﻿EBERUNƆ.
9.
Luda bàka kunna kũńwo káaku donyĩ zɛ́ vĩ kũ Ludakuki kũ à kú zĩtɛo. 
Fitila kũ teburu kũ òdi burodi kátɛa Ludanɛɛo kú kpɛ́da kũ òdi pi gu kũ à kú adonan. 
Kpɛ́nɛ kũ òdi pi Ludakuki pì kú lábure plade kpɛ. 
A gũnn turaretitikpataki kũ ò pì kũ wuraao kun kũ Luda bàka kunna kũńwo àkpati kũ wura kútɛa mámmamwo. Wura lo kũ mana kú a gũn kú àkpatii pìi gũn kũ Haruna gò kũ à lá bↄ̀tↄↄ pàao kũ Luda yãditɛna gbɛ̀ anlonↄo. 
Àkpatii pìi musu kɛrubu gakuridenↄn kú durunnakɛ̃mmakila. Pↄ́ pìnↄ bↄkↄtɛna dodo gↄrↄn díro. 
Ń katɛna lɛ gũn, sa'orinↄ dìgↄ̃ gɛ̃ kpɛ́da gũn gɛ̃̀n baaakↄ̃ ò ń sa'ona zĩ kɛ. 
Sa'oriki mɛ́ àdi gɛ̃ kpɛ́nɛ wɛ̃̀ do gɛ̃̀n do, akũsↄ̃ àdi gɛ̃ aru sariro. Àdi aru pì fãfã a zĩda durunna yãi kũ a gbɛ̃nↄ pↄ́ kũ ò kɛ̀ dↄ̃nasarikɛ gũnwo. 
Luda Nini tɛn mↄwɛrɛ, gↄrↄ kũ kpɛ́ káaku pì kun, Ludakuki zɛ́ wɛ̃naro. 
Abirekũ tɛn yã lɛkↄ̃awɛrɛ kũ tera yão à pì, pↄ́ kũ donyĩrii dì Luda gbanↄ kũ sa'opↄ kũ àdi kpáanↄ dì fↄ̃ à a nɛ̀sɛ danɛ dokↄ̃nↄ swáswaro. 
Yã ditɛnaa pìnↄ bi mɛ̀barayãmɛ. Pↄ́ble kũ pↄ́minaao kũ gbã̀bona buri sĩnda pínkio yãmɛ. Ò dìtɛ ari zɛ́ dufu gↄrↄ gↄ̃ kámɛ. 
Akũ Kirisi sù yã mana kũ à kà tera sa'oriki ũ. À gɛ̃̀ bizakuta kũ à zↄ̃kↄ̃ akũsↄ̃ à papana de a káakupↄla gũn, kũ bisãsiri mɛ́ à dↄ̀ro, andunia díkĩna pↄ́n sↄ̃ro. 
Adi gɛ̃ Ludakukin kũ blè ke zù aruoro, à gɛ̃̀ kũ a zĩda aruo gɛ̃̀n domɛ, à gbɛ̃nↄ bòo ari gↄrↄ sĩnda pínki. 
Zaakũ òdi blè aru kũ zùsa aruo kũ zùnunu kũ ò kpàta túbuo fãfã gbɛ̃ kũ ò gbãsĩnↄa ò gbã̀ boońnɛ, 
oni Kirisi pↄ́ o dↄ yá? À a zĩda kpà Ludaa mamberu sari kũ Nini kũ àdigↄ̃ kun gↄrↄ sĩnda pínki gbãnao. A aru dì ó swɛ̃̀ pípiwɛrɛ bona yã pã kɛkɛna pìnↄ gũn, de ò zĩ kɛ Luda Wɛ̃̀ndidenɛ. 
Abire yãi Kirisi mɛ́ à Luda bàka kunna kũńwo dufu yãkɛkɛri ũ, de gbɛ̃ kũ Luda ń sísinↄ wɛ̃̀ndi kũ àdi lákaro kũ à a lɛ́ sɛ̀ le yãi. À gà de à ń bo, à taari kũ ò kɛ̀ Luda bàka kunna kũńwo káakupↄ yã musunↄ kɛ̃ḿma. 
Tó ò ye ò zĩ kɛ gbɛ̃ lɛ́gbɛditɛnaaa, sé ògↄ̃ dↄ̃ sãnsãn kũ ade gà, 
zaakũ ga gbɛran lɛ́gbɛɛ dìgↄ̃ gbãna vĩ. Tó lɛ́gbɛditɛri kpɛ́ bɛ̃nɛ, lɛ́gbɛ dìgↄ̃ gbãnaro. 
Abire yãin odi Luda bàka kunna kũńwo káakupↄ pì sa kɛ aru sariro. 
Kũ Musa doka yãditɛnanↄ ò gbɛ̃ sĩnda pínki wára, à sãkã tɛ̃ra zónzon kũ sɛ̃̀sↄ̃vlãoo sɛ̀ à zↄ̃̀ zùsanɛ bↄ̀rↄ kũ blèkofĩni aru kũ ò yã̀katɛ kũ íooa, à fã̀fã Musa dokaa kũ gbɛ̃nↄo dↄ ń pínki 
à pì, Luda bàka kunna kũńwo arun gwe, kũ à dìtɛárɛ à kũna. 
Lɛn Musa aru fã̀fã bizakutaa kũ sa'ona zĩkɛbↄnↄo dↄ pínki. 
Doka gũn aru mɛ́ àdi gbã̀ bo pↄ́ daside pínkinɛ. Arukↄtɛnaa sari durunnanↄ kɛ̃mmana kunlo. 
Zaakũ à kↄ̃ sìo ò gbã̀ bo pↄ́ kũ ò kú ludambɛ taka pìnↄnɛ lán abire bà, sa'opↄ kũ à de abirekũla kↄ̃ sì kũ ludambɛ pↄ́ pìnↄ. 
Zaakũ Kirisi dí gɛ̃ Ludakuki taka kũ bisãsiri bònlo, à gɛ̃̀ a yãpuran ludambɛmɛ, gu kũ à kun tera ó Zɛkũnwode ũ Luda arɛ. 
Sa'oriki dì gɛ̃ Ludakukin kũ pↄ́kãde aruo wɛ̃̀ kũ wɛ̃̀ɛo, ama Kirisi dí gɛ̃ de à a zĩda kpá gɛ̃̀n baaakↄ̃ yãiro. 
Tó adi kɛ lɛro, de àtɛn wari kɛ gɛ̃̀n baaakↄ̃ zaa anduniakatɛna gↄrↄa. Yãpura gũn à sù gɛ̃̀n domɛ gↄrↄ kũ andunia kà a kákia sà, à a zĩda kpà sa'opↄ ũ, de à durunna mì dɛo. 
Luda dìtɛ bisãsirinɛ à ga gɛ̃̀n do, gbasa à yãkpatɛ kɛ kãao, 
lɛn Kirisi a zĩda kpà gɛ̃̀n do lɛ, à gbɛ̃nↄ durunna dì a mìia dasi. Ani ɛra à su a gɛ̃̀n pladeo, adi kɛ durunna yãin doro, de à gbɛ̃ kũ ń wɛ́ dↄinↄ sura ba yãimɛ. 
