﻿2 KƆRINTIDENƆ.
10.
Makũ Pↄlu, ma kútɛ kɛ̀árɛ kũ Kirisi nɛ̀sɛyĩdao kũ a busɛkɛo, makũ kũ òdi pi, tó má kú kãáo má busɛ, tó má kú kãáoro sↄ̃, madìgↄ̃ pãsĩárɛ. 
Ma wɛ́ kɛ̀áwa, tó ma su, àsun tó màgↄ̃ pãsĩ kãáoro, zaakũ mani fↄ̃ màgↄ̃ pãsĩ kũ gbɛ̃ kũ òdi pi andunia yã mɛ́ àtɛn dowɛrɛ arɛnↄo. 
Ó kú andunia gũmmɛ, ama odì zĩ̀ ká lán andunia gbɛ̃nↄ bàro. 
Ó gↄ̃kɛbↄnↄ bi andunia pↄ́nlo, Luda gↄ̃kɛbↄ gbãna kũ odì zɛki gbãnanↄ gboroonↄmɛ. Odì ɛ́kɛ lɛ́kpakↄ̃ananↄ gboroo 
kũ yↄ̃̀gↄ̃ yã kũ àdi gíńnɛ ò Luda dↄ̃o pínki. Odì laasun sĩnda pínki milɛ ble, de ò mì natɛ Kirisinɛ. 
Tó a mìi nàtɛwɛrɛ mámmam, o laka kũ ò wɛ́ tã sãyãmarisaridenↄa. 
Adì yã gwa musumɛ. Tó gbɛ̃ a zĩda náanikɛna kũ Kirisi pↄ́n a ũ, ade gↄ̃ dↄn kũ Kirisi pↄ́n ó ũ lán a bà se. 
Bee tó ma lɛ́ gbɛ̃̀ à kɛ̀ zↄ̃kↄ̃ doka kũ Dikiri kpàwá yã musu, wé'i ni ma kũro, zaakũ á zĩni pɛtɛna yãimɛ, adi kɛ á lɛtɛna yãinlo. 
Àsun kɛ lándↄ̃ má ye mà vĩna dadaái kũ ma takadakɛ̃naao bàro. 
Òdi pi ma takadanↄn bɛ̀ɛrɛ vĩ, akũsↄ̃ ò gbãna, ama tó ò wɛ́ sìmalɛ, àdi ń kũ gbãnaro, ma yã dì ká pↄ́ke lɛ́iro. 
Gbɛ̃ kũ òtɛn o lɛnↄ gↄ̃ dↄ̃ kũ lákũ ó yãnↄ de nà takadanↄ gũn tó ó kú kãáoro, lɛn óni kɛ lɛ, tó o kↄ̃ è. 
Dín ó ũ ò ó zĩda kɛ lɛɛlɛ kesↄ̃ ò ó zĩda lɛkↄ̃a kũ gbɛ̃ kũ òtɛni ń zĩda sáabu kpánↄo. Tó ò ń zĩda kpàkũsũ kↄ̃o kesↄ̃ ò ń zĩda lɛ̀kↄ̃a kↄ̃o, òdigↄ̃ ↄ̃ndↄ̃ro. 
Ókↄ̃nↄ sↄ̃, óni lɛ́ gbɛ̃ de a lɛ́laro. Óni gbɛ̃ ikokɛki kũ Luda dìtɛwɛrɛ lɛ́mmɛ, kũ à à kà á kĩnaa se. 
Lákũ o ka á kĩnaa nà, ótɛn vĩ ó ikokɛki lɛ́laro, zaakũ o su kũ Kirisi baaru nnao ari á kĩnaa káaku. 
Odì lɛ́ gbɛ̃ de a lɛ́la, ò gbɛ̃ pãndenↄ zĩ ká ó pↄ́laro. Zaakũ á ludanaanikɛna tɛn kara, ó ye zĩ kũ ótɛn kɛ á tɛ́ ↄ tá manamana ari à ká ikokɛki kũ Luda dìtɛwɛrɛ lɛ́n, 
de ò gɛ́ ò baaru nna pì kpá bùsu kũ ò kú á arɛnↄ gũn, lɛ́gbɛ̃na kũ gbɛ̃ pãndenↄ tàragaabanaao sari. 
Tó gbɛ̃ ye à lɛ́ gbɛ̃, à gbɛ̃ Dikiri yã musu. 
Adi kɛ gbɛ̃ kũ àdi a zĩda sáabu kpá mɛ́ à manaro, sé gbɛ̃ kũ Dikiri dì a sáabu kpá. 
