﻿FILIPIDENƆ.
2.
Tó á kunna Kirisi gũn lɛ́damma vĩ, tó a yenyĩ tɛn tɛ́ kpáái, tó á lɛ́dokↄ̃nↄ vĩ kũ a Ninio, tó á kↄ̃ wɛ̃nda vĩ kũ sùruuo, 
à laasun dokↄ̃nↄ kɛ, àgↄ̃ yenyĩ dokↄ̃nↄ vĩ lɛ́dokↄ̃nↄdenↄ ũ, pↄyeinayãdokↄ̃nↄdenↄ ũ, de ma pↄnna gↄ̃ papana. 
Àsun yãke kɛ denlana ke yↄ̃̀gↄ̃kɛna yãiro. Zĩdabusanaa gũn à a gbɛ̃dake kũ kũ bɛ̀ɛrɛɛo de á zĩdala. 
Gbɛ̃ke sún laasun lɛ́ a zĩda mɛ̀n do yãaro, à gbɛ̃ pãndenↄ pↄ́ lɛ́ dↄ. 
Àgↄ̃ nɛ̀sɛ kũ Kirisi Yesu vĩ vĩ se. 
A ludakɛnaa gũn adi a zĩda kɛna lɛɛlɛ kũ Ludao yã daro, 
akũ à a zĩda gwenaa tòn, à zĩ̀rikɛ sɛ̀, à gↄ̃̀ bisãsiri ũ, à bisãsirikɛ sɛ̀. 
À a zĩda bùsa, à mìi nàtɛ ari à gɛ̀ɛ à gào, ari lígbãndurukpana ganaa. 
Abire yãi Luda a sɛ̀ musu, à tↄ́ kũ à de tↄ́ sĩnda pínkila kpànɛ, 
de tó ò Yesu tↄ́ sì, gbɛ̃ sĩnda pínki ni kútɛnɛ ludambɛ kũ zĩtɛo kũ zĩtɛ gɛ̃io, 
gbɛ̃ sĩnda pínki ni o kũ a lɛ́o kũ Yesu Kirisimɛ Dikiri ũ De Luda tↄ́bona yãi. 
Abire yãi ma gbɛ̃ yenyĩdenↄ, lákũ adì ma yã ma gↄrↄ kũ má kú kãáo nà, atɛ̃nsa kũ má kú kãáo tera doro, àgↄ̃ á bona mana lɛ́ papa kũ vĩnao kũ lukanaao. 
Zaakũ Luda mɛ́ àtɛn zĩ kɛ á gũn de àgↄ̃ ye a pↄyenyĩnaai gbasa à kɛ. 
À yã sĩnda pínki kɛ yãkete kũ lɛ́kpakↄ̃anaao sari, 
de àgↄ̃ taari sari, gbãsĩ sari, Luda nɛ́ mamberusaridenↄ ũ tera gbɛ̃ sãtɛna nɛ̀sɛpãsĩdenↄ tɛ́, kũ átɛn gu puńnɛ andunia gũn lán susunɛnↄ bà, 
àgↄ̃ wɛ̃̀ndi yã kũna, de mà le mà ĩa dã kãáo Kirisi sugↄrↄ zĩ yãi. Tó átɛn kɛ lɛ, de mádi bà pã lɛ́ro akũsↄ̃ mádi zĩ pã kɛro. 
Bee tó ma aru ni kↄ́tɛ á ludanaanikɛna sa'o'i ũ, ma pↄ nigↄ̃ nna, matɛn pↄnna kɛ kãáo á pínki. 
Ákↄ̃nↄ sↄ̃, à pↄnna kɛ lɛ, ò kɛ lɛɛlɛ. 
Kũ Dikiri Yesu arubarikaao mani Timↄti zĩáwa tera, de mà le mà á baaru ma, ma laakari kpátɛ. 
Má gbɛ̃ke vĩ kũ à ye á yãi yãpura lákũ a bàro. 
Gbɛ̃ sĩnda pínki zĩda yã mɛ́ àdi donɛ arɛ, adi kɛ Yesu Kirisi yãnlo. 
Á dↄ̃ lákũ Timↄti a zĩda bì nà, à baaru nna zĩ kɛ̀ kũmao lán nɛ́ kũ a deo bà. 
Tó má a zɛna dↄ̃ súsu, má ye mà a zĩáwa gↄ̃̀nↄ. 
Má Dikiri náani vĩ kũ mani su á gwa tera ma zĩda. 
Ma gbɛ̃ Ɛpafarↄditu, ma zĩkɛri dake, ma zĩ̀kari dake kũ a a zĩ̀ à kpámai kũ pↄ́ kũ matɛni a ni dɛnↄ, ma è à mana mà a gbarɛáwamɛ. 
Àtɛni á bɛgɛ kɛ á pínki, akũsↄ̃ a nɛ̀sɛɛ yàka, kũ a a gyãkɛna baaruu mà yãi. 
À gyã kɛ̀ yãpura ari à kà gana, akũ Luda a wɛ̃nda gwà. Adi kɛ àkũmɛ adoro, kũ makũomɛ se, de ma pↄsira sún kararo yãi. 
Abire yãi matɛn wã mà a gbarɛáwa, de á wɛ́ sikↄ̃lɛ, á pↄ kɛ nna, ma laakari kpátɛ. 
À gbãnakɛ kpái Dikiri gũn kũ pↄnna zↄ̃kↄ̃ↄo. À bɛ̀ɛrɛ lí gbɛ̃ bire takanɛ. 
À gↄ̃̀ fíti kũ ani ga Kirisi zĩ yãi. À a zĩda kpà gaa de à le à kpányĩ kũ áni fↄ̃ à kɛmɛnɛro kɛmɛnɛ yãi. 
