﻿1 PITA.
4.
Lákũ Kirisi wari kɛ̀ a mɛ̀n nà, ákↄ̃nↄ se à nɛ̀sɛ bire buri sɛ́, zaakũ gbɛ̃ kũ à wari kɛ̀ a mɛ̀n, ade mìi kɛ̃̀ durunnaamɛ. 
Gↄrↄ kũ à gↄ̃̀árɛ á kunnaa gũn, á dà vãni súngↄ̃ doárɛ arɛ doro, séde Luda pↄyenyĩnaa. 
Á kunna kifirinↄ yãkɛnaa gũn yã mↄ̀ lɛ. Yã á kú wé'isariyãkɛnaa gũn kũ dàvãninidɛnaao kũ wɛ̃dɛkɛnaao kũ pãpã kↄ̃kↄ̃o kũ wɛ̃mikↄ̃kↄ̃ bɛ̃̀nɛɛo kũ tãnagbagbana kũ Luda zã̀aguo. 
Kũ adì kakara kũńwo ń pãpã zↄ̃kↄ̃ↄ pì kɛnaa gũn doro, àdi kɛńnɛ yãbonsarɛ ũ, akũ òdi á tↄ́ vãni sí. 
Oni ń yãkɛnanↄ baba Ludanɛ, kũ à yãkpatɛkɛna kũ gbɛ̃ bɛ̃nɛnↄ kũ gyãwãndenↄ soru kɛ̀. 
Ò baaru nna kpà bee gyãwãnde pìnↄnɛ se, de ò le ògↄ̃ kú ninikɛ gũn lán Luda bà, bee kũ yã vùtɛḿma mɛ̀ɛ gũn lán gbɛ̃ sĩnda pínki bà. 
Pↄ́ sĩnda pínki lakanaa kà kãni. Abire yãi àgↄ̃ de laakaridenↄ ũ, àgↄ̃ á zĩda kũna dↄ̃ de àgↄ̃ adua kɛ yãi. 
Yã kũ à de a pínkilan dí: Àgↄ̃ yekↄ̃i kũ nɛ̀sɛ mɛ̀n doo, zaakũ yenyĩ dì pↄ́ kútɛ durunnanↄa dasi. 
À yàri kɛkↄ̃nɛ yãketekanaa sari. 
Lákũ Luda gba dà á baadinɛ nà, à kpákↄ̃i kũ gba pìnↄ Luda gba buri donadona zĩkɛri mananↄ ũ. 
Gbɛ̃ kũ à de waazikɛri ũ, à Luda yã ońnɛ. Gbɛ̃ kũ à de kpanyĩri ũ, à kpáńyĩ kũ gbãna kũ Luda a gbào, de à Luda tↄ́ kpá yã sĩnda pínki gũn Yesu Kirisi gãi. Àkũ mɛ́ à gakuri vĩ kũ gbãnao gↄrↄ sĩnda pínki! Aami. 
Ma gbɛ̃ yenyĩdenↄ, àsun tó yↄ̃ogwana pãsĩ kũ àtɛni á le bo á sarɛ lákũ yã dufu mɛ́ à á lé bàro. 
Lákũ á bàka kú Kirisi warikɛnaa gũn nà, à pↄnna kɛo de à le àgↄ̃ pↄnna zↄ̃kↄ̃ vĩ gↄrↄ kũ Kirisi pì ni bo gupuraa kũ gakurio. 
Tó ò á sↄ̃sↄ̃ Kirisi tↄ́ kũ à kúáwa yãi, á arubarika vĩ, zaakũ Luda Nini gakuride kúáwa. 
Á gbɛ̃ke sún wari kɛ gbɛ̃dɛna ke kpãni'ona ke yãbɛ̃nɛkɛna ke gudɛ yãiro. 
Tó a wari kɛ̀ á Yesudekɛ yãi, àsun kɛárɛ wé'iyã ũro. À Luda sáabu kpá kũ Yesu tↄ́ kúáwa yãi. 
Zaakũ wɛ́tãmmagↄrↄ kà, Luda gbɛ̃nↄn à nàa kũńwo. Lákũ ókↄ̃nↄmɛ à nàa kũoo káaku nà, ani láka kũ gbɛ̃ kũ ò gì Luda baaru nna mainↄo deramɛɛ? 
Zaakũ gbɛ̃ mananↄ surabana zĩ'ũ, yã ni bo kũ ludayãdarisarinↄ kũ durunnakɛrinↄo deramɛɛ? 
Abire yãi gbɛ̃ kũ òtɛn wari kɛ Luda pↄyenyĩnaa gũnnↄ ń zĩda na ń Kɛ̀ri náanidenɛ a ↄĩ, ò kpɛ́ ògↄ̃ yã mana kɛ. 
