﻿1 TIMƆTI.
4.
Luda Nini ò swáswa kũ gↄrↄ kpɛde gbɛ̃kenↄ ni pã kpá Yesu zɛ́i, ò tɛ́ yã kũ tãnanↄ dì ɛ́kɛdenↄ da a onanyĩ ò ń sãtɛ. 
Manafikide pìnↄ a mana dↄ̃kↄ̃nɛ kũ a vãnioro, ń nɛ̀sɛ gana lákũ ò pi gɛ̃ wãnan ò kɛ̃̀o bà. 
Òdi gbɛ̃nↄ dãdã nↄsɛnaai kũ zãkɛnaao, akũsↄ̃ òdi pↄ́ble tɛ̃̀bona ditɛ gbɛ̃nↄnɛ, pↄ́ble kũ Luda kɛ̀ a náanikɛri kũ ò yãpura dↄ̃nↄ yãi, kũ à de ò ble kũ sáabukpanaao. 
Pↄ́ kũ Luda kɛ̀ sĩnda pínki manamɛ. Òsun a ke tɛ̃̀ boro, ò ble kũ sáabukpanaao, 
zaakũ Luda yã kũ ó aduakɛnaao gbãsĩ bòn. 
Tó n yã pìnↄ dà n gbɛ̃nↄnɛ, ĩnigↄ̃ de Kirisi Yesu zĩkɛri mana ũ kũ ò gwà kũ ó donyĩzɛ yãnↄ kũ yãdannɛ mana kũ ń tɛ́iio. 
Ǹ mì kɛ̃ futɛokaragara kũ àdi kↄ̃ sí kũ Luda yãoroa. Ǹ n zĩda tùtu kɛ de ǹgↄ̃ de ludayãmari ũ. 
Mɛ̀tutukɛnaa àre vĩ fíti, ama dena ludayãmari ũ àre vĩ yã sĩnda pínki gũn, zaakũ abire dì su kũ wɛ̃̀ndiio gbãra kũ ziao. 
Yã díkĩna bi yãpuramɛ, à kà ò sí ↄplapla. 
Òdi zĩ kɛ òdi ↄsi ká a musu, zaakũ ó wɛ́ dↄ Luda Wɛ̃̀ndidei. Àkũmɛ gbɛ̃ sĩnda pínki Surabari ũ, atɛ̃nsa a náanikɛrinↄ. 
Ǹ yã pìnↄ ditɛńnɛ ǹ dadańnɛ. 
Ǹsun tó ò n kɛfɛnnakɛna gya boro. Ǹ tó n kunna zɛ́ mↄ Yesu náanikɛrinↄnɛ yã'onaa gũn kũ yãkɛnaao kũ yenyĩo kũ ludanaanikɛnaao kũ kunna gbãsĩ sario. 
Ari màgↄ̃ su ǹ wɛ́ tã ǹ Luda yã kyó kɛ gbɛ̃nↄnɛ, ǹ dańnɛ ǹ lɛ́ daoḿma. 
Gba kũ Luda dànnɛ gↄrↄ kũ ò annabikɛyã ò n yã musu, akũsↄ̃ gbɛ̃ zↄ̃kↄ̃nↄ ↄ nànamma, ǹsun pã kpáiro. 
Ǹ laakari dↄ yã pìnↄa ǹ mɛ̀ kpáa, de gbɛ̃ sĩnda pínki n gɛna arɛ e. 
Ǹ n zĩda yã kũ n yãdannɛnaaoo tàasi ká. Ǹgↄ̃ gɛ́ arɛ kũ yã pìnↄ. Tó n kɛ̀ lɛ, ĩni n zĩda sura ba kũ gbɛ̃ kũ òtɛn sã kpá n yãinↄomɛ. 
