﻿ROMUDENƆ.
6.
Óni o deramɛɛ? Óni gí ògↄ̃ durunna kɛ de Luda gbɛ̃kɛ le àgↄ̃ karan yá? 
Oi! Lɛnlo! Ókↄ̃nↄ kũ ó de gɛ̀nↄ ũ durunna yã musu, à kɛ̀ dera ónigↄ̃ kpɛ́ ògↄ̃ durunna kɛ dↄↄ? 
Ókↄ̃nↄ kũ o da'itɛ kɛ̀ Kirisi Yesu pↄ́ ũnↄ, á dↄ̃ kũ ó lɛɛlɛ kãao a ga gũnloo? 
O ga kãao da'itɛkɛnaa gũn, ò ó vĩ kãao de ògↄ̃ kú kũ wɛ̃̀ndi dufuo, lákũ Kirisi bò gan kũ a De gbãna gakurio à kun nà. 
Lákũ o gↄ̃ kãao mɛ̀ dokↄ̃nↄ ũ a ga gũn nà, lɛn óni gↄ̃ kãao lɛ a vunaa gũn se. 
Ó dↄ̃ kũ ó dà zĩ gà kãao lía, de ó mɛ̀ durunnade kakatɛ òsun zↄ̀ ble durunnanɛ doro, 
zaakũ gbɛ̃ kũ à gàa bò durunna yãmmɛ. 
Lákũ o ga kũ Kirisio nà, ó a náani vĩ kũ ónigↄ̃ kú kãao dↄ. 
Ó dↄ̃ lákũ Kirisi bò gan nà, ani ga doro, ga gbãna vĩa doro. 
Zaakũ gana kũ à gà, à gà durunna yã musu gɛ̃̀n domɛ, kunna kũ à kun tera sↄ̃, à kun Luda pↄ́ ũmɛ. 
Lɛn ákↄ̃nↄ se, à á zĩda ditɛ gɛ̀nↄ ũ durunna yã musu lɛ, ánigↄ̃ kun Luda pↄ́ ũ Kirisi Yesu gũn. 
Abire yãi àsun tó durunna kí ble á mɛ̀ kũ ani gaa á dà vãni doárɛ arɛ doro. 
Àsun á mɛ̀guke kpá durunnaa vãnikɛbↄ ũro. À á zĩda kpá Ludaa gbɛ̃ kũ ò bò gan ò kunnↄ ũ, à á mɛ̀gunↄ kpáa yãmanakɛbↄnↄ ũ. 
Àsun tó durunna gↄ̃ gbãna vĩáwa doro, zaakũ á na doka ↄĩro, séde Luda gbɛ̃kɛ. 
Deran gwee? Lákũ ó kú doka ↄĩ doro nà, séde Luda gbɛ̃kɛ ↄĩ, ónigↄ̃ gí durunna kɛn yá? Oi! Lɛnlo! 
Á dↄ̃ kũ tó a á zĩda kpà gbɛ̃a átɛn mì natɛnɛ, á de ade zↄ̀ ũroo? Tó durunnan a á zĩda kpàa, áni gamɛ. Tó a mì nàtɛ Ludanɛ sↄ̃, áni bo mana. 
O sáabu kɛ̀ kũ Ludao, zaakũ durunna zↄ̀nↄn á ũ yã, akũ a mì nàtɛ yã kũ ò dàárɛ zɛ́azɛanɛ kũ nɛ̀sɛ mɛ̀n doo. 
A bo durunna yãn, a gↄ̃ yãmanakɛna zↄ̀nↄ ũ. 
Matɛn yã pì o lákũ bisãsiri yã'onaa bà á gbãnasarikɛ yãimɛ. Lákũ a á mɛ̀gunↄ kpà yã pãpãkɛna kũ yã vãnio zↄ̀nↄ ũ a yã vãni kɛ̀ nà, lɛn tera dↄ à á mɛ̀gunↄ kpá manakɛna zↄ̀nↄ ũ de á kunna gↄ̃ adona. 
Kũ á de durunna zↄ̀nↄ ũ yã, á bàka kú kũ yãmanakɛnaaoro. 
Àre kpaten a lè yã kũ a kɛ̀ yã kũ à kɛ̀árɛ wé'iyã ũ teranↄ musuu? Yã pìnↄ lakana bi gamɛ. 
Tera sà lákũ a bo durunna yãn nà átɛn do Ludai, á àreen kunna adona ũ, a lakana sↄ̃ bi wɛ̃̀ndi kũ àdi lákaromɛ. 
Durunna làada bi gamɛ, ama gba kũ Luda dàwɛrɛ kunna ó Dikiri Kirisi Yesu gũnn wɛ̃̀ndi kũ àdi lákaro ũ. 
