﻿1 KƆRINTIDENƆ.
9.
Má a zĩda vĩnloo? Zĩ̀riin ma ũroo? Mádi wɛ́ si ó Dikiri Yesu lɛ́roo? Ákↄ̃nↄmɛ á de ma zĩ gbɛ̀ ũ Dikiri gũn fá? 
Bee tó má de zĩ̀ri ũ gbɛ̃ pãndenↄnɛro, má deárɛ a ũ fá. Kunna Dikiri gũn ma kunna zĩ̀ri ũ sèedaan á ũ. 
Yã kũ madì o ma vãniborinↄnɛn dí: 
Má pↄ́blena kũ pↄ́minaao zɛ́ vĩ ma zĩ gũnloo? 
Má a zɛ́ vĩ màgↄ̃ tɛ́ kũ nↄ Yesudeo gu kũ matɛn gɛ́n lán zĩ̀ri kparanↄ kũ Dikiri dakũnanↄ kũ Pitao bàroo? 
Makũ kũ Baanabao ó gbɛ̃nↄn pla, ókↄ̃nↄ ó zɛ́ vĩ ò ó ↄzĩ tónloo? 
Dí mɛ́ àdi soza ble kũ a zĩda bↄ̀kↄ ↄgↄoo? Dí mɛ́ àdi lí ba, akũ àdi a nɛ́ bleroo? Dí mɛ́ àdigↄ̃ zù dã, akũ àdi a vĩ miroo? 
Bee kũ bisãsiri yãkɛnanↄn ma lɛ̀kↄ̃aárɛ, à kú Musa doka gũn lɛroo? 
À kɛ̃na Musa doka takadan ò pì, àsun lɛ́sↄ da zùunɛ gↄrↄ kũ àtɛn pↄ́wɛ gbɛ̃ro. Zùun Luda dì laakari dↄa yá? 
Ó yãi à yã pìi òroo? Ee, ó yãin ò yã pìi kɛ̃̀, de búbari gↄ̃ sɛ̃̀ wa kũ tãmaaao, pↄ́wɛgbɛ̃ri gↄ̃ pↄ́ gbɛ̃ kũ tãmaaao, de à a baka le a gũn. 
Tó o Luda yã tↄ̃̀ á tɛ́, akũ o ó bakaa lèáwa, yãken yá? 
Tó dakenↄ zɛ́ bire vĩáwa, óni ó pↄ́ o dↄ yá? Ódi sɛ́tɛ zɛ́ bire gũnlo, o yã sĩnda pínki fↄ̃̀, de òsun zɛ́ zↄ̃ Kirisi baaru nnanɛro yãi. 
Á dↄ̃ kũ Luda ↄn zĩkɛrinↄ dì Luda ↄn pↄ́ bleroo? Luda gbagbaki sa'orinↄ dì ń baka le gbagbaki pìi gũnloo? 
Lɛn Dikiri dìtɛ a baarunnakparinↄ gↄ̃ pↄ́ ble baaruu pì kpana yã musu lɛ. 
Bee kũ abireo mádi zɛ́ pìnↄ ke sɛ́ro, akũsↄ̃ mádi abirekũ o de ò kɛmɛnɛ yãinlo. Ga manamɛnɛ de abirekũla. Gbɛ̃ke ni le à kpá ma ĩadãna dínɛro. 
Kirisi baarunnakpana demɛnɛ ĩadãna yã ũro, tilasi mɛ́ à gbá dìma. Waiyoo makũ, tó matɛn baaru nna pì kpáro. 
Tó matɛn zĩ pì kɛ kũ ma zĩda pↄyeinaaomɛ, mani wɛ́ dↄ ma bakaaimɛ. Lákũ Luda mɛ́ à nàmɛnɛ ma ↄĩ nà, à kↄ̃ sì kũmao mà kɛ. 
Bↄ́mɛ ma àre ũu? Tó ma baaru nna pìi kpà ↄsãsãnaa sari, tó mádi doka kũ má vĩ baaru nna pì kpanaa gũn kɛḿmaro, ma àreen gwe. 
Bee kũ gbɛ̃ke ma vĩro, ma a zĩda dìtɛ zↄ̀ ũ gbɛ̃ pínkinɛ, de mà gbɛ̃nↄ le dasi yãi. 
Kũ má kú kũ Yudanↄ, ma gↄ̃ lán ń bà, de ò ma yãzɛ e yãi. Kũ má kú kũ Musa dokadarinↄ, ma gↄ̃ a dàri ũ, bee kũ à iko vĩmaro, de a yã dàrinↄ ma yãzɛ e yãimɛ. 
Kũ má kú kũ dokadarisarinↄ, ma gↄ̃ lán ń bà, de ò ma yãzɛ e yãi. Adi kɛ ma bo Luda doka zɛ́nnlo, Kirisi mɛ́ à iko vĩma. 
Kũ má kú kũ gbɛ̃ busananↄ, ma busa, de ò ma yãzɛ e yãi. Madì gↄ̃ pↄ́ sĩnda pínki ũ gbɛ̃ sĩnda pínkinɛ, bee dera, de mà le mà ń gbɛ̃kenↄ sura ba. 
Yã kũ madì kɛ pínki, madì kɛ Kirisi baaru nna yãimɛ, de mà a baka le a arubarikaa gũn. 
Bàkpakũsũnaa gũn, gbɛ̃ sĩnda pínki mɛ́ àdi bàa lɛ́, ama á dↄ̃ kũ gbɛ̃ mɛ̀n do mɛ́ àdi bleroo? À bàa lɛ́ lɛ se, à le à ble. 
Kↄ̃kↄ̃'ori sĩnda pínki dì a zĩda tùtu kɛ, àdi a zĩda foru kɛ yã sĩnda pínki musu. Àdi kɛ lɛ fùra kũ àdi yaka lena yãi. Ókↄ̃nↄ sↄ̃, a pↄ́ kũ àdi yakaro yãimɛ. 
Abire yãi bà kũ matɛn lɛ́, má dↄ̃ pↄ́ kũ matɛn pɛ́a, adi kɛ matɛn ↄsi ká gukorianlo. 
Oi, madì wari dↄ ma mɛ̀ɛa, madì ma mɛ̀ɛ taki kɛ, de ma waazikɛna dakenↄnɛ gbɛra, másun bo pãro yãi. 
