﻿2 KƆRINTIDENƆ.
12.
À kũ̀ tilasi mà lɛ́ gbɛ̃. Bee kũ à àre vĩro, mani lɛ́ pá wɛ́gupu'enanↄa kũ yã kũ Dikiri mↄ̀mɛnɛnↄo sà. 
Má gbɛ̃ke dↄ̃ Kirisi gũn, ò a sɛ̀ ò gɛ̀ɛ kãao ari ludambɛ aakↄ̃den, a wɛ̃̀ gɛ̃ro donsarin dí. À gɛ̀ɛ kũ mɛ̀ɛon yá, mɛ̀ɛ sarin yá, má dↄ̃ro, sé Luda. 
Má dↄ̃ kũ ò ade pìi sɛ̀ ò gɛ̀ɛ kãao aruzennammɛ. À gɛ̀ɛ kũ mɛ̀ɛon yá, mɛ̀ɛ sarin yá, Luda mɛ́ à dↄ̃. 
À yã kũ àdi sí oro mà, kũ bisãsiri ni fↄ̃ à babaro. 
Mani lɛ́ gbɛ̃ ade yã musu, mani gbɛ̃ ma zĩda yã musuro, sé ma gbãnasarikɛ yã. 
Bee tó mani lɛ́ gbɛ̃, adi kɛ má yↄ̃nkↄnlo, zaakũ yãpuran mani o. Ama mani lɛ́ gbɛ̃ro, de gbɛ̃ke sún ma ditɛ de pↄ́ kũ à èma ke yã kũ à mà ma lɛ́nlaro. 
De màsun ĩa dã yã zↄ̃kↄ̃ kũ Luda mↄ̀mɛnɛnↄ musuro yãi, à pↄ́ sↄ̀tↄ ma mɛ̀ɛ gũn Setan zĩ̀ri ũ, àgↄ̃ wɛ́ tãma, de màsun ĩa dãro yãi. 
Ma wɛ́ kɛ̀ Dikiria gɛ̃̀n aakↄ̃ yã pìi musu de à pↄ́ pì bo ma mɛ̀n, 
akũ à pìmɛnɛ, a gbɛ̃kɛ kũ adì kɛmɛnɛ mↄ̀ma. Gbãnasarikɛ gũnn a gbãna papana dì bon. Abire yãi mani lɛ́ gbɛ̃ kũ pↄnnao ma gbãnasarikɛ musu, de Kirisi gbãna gↄ̃ kú ma gũn. 
Abire yã mɛ́ à tò madì pↄnna kɛ kũ gbãnasarikɛo kũ wé'idammanaao kũ wario kũ takasio kũ wɛ́tãmmanaao Kirisi yãi, zaakũ gↄrↄ kũ gbãna kĩ̀aman madìgↄ̃ gbãna. 
Ma yↄ̃nkↄyã kɛ̀, ákↄ̃nↄ mɛ́ a ma dan. Ákↄ̃nↄmɛ à de yã à ma sáabu kpá. Bee tó má kun pↄ́ke ũro, má kĩana zĩ̀ri kũ a ń dítɛ zↄ̃kↄ̃ↄ kũ̀nↄi yãke gũnlo. 
Ma a kunna zĩ̀ri ũ mↄ̀árɛ kũ mɛnao manamana sèedakɛnanↄ kũ yãbonsarɛnↄ kũ daboyãnↄ gũn. 
Bↄ́ mɛ́ à á kĩa sↄsinↄ gbɛ̃ kparanↄaa? Ke kũ mádi gↄ̃ á gbɛ̃kenɛ aso ũro yãii? À sùru kɛ kũmao kũ taari dio! 
Tera sà ma soru kɛ̀ mà su á kĩnaa a gɛ̃̀n aakↄ̃deo, akũsↄ̃ mani gↄ̃ á gbɛ̃kenɛ aso ũro. Ákↄ̃nↄ matɛni á wɛtɛ, adi kɛ á pↄ́nↄn matɛn wɛtɛro. Zaakũ denↄ mɛ́ òdi aruzɛkɛ ditɛ ń nɛ́nↄnɛ, adi kɛ nɛ́nↄ mɛ́ òdi ditɛńnɛro. 
Mani fↄ̃ mà pↄ́ kũ má vĩ deárɛ pínki, mà a zĩda kpááwa kũ pↄnnao. Tó ma yenaái tɛn kara, á yenamai ni lagon yá? 
Bee kũ a we kũ mádi gↄ̃árɛ aso ũro, gbɛ̃nↄ dì pi, wɛ́zɛ̃rin ma ũ, ma pↄ́ sìáwa kũ ↄ̃ndↄ̃o. 
Ma á blé gbɛ̃ kũ ma ń zĩáwanↄ ke gãi yá? 
Ma kútɛ kɛ̀ Titunɛ à gɛ́ á kĩnaa, akũ ma ó gbɛ̃ndo dànɛ. Titu á blén yá? Ó nɛ̀sɛ dokↄ̃nↄnloo? Ó ágba dokↄ̃nↄnloo? 
Átɛn da yã ótɛn boki wɛtɛn yá? Lɛnlo! Ótɛn yã o kũ Luda dↄ̃naao kunna Kirisi gũmmɛ. Ma gbɛ̃ yenyĩdenↄ, ma abire òárɛ pínki á zĩni pɛtɛna yãimɛ. 
Vĩna tɛni ma kũ kũ tó ma su á kĩnaa, mani á le lákũ má ye nàro, akũsↄ̃ áni ma e lákũ á ye nàro. Matɛn vĩna kɛ fìtiinɛ kũ nɛ̀sɛgↄ̃baao kũ pↄfɛ̃o kũ ania pãsĩo kũ kↄ̃yakanaao kũ kↄ̃pinaao kũ ĩadãnaao kũ zukakanaao. 
Vĩna tɛni ma kũ kũ tó ma ɛra ma su á kĩnaa, ma Luda ni tó wé'i ma kũ á arɛ. Gbɛ̃ kũ ò durunna kɛ̀ yã, ò gbãsĩ kɛ̀, ò pãpã kɛ̀, ò wé'isariyã kɛ̀nↄ, tó odi nɛ̀sɛ litɛ ò mìi kɛ̃̀ yã pìnↄaro, mani pↄsira kɛ kũńwo. 
