. 
Ben à gurↄplaa kɛ̀ Filisitininↄ bùsu pì guu. 
