﻿1 PITA.
5.
Matɛn lɛ́ da ákↄ̃nↄ gbɛ̃ zↄ̃kↄ̃nↄa sà. Gbɛ̃ zↄ̃kↄ̃ↄn ma ũ se. Má de wari kũ Kirisi kɛ̀ɛ sèedade ũ, akũsↄ̃ ma bàka nigↄ̃ kú kũ gakuri kũ ani bo gupuraaao se. 
Àgↄ̃ de kpàsa kũ Luda kàtɛárɛ dã̀rinↄ ũ. À ↄ likai kũ pↄyeinaao, adi kɛ tilasinlo, lákũ Luda yei nàmɛ. Adi kɛ ↄgↄwɛtɛna yãinlo. À kɛ kũ nɛ̀sɛ mɛ̀n doo dé. 
Àsungↄ̃ gbãna mↄ gbɛ̃ kũ ò ń náárɛ á ↄĩ pìnↄaro. À tó á kunna gↄ̃ á sã pìnↄ da a zɛ́a, 
áni kífura kũ a gakuri dì lákaro le gↄrↄ kũ Sãdãriki ni su. 
Ákↄ̃nↄ kɛfɛnnanↄ sↄ̃, à á zĩda kpá gbɛ̃ zↄ̃kↄ̃nↄa. Á pínki à á zĩda busakↄ̃nɛ à kpákↄ̃i, zaakũ Luda dì ibɛrɛ sɛ́ kũ zĩdabirinↄ, ama à gbɛ̃kɛ vĩ kũ zĩdabusarinↄ. 
Abire yãi à á zĩda busa Luda gbãnadenɛ, ani á kara gↄrↄ kũ à dìtɛa. 
À á yã'ũmmananↄ tónɛ pínki, zaakũ àdi laakari dↄáwa. 
Á wɛ́ gↄ̃ dↄ, àgↄ̃ kú á laakariia. Á ibɛrɛ Ibilisi de lán músu ↄ́ↄdↄrii bàmɛ. Àtɛn kpátɛ kɛái, àtɛn gbɛ̃ wɛtɛ à kũ. 
À gínɛ, à zɛ gbãna ludanaanikɛnaa gũn, zaakũ á dↄ̃ kũ á Yesude dake kũ ò kú andunia gũnnↄ ń pínki tɛn wari dokↄ̃nↄ pì kɛmɛ se. 
Luda Arubarikasĩndapinkide á sisi a gakuri kũ àdi lákaroa Kirisi gũn. Tó a wari kɛ̀ fíti, ani á bo mana, ani á zɛ gíngin, ani á gba gbãna, ani á zĩni pɛ́tɛ. 
Àkũ mɛ́ à gbãna vĩ ari gↄrↄ sĩnda pínki! Aami. 
Ma takada fíti dí kɛ̃̀árɛ kũ ó gbɛ̃ndo Silasi ↄomɛ. À demɛnɛ gbɛ̃ náanide ũ. Ma lɛ́ dàáwa, má de a sèedade ũ kũ yã kũ ma ò de Luda gbɛ̃kɛ yãpura ũ. À zɛo gíngin. 
Babilↄnu gbɛ̃ kũ Luda ń sɛ́ lán á bànↄ fↄ kpàáwa. Ma nɛ́ Maaku fↄ kpàáwa dↄ. 
À fↄ kpákↄ̃a kũ lɛ́pɛmmanaao yenyĩ gũn. Luda ákↄ̃nↄ kũ á kú Kirisi gũnnↄ gba aafia á pínki. 
